މިއަދު ކުރިއަށްދާ ކޮމަންޑޫ ދާއިރާގެ ބައި އިލެކްޝަންގައި އިންތިޚާބަށް އަސަރުކުރާފަދަ އެއްވެސް މައްސަލައެއް މިހާތަނަށް ހުށަހަޅާފައި ނުވާކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
މިއަދު ކުރިއަށްދާ އިންތިޚާބާއި ގުޅޭގޮތުން ޕީއެސްއެމް މައުލޫމާތު ދެއްވަމުން އިލެކްޝަންސް ކޮމިޝަންގެ ރައީސް ފުއާދު ތައުފީގް ވިދާޅުވީ، އިންތިޚާބާއި ގުޅޭގޮތުން އެކި ޝަކުވާތައް ކޮމިޝަނަސް ހުށަހަޅަމުންދާކަމަށެވެ. ނަމަވެސް މިހާތަނަށް އިންތިޚަބަށް އަސަރުކުރާ ފަދަ އެއްވެސް ޝަކުވާއެއް ހުށަހަޅާފައި ނުވާކަމަށް ފުއާދު ވިދާޅުވިއެވެ.
އިންތިޚާބު ފެށުމުގެ ކުރިން ހުށަހެޅި 3 ޝަކުވާއަށް ކޮމިޝަނުން ޖަވާބުދާރީވެފައިވާކަމަށް ފުއާދު ވިދާޅުވިއެވެ. އިންތިޚާބާއި ގުޅިގެން ހުށަހަޅާ ޝަކުވާތައް ބެލުމުގައި ކޮމިޝަންގައި މިނިވަން ކޮމެޓީއެއް އެކުލަވާލެވިފައިވާކަށް އޭނާ ވިދާޅުވިއެވެ. ކޮމިޝަނަށް ހުށަހެޅޭ ޝަކުވާތަކާއި، ފާހަގަވާ ކަންކަމަށް ބަލައި ޤާނޫނީ ގޮތުން ބަލަންޖެހޭ މައްސަލައެއް އޮތްނަމަ އެކަމެއް ބަލައި ކޯޓާއި ހަމަޔަށް ފޮނުވަންޖެހޭ މައްސަލައެއް އޮތްނަމަ ކޯޓަށްވެސް އެމައްސަލައެއް ހުށަހަޅުއްވާނެކަމަށް ފުއާދު ވިދާޅުވިއެވެ.
ކޮމަންޑޫ ދާިއރާގެ 3 ރަށުގެ އިތުރުން މާލޭގައި ވޯޓުލުން ކުރިއަށްދެއެވެ. ޖުމްލަ 7 ފޮށްޓެއް ކޮމަންޑޫ ދާއިރާގެ އިންތިޚާބުގައި ވޯޓުލުމަށް ބަހައްޓާފައިވެއެވެ. މާލޭގައި 2 ފޮށި، ކޮމަންޑޫގައި 2 ފޮށި، ފޯކައިދޫގައި 2 ފޮށި އަދި މަރޮށީގައި ވަނީ ފޮއްޓެއް ބަހައްޓާފައެވެ. މިއިންތިޚާބުގައި ވޯޓު ދިނުމުގެ ހައްގު ލިބިގެންވަނީ 3،309 މީހުންނެވެ.
މިއިންތިޚާބުގައި އިލެކްޝަންސް ކޮމިޝަނުން މިއަދު މެންދުރުފަހު 2 ޖެހުމައި ހަމައަށް އާންމުކޮށްފައިވާ ތަފާސް ހިސާބުތައް ދައްކާގޮތުން ވޯޓުލުމުގެ ހައްގު ލިބިފައިވާ މީހުގެ ތެރެއިން 2241 މީހަކު ވަނީ ވޯޓުލާފައެވެ. އޭގެ ތެރޭގައި ހިމެނެނީ 1104 ފިރިހެނުންނާއި، 1137 އަންހެނުންނެވެ. މިއީ ވޯޓުލީ މީހުންގެ ނިސްބަތުން ބަލާނަމަ 68 އިންސައްތައެވެ.
14:00 aa hamayah updates pic.twitter.com/NoeV6j6sUJ
— Elections Commission (@ElectionsMv) February 5, 2022
މިއިންތިޚާބުގައި މިތިން ރަށުން ވޯޓުލުމުގެ ހައްގު ލިބިގެންވާ 3،309 މީހުންގެ ތެރޭގައި ހިމެނެނީ ކޮމަންޑޫގެ 1،405 މީހުންނާއި، ފޯކައިދޫގެ 1،201 މީހުންނާއި، މަރޮށީގެން 703 މީހުންނެވެ. މިއިންތިޚާބަކީ ފޯރިގަދަ ކެމްޕެއިނެއްކޮށް ވާދަވެރިކަން ބޮޑުވެފައިވާ އިންތިޚާބަކަށްވާއިރު މިއިންތިޚާބުގެ ނަތީޖާއަށް ގިނަ ބަޔަކު ދަނީ އިންތިޒާރު ކުރަމުންނެވެ. ކޮމަންޑޫ ދާއިރާގެ ގޮނޑި ހުސްވެ، ބައި އިލެކްޝަނެއް ބާއްވަނީ އެ ދާއިރާ ތަމްސީލުކުރެއްވި އެމްޑީޕީގެ މެމްބަރު ޙުސެއިން ވަހީދު އަވަހާރަވުމުންނެވެ. މިއިންތިޚާބުގައި އެމްޑީޕީގެ ފަރާތުން ވާދަކުރައްވަނީ މުޙައްމަދު ރާޝިދެވެ. އިދިކޮޅު ޕީޕީއެމްގެ ކެނޑިޑޭޓަކީ މޫސާ ފަތުހީ އާދާމެވެ. އެމްއެންޕީގެ ފަރާތުން ވާދަކުރައްވަނީ އަބްދުލް ހަންނާން އިދުރީސެވެ.
ވޯޓުލުން ނިމޭނީ މިއަދު ހަވީރު 4 ޖެހުމާއި ހަމައަށެވެ. ނަމަވެސް ކިއުގައި ބަޔަކު ތިބި ނަމަ ވޯޓުލާ ނިމެންދެން ވޯޓުލުން ކުރިއަށްދާނެއެވެ.
