ޕްރެޒިޑެންޓްސް ކަޕް ފުޓްބޯޅަ މުބާރާތުގައި ކްލަބް އީގަލްސް އިން ކްލަބް ގްރީން ސްޓްރީޓްސް ބަލިކުރުމުން، އެޓީމަށް ފައިނަލަށް ދިއުމުގެ އަމިއްލަ ބާރު ގެއްލި، ކްލަބް ވެލެންސިއާ ފައިނަލުގެ ފުރަތަމަ ޖާގަ ކަށަވަރުކޮށްފިއެވެ.
ރަސްމީ ފުޓްބޯޅަ ދަނޑުގައި ކުޅުނު މެޗުން އީގަލްސް މޮޅުވީ 1-4 ގެ ނަތީޖާއަކުންނެވެ.
މިއަދު ހަވީރު އީގަލްސް އަތުން މޮޅުވިނަމަ، ގްރީންއަށް ފައިނަލުން ޖާގައެއް ކަށަވަރުވާނެއެވެ. ނަމަވެސް ބަލިވުމާއެކު ގްރީންއަށް ވަނީ އަމިއްލަ ބާރު ގެއްލިފައެވެ.
ގްރީން އާއި އީގަލްސް ބައްދަލުކުރި މެޗުގައި ފުރަތަމަ ލަނޑު ޖަހާ ލީޑު ނެގީ އީގަލްސްއިންނެވެ. އީގަލްސް އަށް ލީޑު ނަގައިދިން ލަނޑު މެޗުގެ 19 ވަނަ މިނެޓުގައި ކާމިޔާބުކޮށްދިނީ ހަސަން ރާއިފް އަހުމަދުއެވެ. ނަމަވެސް ފުރަތަމަ ހާފް ނިމެން ކައިރިވެފައި ވަނިކޮށް ގްރީން ސްޓްރީޓްސް އިން ވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. މި ލަނޑު ގްރީން އަށް ކާމިޔާބުކޮށްދިނީ އަންސަރު އިބްރާހިމްއެވެ.
މި މެޗުގައި އީގަލްސްގެ ދެވަނަ ލަނޑަކީ ގްރީން ސްޓްރީޓްސްގެ އިބްރާހިމް ހަސީބް ފައިގައި ޖެހިފައި ބައިކޮޅަށް ވަން ލަނޑެކެއެވެ. އީގަލްސްގެ ތިންވަނަ ލަނޑު 66 ވަނަ މިނެޓުގައި ކާމިޔާބުކޮށްދިނީ މި މެޗުގެ މޮޅު ކުޅުންތެރިޔާގެ މަގާމްވެސް ހޯދި ހަސަން ރާއިފް އަހުމަދެއެވެ. އަދި ހަތަރު ވަނަ ލަނޑު 79 ވަނަ މިނެޓުގައި ކާމިޔާބުކޮށްދިނީ، އަހުމަދު ރިޒުވާންއެވެ.
މި ނަތީޖާއާއެކު އީގަލްސް އަތުން ގްރީން ބަލިވުމާއެކު ގްރީންއަށް ވަނީ ފައިނަލަށް ދިއުމުގެ އަމިއްލަ ބާރު ގެއްލިފައެވެ. އަދި މިވަގުތު ތާވަލްގެ އެއްވަނައިގައި އޮތް ވެެލެންސިއާ އަށް ވަނީ ފައިނަލުގެ ޖާގައެއް ކަށަވަރުވެފައެވެ. ފައިނަލުގައި ވެލެންސިއާ އާއި ދެކޮޅަށް ކުޅޭނެ ކްލަބެއް ކަށަވަރުވާނީ މިރޭ މާޒިޔާ އާއި ވެލެންސިއާ ބައްދަލުކުރާ މެޗުގެ ނަތީޖާ ނުކުންނަ ގޮތަކުންނެވެ.
ކޮމެންޓު ފޮނުވާ