ސައުތު ޕެސިފިކް ކަނޑު އަޑީގެ އަލިފާން ފަރުބަދައެއް ގޮވާ، މި ފަރުބަދައިން އަޅި ބޭރުވަމުން ދިއުމާ ގުޅިގެން، ޖަޒީރާ ގައުމެއް ކަމުގައިވާ ޓޮންގާއަށް ސުނާމީގެ އިންޒާރު އާންމު ކޮށްފިއެވެ.
ހުންގާ-ޓޮންގާ-ހުންގާ ހައާޕައި ނަމަކަށް ކިޔާ މި އަލިފާން ފަރުބަދަ އެންމެ ފުރަތަމަ ގޮވަން ފަށާފައިވަނީ ހުކުރު ދުވަހުއެވެ. ރޭޑިއޯ ނިއިޒީލޭންޑުން ރިޕޯޓު ކޮށްފައިވާ ގޮތުގައި، ހުކުރުދުވަހު މި އަލިފާން ފަރުބަދައިން އަރަންފެށި އަޅިތައް ޖައްވުގެ ތެރެއަށް 20 ކިލޯ މީޓަރު މައްޗަށް އަރާފައި ވެއެވެ.
ރޭޑިއޯ ނިއުޒީލޭންޑުން ރިޕޯޓު ކޮށްފައިވާ ގޮތުގައި މި އަލިފާން ފަރުބަދަ އަލުން އަނެއްކާވެސް ވަނީ، ހޮނިހިރު ދުވަހުގެ ހަވީރު 5:26ގައި އަލުން ގޮވަން ފަށާފައެވެ.
މި ފަރުބަދަ ގޮވަމުންދިޔައިރު ނަގާފައިވާ ސެޓްލައިޓް ފޮޓޯތަކުންވަނީ، ބޯދުމުގެ ވިލާތައް މަތީގައި އުފެދިގެން ގޮސްފައި ވަނިކޮށް ފެނިފައެވެ.
މި ފަރުބަދައިން އަރަމުންދާ އަޅިތަކުގެ ސަބަބުން އުފެދިފައިވާ ރާޅުތައް ޓޮންގާގެ ވެރިރަށުގެ އައްސޭރިފަށް ފަހަނައަޅާ، އައްސޭރިފަށާއި ކައިރީގައިވާ މަގުތަކަށް އަރާ، ފެންބޮޑުވުމުގެ ސަބަބުން ތަކެއްޗަށާއި މުދަލަށް ގެއްލުން ލިބިފައިވާ ކަމަށްވެސް މީޑިއާތަކުންވަނީ ރިޕޯޓު ކޮށްފައެވެ.
މި އަލިފާން ފަރުބަދައަކީ ޓޮންގާގެ އިރު ދެކުނުން، ފޮނައުފޯ އައިލޭންޑުގެ 30 ކިލޯ މީޓަރު ދުރުގައި ހުންނަ އަލިފާން ފަރުބަދައެކެވެ. އަދި މި އަލިފާން ފަރުބަދަ ގޮވުމުގެ ސަބަބުން ނެރެފައިވާ ސުނާމީގެ އިންޒާރުގެ އިތުރުން ޓޮންގާގެ މީޓިއޮރޮލޮޖިކަލް ސާވިސްއިންވަނީ، އެގައުމުގެ ބައެއް ރަށްތަކަށް ބޯކޮށް ވާރޭވެހި، އާދަޔާ ޚިލާފަށް ވައިބާރުވެ އަދި އޭގެ އިތުރުން ފެން ބޮޑުވާނެކަމުގެ އިންޒާރުވެސް ދީފައެވެ.
އަދި މީގެ އިތުރުން، ޓޮންގާގެ އަވައްޓެރި ގައުމެއް ކަމުގައިވާ ފިޖީންވެސް ވަނީ އެގައުމުގެ ރަށްތަކުގެ ތެރެއިން ބިންގަޑު ތިރި ހިސާބުތަކުގައި ދިރިއުޅޭ ރަށްތަކަށް ބޮޑެތި ރާޅުތައް އެރުމުގެ ފުރުސަތު ބޮޑުކަމަށް ބުނެ، މި ތަންތަނުގައި ދިރިއުޅޭ ފަރާތްތަކުން އުސްތަންތަނަށް ބަދަލުވުމަށް އިލްތިމާސް ކޮށްފައެވެ.
ރޭޑިއޯ ނިއުޒިލޭންޑުން ރިޕޯޓު ކޮށްފައިވާ ގޮތުގައި، މި އަލިފާން ފަރުބަދައިގެ ހަރަކާތްތައް ވަނީ ފާއިތުވެދިޔަ ޑިސެމްބަރު މަހުގެ 20ވަނަ ދުވަހުން ފެށިގެން އިތުރުވާން ފަށާފައެވެ. އެހެންނަމަވެސް ޖެނުއަރީމަހުގެ 11 ވަނަ ދުވަހުން ފެށިގެން އަނެއްކާވެސް މި ފަރުބަދައިގެން ހަރަކާތްތައް ހުއްޓިފައިވާކަމަށް ވަނީ މައުލުމާތު ދީފައެވެ.
