މާޒިޔާ ބަލިކޮށް ގްރީން ސްޓްރީޓްސް ފައިނަލާ ގާތަށް ޖެހިލައިފި

ޕްރެޒިޑެންޓްސް ކަޕުގައި މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ކްލަބް ގްރީން ސްޓްރީޓްސް މުބާރާތުގެ ފައިނަލާ ގާތަށް ޖެހިލައިފިއެވެ.

މިއަދު ހަވީރު ރަސްމީ ފުޓްބޯޅަ ދަނޑުގައި ކުޅުނު މެޗުގައި މާޒިޔާގެ މައްޗަށް ގްރީން ސްޓްރީޓްސް ކުރިހޯދީ 0-2 ގެ ނަތީޖާއަކުންނެވެ. މިއީ މި ސީޒަންގައި މާޒިޔާ ބަލިވި ފުރަތަމަ ފަހަރެއެވެ. މި ސީޒަނުގައި މި މެޗާއި ހަމައަށް ކުޅުުނު ހުރިހާ މެޗެއްވެސް މާޒިޔާއިން ވަނީ ކާމިޔާބުކޮށްފައެވެ.

މި މެޗު ފަށައިގެން މާޒިޔާއިން ވަނީ ލަނޑެއް ޖަހަން ރަނގަޅު ފުރުޞަތުތަކެއް ތަނަވަސްކޮށްފައެވެ. ނަމަވެސް ވަރަށް އޮގަނައިޒްކޮށް ކުޅެމުންދިޔަ ގްރީންގެ ޑިފެންސް ފޫއަޅުވާލައި ލަނޑެއް ޖެހޭގޮތެއް ނުވިއެވެ. މެޗުގެ ފުރަތަމަ ހާފުގައި ގްރީންގެ  އެންހެލް ކަރަސްކޯސާ މުނޯޒް ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. މި މެޗުގައި ގްރީން ސްޓްރީޓްސް އިން ލަނޑު ޖަހާ ލީޑު ނެގީ ފުރަތަމަ ހާފުގެ އިތުރު ވަގުތުގެ ތެރޭގައެވެ. މި ލަނޑު ގްރީން އަށް ކާމިޔާބުކޮށްދިނީ، ހަސަން ނަޒީމް ގާސިމް (ޗޯޓު) އެވެ.

ދެވަނަ ހާފު ފަށައިގެން ގިނަ ވަގުތު ބޯޅަ ކޮންޓްރޯލްކޮށްގެން ކުޅުނީ މާޒިޔާއިންނެވެ. ނަމަވެސް ދެވަނަ ހާފްގެ 5 ވަނަ މިނެޓުގައި ގްރީން އިން ވަނީ ދެވަނަ ލަނޑެއް ޖަހާ ލީޑު ފުޅާކޮށްފައެވެ. މި ލަނޑު ގްރީން ސްޓްރީޓްސް އަށް ކާމިޔާބުކޮށްދިނީ، ޢަލީ ޝާމިއުއެވެ.

މި ނަތީޖާއާއެކު ކްލަބް ގްރީން ސްޓްރީޓްސް ވަނީ 15 ޕޮއިންޓާއެކު ތާވަލްގެ އެއްވަނައަށް ކުރިޔަށް ޖެހިލާފައެވެ. ދެވަނައިގައި އޮތް ވެލެންސިއާ އާއި ތިންވަނައިގައި އޮތް މާޒިޔާއަށް ވެސް ވަނީ 15 ޕޮއިންޓް ލިބިފައެވެ. ގްރީން ކުރީގައި އޮތީ ލަނޑުގެ ތަފާތުންނެވެ. އެހެންކަމުން މި މުބާރާތުގެ ފައިނަލަށް ދަތުރުކުރާނެ 2 ޓީމު ކަނޑައެޅިގެން ދާނީ މުބާރާތުގެ ފަހު ހަފްތާގެ މެޗުތަކުގެ ނަތީޖާ ނުކުންނަ ގޮތަކުންނެވެ.

ޕްރެޒިޑެންޓްސް ކަޕުގައި މިރޭ ކުޅޭ މެޗުގައި ބައްދަލުކުރާނީ ކްލަބް ވެެލެންސިއާ އާއި ކްލަބް އީގަލްސްއެވެ.