އެމެރިކާގެ ލޮސް އެންޖަލިސްގައި ވެއްޓުނު ކުޑަ މަތިންދާ ބޯޓެއް ރޭލު ދަތުރުކުރާ ޓްރެކްގެ މައްޗަށް ވެއްޓި، ޓްރެކުގައި ޖަހާފައިހުރި ފެންސް މަތީގައި ތާށިވެ، ރޭލު ދަގަޑު މަތީގައި ބާރު ސްޕީޑުގައި ދުއްވަމުން އައި ރޭލު މި ކުޑަ މަތިންދާ ބޯޓާ މުޑި އެރުމުގެ ކުރިން، ލިބުނު މަދު ސިކުންތު ކޮޅެއްގެ ތެރޭގައި، ފުލުހުން، ބޯޓު ތެރޭގައި ތާށީވެފައި އޮތް ޕައިލެޓް ސަލާމަތް ކޮށްފިއެވެ.
ރޮއިޓާސްއިން އެންމެ ފުރަތަމަ އާންމު ކޮށްފައިވާ މި ވީޑިއޯއިން ވަނީ، ލޮސް އެންޖަލިސްގެ ފުލުހުން، ވެއްޓުނު ކުޑަ މަތިންދާ ބޯޓުގެ އެތެރޭގައި ތާށިވެފައި އޮތް ޕައިލެޓް ސަމާލަތް ކުރާ މަންޒަރު ފެނިފައެވެ. އަދި އޭގެ މަދު ސިކުންތު ކޮޅެއްގެ ފަހުން، ރޭލު ދަގަޑު މަތީގައި ބާރު ސްޕީޑުގައި ދުއްވާފައި އައި ރޭލު މި މަތިންދާ ބޯޓާއި މުޑި އަރާ، މަތިންދާ ބޯޓު ފުޑުފުޑު ވެގެންދާ މަންޒަރުވެސް މި ވީޑިއޯގައި ފެންނާން ހުރެއެވެ.
އެމެރިކާގެ ލޯކަލް މީޑިއާތަކުން ރިޕޯޓު ކޮށްފައިވާ ގޮތުގައި، މި ބޯޑު ވެއްޓިފައިވަނީ، ލޮސް އެންޖަލިސްގެ ކައިރި އަވަށެއް ކަމުގައިވާ ޕަކޮއިމާ އަވަށުން ނައްޓާލިތާ ކުޑަ ވަގުތު ކޮޅެއްގެ ތެރޭގައެވެ.
Foothill Division Officers displayed heroism and quick action by saving the life of a pilot who made an emergency landing on the railroad tracks at San Fernando Rd. and Osborne St., just before an oncoming train collided with the aircraft. pic.twitter.com/DDxtGGIIMo
— LAPD HQ (@LAPDHQ) January 10, 2022
"މި މަތިންދާ ބޯޓަށް ރަގަޅަށް އުދުއްސާ ނުގަނެވި، ވެއްޓިފައިވަނީ، ރޭލު ދަގަޑު ދަތުރުކުރާ ހަތަރު އަގޮޅިއަކަށް،" ރޭލާއި މަތިންދާ ބޯޑު މުޑި އަރާ މަންޒަރު ވީޑިއޯކުރި އުމުރުން 21 އަހަރުގެ، މިއުޒިކް އުފައްދާ ޒުވާނެއް ކަމުގައިވާ ލުއިސް ޖިމެނެޒް ބުނެފައި ވެއެވެ. "ރޭލު، މަތިންދާ ބޯޓާ މުޑި އެރުމުގެ ސިކުންތު ކޮޅެއް ކުރިން ފުލުހުންވަނީ ޕައިލެޓް ސަލާމަތް ކޮށްފަ. އަދި ބޯޓު ފުޑުފުޑުވެ ބުރައިގެން ދިޔަ އެތިކޮޅުތަކުން އަހަރެއް ސަލާމަތްވީ ހަމަ ކިރިޔާ."
ފުލުހުން ސަލާމަތް ކުރި ޕައިލެޓަށް ލިބުނު ޒަޚަމްތަކަށް ހޮސްޕިޓަލުގައި މިހާރު ފަރުވާ ދެމުންދާ ކަމަށާއި، އަދި އޭނާގެ ހާލު ރަގަޅުކަމަށް ލޯކަލް މީޑިއާތަކުން ވަނީ ރިޕޯޓު ކޮށްފައެވެ. އަދި ރޭލުގެ އެތެރޭގައި ތިބި އެއްވެސް މީހަކަށް އަނިޔާ ވެފައި ނުވާކަމަށްވެސް ވަނީ ރިޕޯޓު ކޮށްފައެވެ.
ލޮސް އެޖަލިސްގެ ޕޮލިސް ޑިޕާޓްމަންޓުން ޓުވީޓް ކޮށްފައިވާ ބޮޑީކެމްގެ ފޫޓޭޖުން ވަނީ، ގައިގެ އެކި ތަންތަނުން ލޭ އޮހޮރެމުން ދަނިކޮށް، ފުލުހުން މި ޕައިލެޓް ދަމާ މަތިންދާ ބޯޓުގެ ތެރެއިން ނެރުނު މަންޒަރު ފެނިގެން ގޮސްފައެވެ.
ޕޮލިސް ޑިޕާޓްމަންޓުން ކޮށްފައިވާ ޓުވީޓުގައި ބުނެފައިވަނީ، "ފުލުހުންވަނީ، ރޭލު ދަގަޑުގެ މައްޗަށް އެމަޖެންސީކޮށް ލޭންޑު ކުރި ކުޑަ މަތިންދާ ބޯޓުގެ ޕައިލެޓް ސަލާމަތް ކުރުމުގައި، އާދަޔާ ޚިލާފް ހިތްވަރެއް ދައްކާފައި،" ކަމުގައެވެ.
