ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ހަސަން ނަޒީމް ގާސިމް (ޗޯޓު) ގެ ހެޓްރިކާއެކު ކްލަބް ގްރީން ސްޓްރީޓްސް އިން ޓީސީ ސްޕޯޓްސް ކްލަބުގެމައްޗަށް މުހިއްމު މޮޅެއް ހޯދައިފިއެވެ.
ގްރީން ސްޓްރީޓްސް އިން މިރޭ ޓީސީ ބަލިކޮށްފައިވަނީ ފަސެހާކަމާއެކު 1-5 ގެ ނަތީޖާއަކުންނެވެ. މި މޮޅާއެކު ގްރީން އިން ވަނީ މުބާރާތުގެ ފައިނަލަށްދަތުުރުކުރުމަށް ކުރަމުން އަންނަ އުއްމީދު ދަމަހައްޓާފައެވެ.
މި މެޗުގައި ގްރީން ސްޓްރީޓްސްގެ ފަރާތުން ފެނިގެންދިޔަ 5 ލަނޑުގެ ތެރެއިން 2 ލަނޑު ޖެހީ ފުރަތަމަ ހާފުގައެވެ. އެގޮތުން ގްރީންގެ ފުރަތަމަ ލަނޑު 22 ވަނަމިނެޓުގައި ކާމިޔާބުކޮށްދިނީ ހަސަން ނަޒީމް ގާސިމް (ޗޯޓު)އެވެ. ގްރީންގެ ދެވަނަ ލަނޑު ޗޯޓު ކާމިޔާބުކޮށްދިނީ 38 ވަނަ މިނެޓުގައެވެ.
މެޗުގެ ދެވަނަ ހާފް ފަށައިގެން ޓީސީން ވަނީ ކުޅުން ރަނގަޅުކޮށް ކުރިޔަށް ޖެހިގެން ކުޅެން ފަށާފައެވެ. އޭގެ ނަތީޖާއެއްގެ ގޮތުން 66 ވަނަ މިނެޓުގައިޓީސީން ވަނި ލަނޑެއް ޖަހާ ނަތީޖާގެ ފަރަގު ކުޑަކޮށްފައެވެ. މި ލަނޑު ޓީސީއަށް ކާމިޔާބުކޮށްދިނީ، މުހައްމަދު ދާނިޝް އިބްރާހިމްއެވެ. ގްރީން ސްޓްރީޓްސްގެތިންވަނަ ލަނޑަކީ އަންސަރު އިބްރާހިމް ފޮނުވާލި ބޯޅަ ޓީސީގެ އަޖުފާން ފައިގައި ޖެހިފައި ބައިކޮޅަށް ވަން ލަނޑެކެއެވެ. މި މެޗުގައި ހަސަން ނަޒީމް ގާސިމް(ޗޯޓު) އޭނާގެ ހެޓްރިކް ފުރިހަމަކުރީ މެޗުގެ 90 ވަނަ މިނެޓުގައި ކާމިޔާބުކުރި ލަނޑުންނެވެ. އަދި ގްރީންގެ ފަސްވަނަ ލަނޑަކީ އިތުރު ވަގުތުގެ ތެރޭގައި ޗޯޓުގެއެހީތެރިކަމާއެކު އަންސަރު ކާމިޔާބުކޮށްދިން ލަނޑެކެއެވެ.
މި މެޗުގެ މޮޅު ކުޅުންތެރިޔާގެ މަގާމް ހޯދީ ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު)އެވެ.
މިމޮޅާ އެކު ގްރީން ސްޓްރީޓްސް އިން ވަނީ 5 މެޗުން 12 ޕޮއިންޓް ހަމަކޮށްފައެވެ. މި މެޗުން ބަލިވި ޓީސީ ސްޕޯޓްސް ކްލަބަށް 5 މެޗު ކުޅެ ނިމުނުއިރުލިބެނީ، 3 ޕޮއިންޓްއެވެ.
ކޮމެންޓު ފޮނުވާ