ވިމެންސް އިންވިޓޭޝަން ކަޕްގެ ޗެމްޕިއަންކަން ޑޮޓްކޮމް ހޯދައިފި

އެފްއޭއެމް ވިމެންސް އިންވިޓޭޝަން ކަޕް ފުޓްބޯޅަ މުބާރާތުގެ ޗެމްޕިއަންކަން ޑޮޓްކޮމް ސްޕޯޓްސް ކްލަބް ހޯދައިފިއެވެ.

ޑޮޓްކޮމް ސްޕޯޓްސް ކްލަބުން މުބާރާތުގެ ޗެމްޕިއަންކަން ހޯދީ މިއަދު ހަވީރު ޅ.ނައިފަރު ޓާފް ދަނޑުގައި ކުޅުނު ފައިނަލް މެޗުގައި އެޕެކްސް ސްޕޯޓްސް ކްލަބުގެމައްޗަށް 0-1 ގެ ނަތީޖާއަކުން ކުރިހޯދައިގެންނެވެ.

25 ޑިސެމްބަރުން 8 ޖެނުއަރީގެ ނިޔަލަަށް ޅ.ނައިފަރުގައި ކުރިޔަށްގެންދިޔަ މި މުބާރާތުގައި ނައިފަރުގެ 4 ޓީމަކާއި ޅ.ކުރެންދޫ އާއި ޅ.ހިންނަވަރުންޓީމެއް ވަނީ ބައިވެރިވެފައެވެ. ނަމަވެސް ފަހުވަގުތު ހިންނަވަރުގައި ކޯވިޑް-19 ގެ ކޭސްތައް ގިނަ ވުމުގެ ސަބަބުން އެޓީމު ވަނީ މުބާރާތުން ވަކިވެފައެވެ. އެހެންކަމުން މުބާރާތް ކުރިޔަށް ގެންދިޔައީ ފަސް ޓީމުގެ މެދުގައެވެ.

ލީގު އުސޫލުން ކުރިޔަށް ގެންދިޔަ މި މުބާރާތުގެ ފައިނަލަށް އެޕެކްސް ސްޕޯޓްސް ކްލަބް ދަތުރުކުރީ، ޓޭބަލްގެ އެއްވަނަ ޓީމުގެ ގޮތުގައި 9 ޕޮއިންޓްހޯދައިގެންނެވެ. ފައިނަލުގައި ދެން ކުޅުނު ޑޮޓްކޮމް ސްޕޯޓްސް ކްލަބްވެސް 9 ޕޮއިންޓް ހޯދާފައިވާއިރު އެޕެކްސް އަށް ކުރި ލިބެނީ ލަނޑުގެ ތަފާތުންނެވެ.

މިއަދު ހަވީރު ކުޅުނު ފައިނަލް މެޗުގައި ފެނިގެންދިޔަ ހަމައެކަނި ލަނޑު ޖަހާފައިވަނީ މެޗު ނިމެން ވަރަށް ކުޑަތަންވެފައިވަނިކޮށެވެ. މި ލަނޑަކީ ޑޮޓްކޮަމްގެ ޝަހުލާ ނަގައިދިން ކޯނަރު އެޕެކްސްގެ ފާތިމަތު މިއުސާ ފައިގައި ޖެހިފައި ބައިކޮޅަށް ވަން ލަނޑެކެއެވެ.

މުބާރާތުގެ ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދީ ޑޮޓްކޮމް ސްޕޯޓްސް ކްލަބުގެ ޝަހުލާ ތައުފީޤްއެވެ. މުބާރާތުގެ ފެއަރ ޕްލޭ ޓީމަކީ ކުރެންދޫއެފްސީއެވެ. އެންމެ ގިނަ ލަނޑު ޖަހައިގެން ޓޮޕް ސްކޯރާގެ މަގާމް ހޯދީ، އެޕެކްސް ސްޕޯޓްސް ކްލަބުގެ ފާތިމަތު މިއުސާއެވެ.

ޅ.އަތޮޅުގައި ކުރިޔަށް ގެންދިޔަ މި މުބާރާތުގެ އިތުރުން އެފްއޭއެމުން ވަނީ އިންވިޓޭޝަނަލް މުބާރާތްތަކެއް ލ އަތޮޅާއި ހދ. ކުޅުދުއްފުށި އަދި ފުވައްމުލަކުގައިވެސް ބާއްވަން ނިންމައިފައެވެ. އަދި މާލޭގައި ފުރަތަމަ ޑިވިޝަނުގެ އަށް ޓީމުގެ މެދުގައި އަންހެން މުބާރާތުގެ ބައެއް ކުޅޭނެއެވެ. މި 5 ބައިގެ ޗެމްޕިއަނުންމާލޭގައި ފައިނަލް ބުރެއް ކުޅުމަށް ފަހު ރާއްޖޭގެ އަންހެން ޗެމްޕިއަނުން ހޮވާ ގޮތަށް ވަނީ ނިންމާފައެވެ.