މި ސަރުކާރު ވެރިކަމަށް އައުމަށްފަހު، ރާއްޖޭގެ ޚާރިޖީ ސިޔާސަތުގެ ތެރެއިން އެންމެ ބޮޑަށް ފާހަގަވެގެން ދިޔަ އެއް ބަދަކަލީ، ކުރީ ސަރުކާރުން ޗައިނާއާއި ބާއްވަމުން ދިޔަ ވިޔަފާރީގެ ގުޅުމުގެ މިސްރާބު އިންޑިއާއާއި ދިމާލަށް ބަދަލުވެގެން ދިޔަ ދިއުމެވެ.
އަދި ހަމަ އެއާއެކު، ރައީސް ޔާމިންގެ ސަރުކާރާއި އިންޑިއާއާއި ދެމެދު އޮތް ގުޅުން އިންތިހާއަށް އެރު ގޯސްވެފަ އޮތް އޮތުން ނިމުމަކަށް ގެންނަވާ، އިންޑިއާއިއެކު ޚާއްސަ ގުޅުމެއް މިސަރުކާރުން ގާއިމްކުރި ކުރުމުގެ ނަތީޖާއެއްގެ ގޮތުން، ބައެއް ފަރާތަކުން ކުރައްސަވަން ފެއްޓެވި މަންޒަރަކީ ޗައިނާއާއި ރައީސް ސާލިހުގެ ސަރުކާރާ އޮތް ގުޅުން އިންތިހާއަށް ގޯސްވެގެންދާނެ ކަމުގެ މަންޒަރުވެސް މެއެވެ.
އަދި ކުރީ ސަރުކާރުން ޗައިނާ ސަރުކާރުންނާއި އެ ސަރުކާރުގެ ކުންފުނިތަކުންނާއި އަދި ޗައިނާގެ ބޭންކުތަކުން ނަގާފައިވާ ދިގު މުއްދަތުގެ ބޮޑެތި ލޯނުތަކުގެ މައްސަލަ، ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް ބޮޑު މައްސަލައަކަށްވެ، ސީދާ ގޮތެއްގައި ޗައިނާ ސަރުކާރަށް ފާޑު ވިދާޅުވާން ފެއްޓެވުމާއެކު، ރާއްޖޭގައި ކުރިން ހުންނެވި ޗައިނާ ސަފީރާއި ރައީސް ނަޝީދާ ދެމެދު ބަހުގެ ހަމަލާތަށް ތަކުރާރުކޮށް ބަދަލު ކުރަމުން ދިޔަ މަންޒަރަކީ، ގިނަ ބައެއްގެ ޝައުގުވެރިކަން ހުއްޓިގެން ދިޔަ މަންޒަރަކަށް ވެގެންވެސް ދިޔައެވެ.
އަދި ހަމަ އެއާއެކު ވެރިކަންކުރާ ޕާޓީގެ ރައީސް، ސީދާ ގޮތެއްގައި ޗައިނާ ސަރުކާރަށް ފާޑު ވިދާޅުވެ، ޗައިނާއަށް މުހިންމު ބައިނަލް އަގުވާމީ ބޮޑެތި ބައެއް މައްސަލަތަކުގައިވެސް، ޗައިނާއާއި ވާދަވެރިކަން އޮތް އެހެން ބައެއް ގައުމަތަކަށް ފާޅުގައި ތާއީދު ކުރެއްވުމުގެ ނަތީޖާއެއްގެ ގޮތުން، ޗައިނާ ސަރުކާރާ ރައީސް ސާލިހުގެ ސަރުކާ ދެމެދު އޮތް ގުޅުމުން އޭގެ ނޭދެވޭ އަސަރު ފެނިގެންދާނެކަމަށް ވެސް ގިނަ ބަޔަކު ގަބޫލު ކޮށްފައި ވެއެވެ. މި ގޮތުން ފާހަގަވާން އޮތް އެންމެ ބޮޑު އެއް މައްސަލައަކަށް ވެގެން ދިޔައީ، އިނގިރޭސި ހަގުރާމަމަތީ މަނަވަރުތައް، ޗައިނާއިން އެ ކަނޑެއްގެ މިލްކުވެރިކަމަށް ދައުވާ ކުރަމުންދާ ޗައިނާ ކަނޑަށް ވަތް ވަނުމަށް ނަޝީދު ފާޅުގައި ތާއީދުކޮށް ފާއިތުވެދިޔަ އަހަރު ޓުވީޓު ކުރެއްވި މައްސަލައެވެ. ނަޝީދުގެ މި ޓުވީޓަށް ރައްޖޭގައި އޭރުހުންނެވި ޗައިނާ ސަފީރު ޖަވާބު ދެއްވާފައިވާކަންވެސް މިފުރުސަތުގައި ފާހަގަ ކޮށްލަން ޖެހެއެވެ.
އެހެންކަމުން، ރައީސް ސާލިހުގެ ސަރުކާރުން އިންޑިއާއި އެކީ ދަމަހައްޓަމުން އައި ޚާއްސަ ގުޅުމާއި، އަދި ދޭތެރެ ދޭތެރެއިން ނަޝީދު ޗައިނާއަށް އަމާޒު ކުރައްވަމުން ގެންދެވި ފާޑު ވިދާޅުވުންތަކުގެ ނަތީޖާއެއްގެ ގޮތުން، ސީދާ ގޮތެއްގައި ޗައިނާ ސަރުކާރުގެ ބަހެއް މިކަންކަމުގައި ނެތް ނަމަވެސް، މި ސިޔާސަތުތަކުގެ ނުރަގަޅު އަސަރު ކޮންމެވެސް ހައިސިއްޔަތަކުން ދެގައުމުގެ ގުޅުމުގެ ތެރެއިން ފެނިގެން ގޮސްފައިވާކަމުގެ ހެއްކެއްގެ ގޮތުން ފެންނާން އޮތީ، ފާއިތުވދެިޔަ 2 އަހަރެއްހާ ދުވަހުގެ ތެރޭގައި، ކޯވިޑްގެ އާލަމީ ވަބާގައި، ޗައިނާ ސަރުކާރުން ދިވެހި ސަރުކާރަށް ފޯރުކޮށް ދީފައިވާ އެހީތެރިކަމުގެ ކުޑަ ކަމެވެ. އަދި މި ސަރުކާރުގައި، ރާއްޖޭގައި ޗައިނާ ސަރުކާރުން އެހީތެރިވެދޭ ތަރައްގީގެ މާބޮޑެތި މަޝްރޫޢެތަކެއް ކުރިޔަށް ނުދިއުންވެސް މެއެވެ.
ވާންގް ޔީއަށް މަރުހަބާ ވިދާޅުވުމަށް ޝާހިދު ރާއްޖެ ވަޑައިގަތުން!
ޗައިނާގެ ފޮރިން މިނިސްޓަރ އަދި ސްޓޭޓް ކައުންސިލަރ ވާންގް ޔީ އަށް ވެލާނާ އިންޓަރނޭޝަނަލް އެއާޕޯޓުން މަރުޙަބާ ދެންނެވީ ރާއްޖޭގެ ފޮރިން މިނިސްޓަރ އަދި އދ.ގެ ޢާންމު މަޖިލީހުގެ ރައީސް ޢަބްދުﷲ ޝާހިދާއި، ރާއްޖެއަށް ކަނޑައަޅުއްވާފައިވާ ޗައިނާގެ ސަފީރާއި، އެމްބަސީގެ ބޭފުޅުންނާއި، ފޮރިން މިނިސްޓްރީގެ އިސްބޭފުޅުންނެވެ.
އެހެންނަމަވެސް، މިމަރުޙަބާގެ ތެރެއިން އެންމެ ބޮޑަށް ފާހަގަވެގެން ދިޔަ ކަމަކަށް ވެގެންދިޔައީ، ޗައިނާގެ ފޮރިންގ މިނިސްޓަރަށް މަރުޙަބާ ވިދާޅުވުމަށް، ނިއުޔޯކުގައި ހުންނަވާފައި، ޝާހިދު ރާއްޖެ ވަޑައިގަތް ގަތުމެވެ.
އަދި މިމަރުޙަބާގެ ޚާއްސަކަން ވަކީން ބޮޑަށް އިތުރުވެގެން ދިޔައީ، ދާދިފަހުން ބަންގްލަދޭޝްގެ ބޮޑުވަޒީރު ޝެއިޚް ހަސީނާ ރާއްޖެއަށް ކުރެއްވި ރަސްމީ ދަތުރު ފުޅުގައި އެކަމަނާއަށް، ފޮރިންގ މިނިސްޓްރީ ހިންގެވުމާއި ހަވާލުވެ ހުންނެވި، ސްޓޭޓް މިނިސްޓަރ ޚަލީލް މަރުހަބާ ވިދާޅުވެފައި ވަނިކޮށް، ގައުމެއްގެ ލީޑަރަކަށް ސަރުކާރުން އެރުވި އިއްޒަތާއި ޗައިނާގެ ފޮރިންގެ މިނިސްޓްރަށް ވިދާޅުވި މަރުޙަބާއާއި އަޅާ ކިޔާލުމުގެ ފުރުސަތު އޮތުންމުންނެވެ.
އެހެންކަމުން، ޗައިނާގެ ފޮރިން މިނިސްޓަރ އަދި ސްޓޭޓް ކައުންސިލަރ ވާންގް ޔީ އަށް ސަރުކާރުން ވިދާޅުވި މަރުޙަބާއަކީ އާދައިގެ މަރުޙަބާއެއްގެ ގޮތުގައި އެއްވެސް ހައިސިއްޔަތަކުން ބެލެވެން ނެތްއިރު، އދ. އާންމު މަޖިލިހުގެ ރައީސް، އަދި ރާއްޖޭގެ ފޮރިންގ މިނިސްޓަރު އަބުދުﷲ ޝާހިދު ނިއުޔޯކުގައި ހުންނަވާފަ، މިދަތުރު ފުޅަށް ޚާއްސަ ކުރައްވައިގެން ރާއްޖެ ވަޑައިގަތް ގަތުމަކީ ހުރިހާ ގޮތަކުންވެސް ރާއްޖޭގެ ޚާރިޖީ ސިޔާސަތުގެ މިސްރާބު ވަރަށްވެސް ފުރިހަމަޔަށް ރަމްޒު ކޮށްދިން މުހިންމު ކަމެއްގެ ގޮތުގައި ފާހަގަ ކުރަން ޖެހެއެވެ.
ޗައިނާއަކީ ރާއްޖެއަށް މުހިންމު ގައުމެއް! ދަނޑިވަޅަކީ މުހިންމު ދަނޑިވަޅެއް؟
ޗައިނާގެ ފޮރިން މިނިސްޓަރ އަދި ސްޓޭޓް ކައުންސިލަރ ވާންގް ޔީ ރާއްޖެ ވަޑައިގެންނެވި މިދަތުރުފުޅަކީ، ރައީސް ސާލިހުގެ ވެރިކަމުގައި، ފަހުގެ ތާރީޚެއްގައި ޗައިނާ ސަރުކާރުގެ އެންމެ މަތީ ފެންވަރުގެ ވެރިއަކު ރާއްޖެ ވަޑައިގެންނެވި ފުރަތަމަ ފަހަރެވެ. އަދި ވާންގް ޔީގެ މި ދަތުރުފުޅަށް ޚާއްސަކޮށް ޝާހިދު ރާއްޖެ ވަޑައިގަތުމުން، ސަރުކާރުން ޗައިނާ ސަރުކާރަށް ސާބިތު ކޮށްދިން އެއްކަމަކަށް ވެގެންދާނީ، ޗައިނާއަކީ މިސަރުކާރަށް މުހިންމު ބައިވެރިއެއް ކަންކަމީ ކަށަވަރުވެ ޔަގީންވާ ކަމެވެ.
އަދި އެއަށްވުރެވެސް ބޮޑުކޮށް، ޗައިނާގެ ފޮރިންގ މިނިސްޓަރު ރާއްޖެ ވަޑައިގަތް ދަނޑިވަޅުގެ މުހިންމުކަން މި ފުރުސަތުގައި ފާހަގަ ކޮށްލަންޖެހެއެވެ. ކޯވިޑްގެ އާލަމީ ވަބާއާއި ހަގުރާމަކޮށް، ފާއިތުވެދިޔަ 2 އަހަރެއްހާ ދުވަހުގެ ތެރޭގައި، ދުނިހޭގެ ގިނަ ގައުމުތަކެކޭ އެއްފަދައިން ރާއްޖޭގެ އިގުތިސާދުވެސް ވަނީ އިދަޖެހިފައެވެ. ރާއްޖެވަނީ އިގުތިސާދީ ގޮތުންނާއި އަދި އެނޫން ގޮތްގޮތުންވެސް ދުނިޔޭގެ ގިނަ ގައުމުތަކެއްގެ އެހީތެރިކަމަށް ބޭނުންވެފައެވެ.
ހަމަ އެފަދައިން، ޗައިނާ ސަރުކާރުގެ ޚާއްސަ ބައިވެރިއެއްގެ ގޮތުގައި އަދިވެސް އަދިވެސް އޮތް، އިދިކޮޅު ޕީޕީއެމްއިން ގެންދަނީ ރައީސް ޔާމިން ކުރީގައި ހުންނަވާ، ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަށް އަމާޒުކޮށް "އިންޑިއާ އައުޓު"ގެ ނަމުގައި ވަރުގަދަ ކެމްޕޭނެއް ކުރިޔަށް ގެންދަމުންނެވެ.
އެހެންކަމުން، ދުނިޔޭގެ އެންމެ ބޮޑު އެއް ބާރުގެ ގޮތުގައި އޮތް ޗައިނާއަކީ ހުރިހާ ގޮތަކުން ބެލި ކަމުގައިވި ނަމަވެސް، މި މުހިންމު ދަނޑިވަޅުގައި ސަރުކާރަށް މުހިންމު ބައިވެރިއަކަށް ވެގެންދާނޭކަމީ ކަށަވަރުވެ ޔަގީންވާކަމެވެ. އިގްތިސާދީ ގޮތުންނާއި އަދި ސިޔާސީ ގޮތުންވެސް ޗައިނާގެ މުހިންމުކަން މިސަރުކާރަށް މި ދަނޑިވަޅުގައި ކުޑަކަމުގައި ދެންނެވޭކަށް ނެތެވެ.
އެހެންކަމުން، އދ.ގެ ސެކިއުޓީ ކައުންސިލްގައި އެއް މެމްބަރެއްގެ ގޮތުގައި އޮތް ޗައިނާއާއި ގުޅުން ގޯސްވުމަކީ، ރައިސް ސާލިހުގެ ސަރުކާރަށް އޮތް "ޗޮއިސް"އެއްގެ ގޮތުގައި ފެންނާން ނެތް އިރު، ޑިޕްލޮމަސީގެ ހަމަހަމަކަން ކުރިޔަށް ނެރުއްވާ، ޝާހިދު ޗައިނާގެ ސްޓޭޓް ކައުންސިލަރ އަދި ފޮރިންގ މިނިސްޓަރަށް ވިދާޅުވި ހޫނު މަރުޙަބާއިން ސާބިތު ކޮށްދިން، "ޗައިނާއަކީ ރާއްޖެއަށް މުހިންމު ބައިވެރިކަމުގެ މެސެޖް"ގެ ހަގީގީ ފޮނި މޭވާ ފެނިގެންދާނީ ޗައިނާގެ ފޮރިންގ މިނިސްޓަރުގެ ދަތުރުފުޅުގެ ނަތީޖާއިންނެވެ.
