ކުރީގެ ރައީސް އަބްދުﷲ ޔާމީންގެ ވެރިކަމުގައި ވެލާނާ އިންޓަރނޭޝަލް އެއާޕޯޓަށް ގެންނަން ފެއްޓެވި ބޮޑެތި ބަދަލުތަކުގެ ތެރެއިން މަސައްކަތް ފެއްޓެވި އެއާޕޯޓްގެ ވީއައިޕީ އާ ޓާމިނަލް މިއަދު ހުޅުވިގެން ދިއުމުން، ކުރީގެ އިކޮނޮމިކް މިނިސްޓަރ މުހައްމަދު ސައީދުގެ ޝުކުރު ރައީސް ޔާމީނަށް ދަންނަވައިފިއެވެ.
އެއާޕޯޓް ތަރައްޤީކޮށް ޖާގަ ބޮޑުކޮށް، ޒާމަނީ ފެންވަރަށް އެއާޕޯޓް ތަރައްޤީ ކުރުމުގެ މަޝްރޫޢަކީ ރައީސް ޔާމީން އިސްނަންގަވައިގެން ފެއްޓެވި މަސައްކަތެކެވެ. މިއަދު އަލަށް ހުޅުވުނު އެ ޓާމިނަލް ބޭނުން ކުރަން ފަށާފައިވާއިރު އެއްފަހަރާ 95 މީހުންނަށް ހިދުމަތް ދެވޭނެއެވެ.
ރައީސް ޔާމީންގެ ވެރިކަމުގައި މިމަސައްކަތް ކުރުމުގައި އެންމެ އިސްކޮށް ހަރަކާތްތެރިވި، ސައީދު ވިދާޅުވީ މިތަން ހުޅުވިގެން ދިއުމުން އެންމެ ބޮޑު ޝުކުރެއް ހައްގުވަނީ ރައީސް ޔާމީނަށް ކަމަށެވެ. އަދި ސަރުކާރުން ދެންވެސް އޮތްކަމެއް ކުރުމަށް އިތުރު ބަހަނާއެއް ނުދައްކައި، މިމަސައްކަތުގެ ދެވަނަ ބައިގެ މަސައްކަތް ފެށުމަށް ސައީދު ވަނީ ގޮވާލާފައެވެ. ރާއްޖޭގެ ތަރައްޤީއަކީ އަޅުވެތިނުކޮށް ކުރެވޭނެ ކަމެއްކަން ފާހަގަކޮށް ސައީދު ވަނީ ދިވެހިންގެ މިނިވަންކަން މަތީ ދިވެހިންގެ ތަރައްޤީ ކުރެވޭނެ ކަމަށް ވިދާޅުވެފައެވެ.
ރާއްޖޭގެ އިކޮނޮމީއަށް ބޮޑެތި ބަދަލުތަކެއް ގެނެސްދެއްވި ރައީސް، ޔާމީނަށް ޝުކުރު ދަންނަވަން. މި ޓާމިނަލްގެ ދެވަނަ ފޭސް އަވަހަށް ފައްޓަވާ! އަޅުވެތިނުކޮށް ޤައުމު ތަރައްޤީ ކުރެވޭނެ. ޖީއެމްއާރަކީ މާޒީ. ދިވެހިންނަށް ދިވެހިރާއްޖެ ދޫކޮށްލާ.
– ސައީދު ވިދާޅުވިއެވެ.
ކުރީގެ އަކުއާ ރެސްޓޯރަންޓް ހުރި ތަނުގައި މޫދު ފެންނަ ގޮތަށް ހަތަރު ބުރި އަށް ހެދި އާ ވީއައިޕީ އިމާރާތުގައި ޗެކިން ކުރެވޭނެ ފެސިލިޓީ އާއި ކެއުންބުއިމުގެ ހިދުމަތްތަކާއި ފާހާނާގެ އިތުރުން ފެން ވެރޭނެ ގޮތާއި ދެ ޖިންސަށް ވަކިން ނަމާދު ކުރެވޭނެ ގޮތްތައް ވެސް ހުންނާނެ އެވެ. ގާތްގަނޑަކަށް 2،000 އަކަފޫޓުގެ މި ބިލްޑިންގުން ހިދުމަތް މި ވަގުތު ދެނީ އެއް ޕްރައިވެޓް ލޯންޖާ އެކު އެވެ. މި އިމާރާތުގައި ތިން ޕްރައިވެޓް ލޯންޖު ވަނީ ހަދައިފައެވެ.
ވީއައިއޭ ތަރައްގީ ކުރުމުގެ މަޝްރޫއުގެ އަގު ގާތްގަނޑަކަށް އެއް ބިލިއަން ޑޮލަރަށް ވުރެ ބޮޑު ވާނެ ކަމަށް އަންދާޒާ ކުރެވެ އެވެ. މި މަޝްރޫއުގެ ދަށުން ވީއައިއޭގައި 3،400 މީޓަރު ދިގު ރަންވޭއެއް ވަނީ ހަދާފަ އެވެ. އާ ރަންވޭގެ އަގު 373 މިލިއަން ޑޮލަރު — 5.7 ބިލިއަން ރުފިޔާ އަށް އަރައެވެ. އަދި ސައޫދީ ބިންލާދިން ކުންފުންޏަށް އާ ޕެސެންޖަރު ޓާމިނަލް އަޅަން ވަނީ ހަވާލުކޮށްފައެވެ. މީގެ އިތުރުން ކާގޯ ޓާމިނަލް އާއި ތެޔޮ ރައްކާ ކުރާ ނިޒާމުގެ މަސައްކަތް ވެސް ވަނީ ބޮޑުބައި ނިންމާފައެވެ.
ވެލާނާ އިންޓަރނޭޝަނަލް އެއަރޕޯޓުގައި މިހާރު ބޭނުންކުރާ ވީ.އައި.ޕީ ލައުންޖަކީ ޖާގައިގެގޮތުން އެހާ ތަނަވަސް ތަނެއްނޫނެވެ. އަދި ރާއްޖެ އަންނަ ބޭރުގެ މުއްސަނދި ފަތުރުވެރިންނާއި، މަޝްހޫރު ސެލެބްރިޓީންނާއި، ޢިއްޒަތްތެރިންނަށް ބޭނުންވާ ޚިދުމަތް އެންމެ ފުރިހަމަގޮތުގައެއް މިލައުންޖުން ނުލިބެއެވެ. ނަމަވެސް އަލަށް ތަރައްޤީކުރާ ވީ.އައި.ޕީ ޓަރމިނަލަކީ އެންމެފަހުގެ ޒަމާނީ ވަސީލަތްތަކާއެކު ތަރައްޤީކުރާ ތަނެކެވެ.
