ވެލާނާ އިންޓަނޭޝަނަލް އެއާޕޯޓުގެ ވީއައިޕީ/ސީއައިޕީ ޓާމިނަލް މިއަދު ބޭނުން ކުރަން ފަށައިފިއެވެ.
އެމްއޭސީއެލުން ބުނީ މިއަދުގެ ހެނދުނު 6:00 އިން ފެށިގެން އެ ޓާމިނަލް ބޭނުން ކުރަން ފަށާފައިވާއިރު އެއްފަހަރާ 95 މީހުންނަށް ހިދުމަތް ދެވޭނެ ކަމަށެވެ.
މިއަދު ހުޅުވީ ވީއައިޕީ ޓާމިނަލްގެ ފުރަތަމަ ފިޔަވައްސެވެ. އައު ވީ.އައި.ޕީ ޓަރމިނަލްގެ މަސައްކަތްކޮށްފައިވަނީ، އެއަރޕޯޓުގެ އައު ރަންވޭގެ މަސައްކަތްކޮށްފައިވާ ޗައިނާގެ ބެއިޖިން އަރބަން ކޮންސްޓްރަކްޝަން ގްރޫޕް، (ބީ.ޔޫ.ސީ.ޖީ)އިންނެވެ.
އައު ވީ.އައި.ޕީ ޓަރމިނަލް ބޭނުންކުރަން ފެށުމުން، ކުރީގެ ވީ.އައި.ޕީ ލައުންޖު ތަޅާލައި، ވީ.އައި.ޕީ ޓަރމިނަލްގެ ދެވަނަ ފިޔަވަހީގެ މަސައްކަތްތައް ފެށިގެންދާނެ ކަމަށް އެމް.އޭ.ސީ.އެލުން މަޢުލޫމާތުދެއެވެ. ދެވަނަ ފިޔަވަހީގެ މަސައްކަތްތައް ނިމުމުން، އައު ވީ.އައި.ޕީ ޓަރމިނަލްގެ ޖުމްލަ ބޮޑުމިން 6800 އަކަފޫޓަށް އިތުރުވެގެންދާނެއެވެ. އައު ވީ.އައި.ޕީ ޓަރމިނަލް ތަރައްޤީކޮށްފައިވަނީ، ހުޅުލޭ ހުޅަނގު ފަރާތުގައި ކުރިން އަކުއާ ރެސްޓޯރެންޓް ހިންގި ބިމުގައެވެ. މާދަން ހުޅުވުމަށް ހަމަޖެހިފައިވަނީ އައު ވީ.އައި.ޕީ ޓަރމިނަލްގެ ފުރަތަމަ ފިޔަވަހީގެ ދަށުން ތަރައްޤީކޮށްފައިވާ 4 ބުރީގެ ޢިމާރާތެވެ.
Today at 0600hrs we have started the Maamahi Executive Lounge operations at the newly developed phase 1 of the VIP Terminal Building @VelanaAirport pic.twitter.com/jd7SWmdZQe
— Maldives Airports Company Ltd – MACL (@MACLmedia) January 7, 2022
ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު ހަދަން ފެށި ހަތަރުބުރީގެ މި އިމާރާތުގެ އެންމެ ތިރީ ބުރިން ހިދުމަތް ދޭނީ ވީވީއައިޕީ ނުވަތަ ގައުމުގެ އެންމެ އިސްވެރިންނަށެވެ. ފުރަތަމަބުރި އާއި ދެވަނަބުރިން ދޭނީ ވީއައިޕީ އަދި ސީއައިޕީގެ ހިދުމަތެވެ. ހަތަރު ވަނަބުރި ހާއްސަ ކޮށްފައިވަނީ އިދާރީ މަސައްކަތްތަކަށެވެ.
2200 އަކަމީޓަރުގެ ޖާގައިގެ ސަރަޙައްދެއްގައި ތަރައްޤީކޮށްފައިވާ މި އިމާރާތުގައި އެއްފަހަރާއި 95 މީހުނަށް ޚިދުމަތްދެވޭނެކަމަށް އެމްއޭސީއެލުން މަޢުލޫމާތުދެއްވައެވެ. މިހާރު ބޭނުންކުރަމުންދާ ވީ.އައި.ޕީ ޓަރމިނަލުން އެއްފަހަރާ ޚިދުމަތް ދެވެނީ 65 މީހުންނަށެވެ.
ވީއައިއޭ ތަރައްގީ ކުރުމުގެ މަޝްރޫއުގެ އަގު ގާތްގަނޑަކަށް އެއް ބިލިއަން ޑޮލަރަށް ވުރެ ބޮޑު ވާނެ ކަމަށް އަންދާޒާ ކުރެވެ އެވެ. މި މަޝްރޫއުގެ ދަށުން ވީއައިއޭގައި 3،400 މީޓަރު ދިގު ރަންވޭއެއް ވަނީ ހަދާފަ އެވެ. އާ ރަންވޭގެ އަގު 373 މިލިއަން ޑޮލަރު — 5.7 ބިލިއަން ރުފިޔާ އަށް އަރައެވެ. އަދި ސައޫދީ ބިންލާދިން ކުންފުންޏަށް އާ ޕެސެންޖަރު ޓާމިނަލް އަޅަން ވަނީ ހަވާލުކޮށްފައެވެ. މީގެ އިތުރުން ކާގޯ ޓާމިނަލް އާއި ތެޔޮ ރައްކާ ކުރާ ނިޒާމުގެ މަސައްކަތް ވެސް ވަނީ ބޮޑުބައި ނިންމާފައެވެ.
ވެލާނާ އިންޓަރނޭޝަނަލް އެއަރޕޯޓުގައި މިހާރު ބޭނުންކުރާ ވީ.އައި.ޕީ ލައުންޖަކީ ޖާގައިގެގޮތުން އެހާ ތަނަވަސް ތަނެއްނޫނެވެ. އަދި ރާއްޖެ އަންނަ ބޭރުގެ މުއްސަނދި ފަތުރުވެރިންނާއި، މަޝްހޫރު ސެލެބްރިޓީންނާއި، ޢިއްޒަތްތެރިންނަށް ބޭނުންވާ ޚިދުމަތް އެންމެ ފުރިހަމަގޮތުގައެއް މިލައުންޖުން ނުލިބެއެވެ. ނަމަވެސް އަލަށް ތަރައްޤީކުރާ ވީ.އައި.ޕީ ޓަރމިނަލަކީ އެންމެފަހުގެ ޒަމާނީ ވަސީލަތްތަކާއެކު ތަރައްޤީކުރާ ތަނެކެވެ.
