2020ވަނަ އަހަރުގެ ޖެހުނއަރީމަހު، އިރާނުގެ އަސްކަރިއްޔާއިން ދިން މިސައިލް ހަމަލާއެއް އަމާޒުވެގެން ވެއްޓުނު މަތިންދާ ބޯޓުން ދަތުރު ކުރި، އަދި އެހަމަލާގައި މަރުވެފައިވާ ކެނެޑާގެ ރަށްވެހިކަން އޮތް 6 މީހެއްގެ އާއިލާއަށް 84 މިލިއަން ޑޮލަރު އިރާނުން ދައްކަން ޖެހޭނެ ކަމަށް ކެނެޑާގެ ކޯޓަކުން ހުކުން ކޮށްފި ކަމަށް، ކެނޭޑިއަންއިން ޕްރެސް ރިޕޯޓު ކޮށްފިއެވެ.
އިރާނުގެ އަސްކަރިއްޔާއިން، ބިމުން ވަޔަށް ފޮނުވާލި 2 މިސައިލް އަމާޒުވެގެން، ޔޫކްރެއިން އިންޓަރނޭޝަނަލް އެއަރލައިންގެ ފްލައިޓް PS752 ވެއްޓި، އެ ފްލައިޓުން ދަތުރުކުރި 176 މީހުން ވަނީ މަރުވެފައެވެ.
މި ބޯޓުގައި ދަތުރު ކުރަމުންދިޔަ 100 އަށްވުރެ ގިނަ އިރާނުގެ ރައްޔިތުންނަކީ ކެނެޑާގެ ރައްޔިތުކަން އޮތް މީހުންނެވެ. ނަތީޖާއެއްގެ ގޮތުން އޭގެތެރެއިން ބައެއް އާއިލާތަކުން ވަނީ ކެނެޑާގެ ސިވިލް ކޯޓުގައި އިރާނާ ދެކޮޅަށް ދައުވާ ކޮށްފައެވެ.
ފާއިތުވެދިޔަ އަހަރު، ކެނެޑާގެ އޮންޓާރިއޯ ސުޕީރިއަރ ކޯޓުންވަނީ، އިރާނުގެ އަސްކަރިއްޔާގެ ހަމަލާއެއް އަމާޒުވެ މި ބޯޓު ވެއްޓުމުގެ ހާދިސާ "ޓެރަރިޒަމް"ގެ ގިންތިއަށް ފެތޭކަމަށް ނިންމާފައެވެ. ނަތީޖާއެއްގެ ގޮތުން، އިރާނުގެ ގާނޫނުން ލިބިދޭ ހިމާޔަތުން ބޭރުން، ބަދަލު ހޯދުމަށް ދައުވާކުރުމުގެ ފުރުސަތު މި އާއިލާތަކަށް ވަނީ ތަނަވަސް ވެގެން ގޮސްފައެވެ.
އާންމު ގޮތެއްގައި، ގައުމުން ބޭރުގެ މީހުންގެ މައްޗަށް ކެނެޑާގެ ކޯޓުތަކުގައި ދައުވާ ކުރުމުގެ ފުރުސަތު ލިބިފައެއް ނުވެއެވެ.
މި ހަފްތާގެ ހޯމަދު ދުވަހު އިއްވި ހުކުމުގައި ވާގޮތުން، މިއާއިލާތަކަށް، ކުރި ކުށުގެ ބަދަލެއްގެ ގޮތުގައި 100 މިލިއަން ކެނޭޑިއަން ޑޮލަރު ދޭން ހުކުމް ކުރުމުގެ އިތުރުން، ލިބުނު ގެއްލުމުގެ ބަދަލައްގެ ގޮތުން، 107 މިލިއަން ކެނޭޑިއަން ޑޮލަރާއި 7 މިލިއަން ކެނޭޑިއަން ޑޮލަރާ ދެމެދުގެ އަދަދުތަކެއް ނެގުމަށްވެސް ފަނޑިޔާރުވަނީ ހުކުމް ކޮށްފައެވެ. އަދި މީގެ އިތުރުން މިފައިސާގެ އިންޓަރެސްޓަށްވާ ފައިސާވެސް އިރާނުން ދޭން ޖެހޭނަކަމަށް ވެސް މިހުކުމުގައި ވެއެވެ.
"މި ކޯޓަށް އެނގޭ، ބަދަލެއްގެ ގޮތުން، ލިބިދެވޭ ފައިސާއަކީ، ގެއްލިގެންދިޔަ ފުރާތަނަކުގެ އަގު އަދާ ކުރެވޭނެ މިންވަރެއް ނޫންކަން،" ޑިސެމްބަރު 31 ވަނަ ދުވަހުގެ ތާރީޚު ޖަހާފައިވާ ހުކުމްގައި ލިޔެފައި ވެއެވެ.
ވެއްޓުނު ބޯޓުން ދަތުރު ކުރި ބައެއް ފަރާތްތަކުގެ އާއިލާތަކަށް އިރާނުން ބަދަލު ދޭން ޖެހޭނެކަމަށް ކެނެޑާގެ ކޯޓަކުން ހުކުމް ކުރި ނަމަވެސް، މި ބަދަލު އިރާނުން މިއާއިލާތަކުން ހޯދާނެ ގޮތެއް އަދި އެއްވެސް ފަރާތަކުން ހާމަ ކޮށްފައެއް ނުވެއެވެ.
މި ބޯޓު ވެއްޓިފައިވަނީ، އެމެރިކާގެ ޑްރޯން ހަމަލާއެއްގައި އިރާނުގެ އިސް ޖެނެރަލް ގައްސާމް ސުލައިމާނީ އަވަހާރަ ކޮށްލި ހާދިސާގެ ބަދަލު ހިފުމުގެ ގޮތުން އިރާނުގެ އަސްކަރިއްޔާއިން އިރާގުގައި ހުންނަ އެމެރިކާގެ ބޭސްތަކަށް މިސައިލް ހަމަލާތައް ދިންތާ ކުޑަވަގުތު ކޮޅެއްގެ ތެރޭގައި، އިރާނުން ބިމުން ވަޔަށް އުދުއްސާލި މިސައިލެއް މި ބޯޓަށް އަމާޒު ވެގެންނެވެ.
މި ބޯޓު ވެއްޓުމަށްފަހު އެތައް ދުވަހެއް ވަންދެން، އެގައުމުގެ އަސްކަރިއްޔާގެ ހަމަލާއަކުން ބޯޓު ވެއްޓުނުކަމަށް އިންކާރު ކުރުމަށްފަހު، އެންމެ ފަހުން އިރާނުގެ ޕެރަމިލިޓަރީ ރިވޮލިއުޝަނަރީ ގާޑުން ވަނީ މި ބޯޓަށް އަސްކަރިއްޔާގެ ހަމަލާއެއް އަމާޒުވި ކަމަށް އެއްބަސްވެ މާފަށް އެދިފައެވެ. އަދި މިހަމަލާގެ ޒިންމާ ނަގަން ޖެހޭކަމަށް އިރާނުން ބުނެފައިވަނީ، މި ބޯޓަކީ އެމެރިކާގެ ކުރޫޒް މިސައިލެއް ކަމަށް ހީކޮށް މި ބޯޓަށް ހަމަލާ އަމާޒުކުރި ޑިފެންސް އޮޕަރޭޓަރ ކަމަށެވެ.
