ނިމިދިޔަ އޮކްޓޯބަރ މަހު ޖުމްލަ 61،048 ދަތުރުވެރިން ވެލާނާ އިންޓަރނޭޝަނަލް އެއަރޕޯޓް ބޭނުން ކުރި ކަމަށް އެ އެއަރޕޯޓް ހިންގާ އެމްއޭސީއެލުން ބުނެފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން މިއަދު އާންމުކުރި މިދިޔަ މަހުގެ ތަފާސް ހިސާބު ދައްކާގޮތުން، ވީއައިއޭއަށް ޑޮމެސްޓިކާއި އިންޓަރނޭޝަނަލް އެއްކޮށް ޖުމްލަ 31،936 ދަތުރުވެރިން ވަނީ ޖައްސާފައެވެ. އަދި އެއަރޕޯޓުން ފުރާފައިވާ ދަތުރުވެރިންގެ ޖުމްލަ އަދަދަކީ 29،112 އެވެ.
ޖުލައި މަހު ރާއްޖޭގެ ބޯޑަރު ހުޅުވާލިފަހުން ރާއްޖެއަށް ދަތުރުކުރާ ބޭރުގެ ދަތުރުވެރިންގެ އަދަދު މިހާރު މިވަނީ ވަރަށް ބޮޑުތަން އިތުރުވެފައެވެ. އެގޮތުން މިދިޔަ މަހު ރާއްޖެއިން ބޭރުން 25،520 ދަތުރުވެރިން ވީއައިއޭއަށް ވަނީ ޖައްސާފައެވެ. އަދި 22،828 ދަތުރުވެރިން ފުރާފައި ވެއެވެ.
October 2020 stats @VelanaAirport pic.twitter.com/leSeKn5VRH
— Maldives Airports Company Ltd – MACL (@MACLmedia) November 4, 2020
ބޯޑަރު ހުޅުވާލި ނަމަވެސް ރާއްޖެއަށް ދަތުރުކުރާ ގިނަ އެއަރލައިން ތަކުން ދަތުރު ނުފެށުމާއި ކޯވިޑް-19ގެ ސަބަބުން ގައުމުތަކުން ގެންގުޅޭ ރައްކާތެރި ކަމުގެ ފިޔަވަޅު ތަކުގެ ސަބަބުން ރާއްޖެއަށް އަންނަ މީހުންގެ އަދަދު ދައްކޮށް އޮތުމަށްފަހު، މިހާރު މިއަދަދުތަށް ވަނީ އިތުރުވާން ފަށާފައެވެ. އެގޮތުން މައިގަނޑު ގޮތެއްގައި ރާއްޖެއަށް މީހުން ދަތުރުކުރާ ގައުމުތަކުން ކޯވިޑް-19ގެ ފިޔަވަޅުތަކަށް ލުއިދިނުމާއި ރާއްޖެއަށް ދަތުރުކުރާ ގިނަ އެއަރލައިން ތަކަކުން ރާއްޖެ ސެކްޓަރގެ ދަތުރުތައް އަލުން ފަށަމުން ގެންދާތީ މި އަދަދު ދުވަހުން ދުވަހަށް އަންނަނީ އިތުރުވަމުންނެވެ.
މިދިޔަ މަހު 640 އިންޓަރނޭޝަނަލް ފްލައިޓް ވަނީ ވިއައިއޭ ބޭނުންކޮށްފައެވެ. ޖުލައި 15 ގައި ރާއްޖޭގެ ބޯޑަރު ހުޅުވާލި ފަހުން މިހާތަނަށް 16 އެއާލައިނަކުން ރާއްޖެ އަށް ވަނީ އަލުން ދަތުރު ފަށާފައެވެ. އަދި މިއަދަދު ނޮވެމްބަރު މަހުގެ ނިޔަލަށް 18 އަށް އިތުރުވާނެކަމަށް ޓޫރިޒަމް މިނިސްޓަރ ވަނީ ވިދާޅުވެފައެވެ.
