ޔޫވީ ބަލިކޮށް ޕްރެޒިޑެންޓްސް ކަޕުގައި އީގަލްސްގެ ފުރަތަމަ މޮޅު ހޯދައިފި

ޕްރެޒިޑެންޓްސް ކަޕް ފުޓްބޯޅަ މުބާރާތުގައި ޔުނައިޓެޑް ވިކްޓްރީ ބަލިކޮށް ކްލަބް އީގަލްސް އިން މި ސީޒަނުގެ ފުރަތަމަ މޮޅު ހޯދައިފިއެވެ.

މިއަދު ހަވީރު ރަސްމީ ފުޓްބޯޅަ ދަނޑުގައި ކުޅުނު މެޗު އީގަލްސް ކާމިޔާބުކުރީ 2-3 ގެ ނަތީޖާއަކުންނެވެ.

ޕްރެޒިޑެންޓްސް ކަޕުގައި މިހާތަނަށް ކުޅުނު 4 މެޗުގެ ތެރެއިން ފުރަތަމަ ކުޅުނު 3 މެޗުން އީގަލްސް ވަނީ ބަލިވެފައެވެ. އަދި ޔޫވީ މިހާތަނަށް ކުޅުނު 4 މެޗުގެތެރެއިން 2 މެޗުން ބަލިވެފައިވާއިރު، އަނެއް 2 މެޗު ވީ އެއްވަރެއެވެ.

އީގަލްސް އާއި ޔޫވީ ބައްދަލުކުރި މެޗު ފަށައިގެން ފުރަތަމަ ލަނޑު ޖަހާ ލީޑު ނެގީ އީގަލްސް އިންނެވެ. މެޗުގެ 18 ވަނަ މިނެޓުގައި މި ލަނޑު އީގަލްސްއަށްކާމިޔާބުކޮށްދިނީ، އަހުމަދު ހަސަންއެވެ. އީގަލްސް އިން ލަނޑު ޖަހާ ލީޑު ނެގިފަހުން ޔޫވީން ވަނީ ކުޅުން ރަނގަޅުކޮށް ލަނޑު ޖަހާނެ ފުރުޞަތުތައްތަނަވަސްކޮށްފައެވެ. ނަމަވެސް ފުރަތަމަ ހާފް ނިންމާލަން ޖެހުނީ ލަނޑެއް ނުޖެހިއެވެ.

ދެވަނަ ހާފް ފަށައިގެން މާގިނައިރުތަކެއް ނުވަނީސް ޔޫވީން ވަނީ ނަތީޖާ ހަމަހަމަކޮށްފައެވެ. މެޗުގެ 48 ވަނަ މިނެޓުގައި މި ލަނޑު ޔޫވީއަށް ކާމިޔާބުކޮށްދިނީ،ބައްސާމްއެވެ. ނަމަވެސް 68 ވަނަ މިނެޓުގައި އަނެއްކާވެސް އީގަލްސްގެ އަލީ އަޒްވާން ވަނީ ލަނޑެއް ޖަހާ އީގަލްސްއަށް ދެވަނަ ފަހަރަށް ލީޑު ނަގައިދީފައެވެ. މި މެޗުގައި ދެވަނަ ފަހަރަށް ޔުނައިޓެޑް ވިކްޓްރީ އަށް ނަތީޖާ ހަމަހަމަކޮށްދިނީ މެޗުގެ 80 ވަނަ މިނިޓްގައި ޖެހި  ޕެނަލްޓީ އަކުން އަލީ އާރިފް (ބަކާ) އެވެ. 2-2 ގެ ނަތީޖާއަކުން އެއްވަރުވެގެން މެޗު ނިމެންދަނިކޮށް އީގަލްސް މޮޅުކޮށްދިން ލަނޑު 89 ވަނަ މިނެޓުގައި ކާމިޔާބުކޮށްދިނީ، ހަސަން ރާއިފް އަހުމަދު(ހަންނަ) އެވެ.

މިއަދުގެ މެޗުން މޮޅުވެ، އީގަލްސް އިން މި ވަނީ ސީޒަނުގެ ފުރަތަމަ މޮޅު ހޯދާ ޕްރެޒިޑެންޓްސް ކަޕްގެ ލީގު ބުރުގެ ހަ ވަނަ އަށް ޖެހިލައިފަ އެވެ. އެއީ ހަތަރު މެޗުންތިން ޕޮއިންޓާ އެކު އެވެ. ޔުނައިޓެޑް ވިކްޓްރީ އޮތީ ހަތަރު މެޗުން ޕޮއިންޓެއް ހޯދައިގެން ލީގުގެ ފުލުގަ އެވެ. ހަތް ވަނައިގައި އޮތީ ތިން މެޗުން ޕޮއިންޓަކާ އެކުއޮތް ދަ ގްރާންޑޭ އެވެ.