އެމެރިކާގެ ޑިފެންސް ސެކެޓްރީ ލޮއިޑް އޮސްޓިން ކޯވިޑަށް ޕޮޒިޓިވް ވެއްޖެއެވެ.
ކޯވިޑަށް ޕޮޒިޓިވް ވުމާއި ގުޅުގެން އޮސްޓިން ނެރުއްވި ބަޔާނެއްގައި ވިދާޅުވެފައިވަނީ، އޭނާވަނީ ފާއިތުވި އޮކްޓޯބަރު މަހު، ވެކްސިންގެ ދެޑޯޒް ފުރިހަމަކޮށް އަދި ބޫސްޓަރ ޑޯޒްވެސް ޖައްސަވާފައި ކަމުގައެވެ. އަދި އޭނާގެ ކިބައިން ކޯވިޑްގެ އަލާމާތްތައް ފެންނަމުންދަނީ ވަރަށް އާދައިގެ މިންވަރަކަށް ކަމަށްވެސް އޭނާގެ ބަޔާނުގައި ވިދާޅުވެފައި ވެއެވެ.
އޮސްޓިން ވިދާޅުވި ގޮތުގައި ކޯވިޑަށް ޕޮޒިޓިވް ވުމާއި ގުޅިގެން، އެމެރިކާގެ ސެންޓަރ ފޯރ ޑިސީސް ކޮންޓްރޯލް އެންޑް ޕްރިވެންޝަންއިން އާންމު ކޮށްފައިވާ ގައިޑްލައިންތަކާއި އެއްގޮތްވާ ގޮތުގެމަތިން، ކުރިޔަށް އޮތް 5 ދުވަހު އޭނާ ހުރިހާ ބައްދަލުވުން ތަކެއްގައިވެސް ބައިވެރިވެ ވަޑައިގަންނަވާނީ އޮންލައިން ކޮށެވެ.
"މަގާމުގެ މަސްއޫލިއްޔަތުން އަދާކުރަންޖެހޭ ހުރިހާ ޒިންމާއެއް އަދާކުރަމުން ދާންނަ،" އޭނާ ވިދާޅުވިއެވެ. "ޑެޕިއުޓީ ސެކެޓްރީ ހިކްސް އެހެން ހުރިހާ ކަމެއްގައި އިސްކޮށް އުޅުއްވާނެ."
އޮސްޓިން ވިދާޅުވި ގޮތުގައި އޭނާ ގަބޫލު ކުރައްވާ ގޮތުގައި، އޭނާ ކޯވިޑަށް ޕޮޒިޓިވް ވެފައިވަނީ، އެމެރިކާގެ ރައީސް ޖޯ ބައިޑްންއަށް އޭނާގެ ފަރާތުން ވައިރަސް ވާސިލް ވެދާނެ ފަދަ ވަގުތެއްގައެއް ނޫނެެވެ.
އޭނާ ވިދާޅުވި ގޮތުގައި، ރައީސް ބައިޑްންއާއި އޭނާ އެންމެ ފަހުން ބައްދަލު ކުރައްވާފައިވަނީ ފާއިތުވި ޑިސެމްބަރު މަހުގެ 21ވަނަ ދުވަހުއެވެ. އެއީ، ކޯވިޑަށް ޝައްކު ކުރެވޭ އަމާތްތައް އޭނާގެ ހަށިގަޑުން ފެނިގެން ކޯވިޑަށް ޓެސްޓު ކުރުމަށް ބޭނުން ވުމުގެ އެއް ހަފްތާ ކުރިއެވެ. އަދި އޮސްޓިން ވިދާޅުވި ގޮތުގައި އޭރު އޭނާ ހުންނެވީ ޗުއްޓީގައި ގޭގައެވެ.
އިތުރަށް އޭނާ ވިދާޅުވި ގޮތުގައި، ބައިޑްންއާއި ބައްދަލު ކުރެއްވި ދުވަހު އޭނާވެސް ހުންނެވީ މާސްކު އަޅުއްވައިގެން، އަދި ހުންނެވީވެސް އެކަށިގެންވާ ދުރުމިނެއްގައި ކަމުގައެވެ.
