ފައިސާގެ ދަހިވެތިކަން މާބޮޑުވެއްޖެނަމަ އެބައެއްގެ ތެރޭގައި އަދަބެއް އަޚުލާގެއް މުހިންމު ނުވާނެކަމަށް ދީނީ އިލްމުވެރިޔާ ޝައިޚު އަލީ ޒާހިރު ވިދާޅުވެއްޖެއެވެ.
ޖަމްއިއްޔަތުލް ސަލަފަށް ނިސްބަތްވާ ޝައިޚު އަލީ ޒާހިރު މިފަދައިން ވިދާޅުވީ، ރަށްރަށުގައި މީހުން ދިރިއުޅޭ ރަށްތަކުގައި "ހޯމް ސްޓޭ" ޓުވަރިޒަމް ތަޢާރަފްކޮށް އެކަން ފުޅާކުރުމަށް ސަރުކާރުން މަސައްކަތް ފަށާފައިވާ ދަނޑިވަޅެއްގައެވެ. އަދި މިކަމާއި ދެކޮޅަށް ސަލަފް ޖަމްއިއްޔާއިންވަނީ އިއްޔެ ބަޔާނެއްވެސް ނެރެފައެވެ. ދީނީ ގިނަ އިލްމުވެރިން ހޯމް ސްޓޭ ޓުވަރިޒަމާއި، ދެކޮޅު ހަދަމުންދާއިރު، ޝައިޚު އަލީ ޒާހިރު ވިދާޅުވީ ފައިސާއަކީ ހުރިހާ އެއްޗެއްކަމަށް ދެކެން ވެއްޖެނަމަ އެކަމުގެ ގެއްލުން ބޮޑުވާނެކަމަށެވެ.
ބައެއްގެ ހިތްތަކުގައި ރުފިޔާ، ފަސާގެ ދަހިވެތިކަން މާބޮޑުވެއްޖެނަމަ އެބަޔަކަށް އަދަބެއް އަޚުލާގެއް މުހިންމެއް ނުވާނެއެވެ.
– ޝައިޚު އަލީ ޒާހިރު ބިން ސައީދު ވިދާޅުވިއެވެ.
ހޯމް ސްޓޭއާއި ދެކޮޅަށް ސަލަފުން ނެރުނު ބަޔާނުގައި ބުނެފައިވަނި ގެސްޓުހައުންގެ ގޮތުގައި ފަރުތުވެރިންނަށް ޚިދުމަތް ދިނުމަށް ވަކިވަކި ތަންތައް ހަދައި ހިންގަމުންދިޔުމުގެ ސަބަބުން ރަށްރަށުގައި މުންކަރާތައް ޢާންމުވަމުންދާއިރު، މީހުން ދިރިއުޅޭ ގޭގޭ ތެރޭގައި މިކަން ތަޢާރަފު ކުރުމަކީ އޭގެ ސަބަބުން އެބައެއްގެ ޙިމާޔަތާއި ރައްކާތެރިކަމުގައި އަޅުގަނޑުމެންގެ ޖާނާއި މާލުން ޤުރުބާންވާންޖެހޭ، އަޅުގަނޑުމެން އަހުލުންނާއި، ދަރިންގެ ޢިއްފަތާއި،އަބުރުގެއްލި،ޢާއިލާތައް ރޫޅި، މިޤައުމުގެ އިސްލާމީ ޘަޤާފަތް ގެއްލިގެން ދާނެކަމެއްކަމެއްކަމަށް ސަލަފުން ވަނީ ބުނެފައެވެ.
ވީއިރު، ފައިސާގެ ދަހިވެތިކަމުގައި، އެމީހެއްގެ ލޯބިވާ އަނބިމީހާ ނުވަތަ ފިރިމީހާ ނުވަތަ ލޯބިވާ އަންހެން ނުވަތަ ފިރިހެން ދަރިފުޅާއެކު، އެއްވެސް ހުރަސްވެރިކަމެއްނެތި، އެއް ސިޓިން ރޫމުގައި، އެއް އުނދޯލީގައި އެއްތަށިމަތީގައި، ހީސަމާސާކޮށް ހަނގާކުރެވޭ ބައެއްގެ ގޮތުގައި، އަޅުގަނޑުމެންގެ ދީނާއި، އަޚުލާޤާއި ޘަޤާފަތާ ބީރައްޓެހި، ބޭރުކަރަކަރައާއި ވިލާތުގެ މީސްމީހުންގެ އަތްމައްޗަށް ދޫކޮށްލުމީ ހަމަކަށަވަރުންވެސް އަޅުގަނޑުމެން ދައްޔޫސުންގެ ގޮތުގައި ހިމެނިގެންދާނެ ކަމެއްކަން ކަށަވަރު. އަދި އެއީ އަޅުގަނޑުމެން ކޮންމެ ފަރުދަކާ މާތް ﷲ ގެ ޝަރީޢަތުން މަތި ކުރައްވާފައިވާ ޝަރުޢީ ޒިންމާ ބޮލާލައި ޖެހުންކަމުގައި ނޫނީ ނުވާނެ.
– ސަލަފުން ބުނެފައިވެއެވެ.
އެހެންކަމުން ހޯމްސްޓޭ ތަޢާރަފްކުރުން ހުއްޓާލުމަށް ސަލަފުން ވަނީ ސަރުކާރަށް ގޮވާލާފައެވެ. އަދި ދަނޑުވެރިކަމާއި މަސްވެރިކަމާއި ކުދިފަންތީގެ އެހެނިހެން ވިޔަފާރިތައް ފުޅާކޮށްދިނުމަށް ސަރުކާރުން އިސްނެގުމަށް ވަނީ އިލްތިމާސް ކުރައްވާފައެވެ. އަދި ހަމަ މި ފުރުޞަތުގައި ލިބޭ މާލީ މަންފާއަށް ޓަކައި ދަރިންގެ މުސްތަޤްބަލު ނުރައްކަލުގެ ތެރެއަށް ވައްޓާނުލުމަށް އެންމެހައި ދިވެހި ރައްޔިތުންނަށް ޖަމްޢިއްޔަތުއްސަލަފުން ވަނީ ގޮވާލާފައެވެ.
