ކޯވިޑާއި ދެކޮޅަށް ސަރުކާރުން ކުރާ މަސައްކަތުގެ ތެރެއިން، މިޙާލަތުގައި އިސް ސަފުގައި މަސައްކަތްކުރާ މީހުންނަށް ދޭ ފްރަންޓްލައިން އެލަވަންސް އައިޖީއެޗްގައި މަސައްކަތް ކުރާ ޑޮކްޓަރުންނާއި ނަރުހުންނަށް ނުލިބޭ މައްސަލާގައި އިހުތިޖާޖުކޮށްފިއެވެ.
އައިޖީއެމްއެޗްގެ ނަރުހުން އިއްޔެ އިހުތިޖާޖު ކުރަން ފަށާފައިވާއިރު، ޑޮކްޓަރުންވެސް ވަނީ މި އިހުތިޖާޖުގައި މިއަދު ބައިވެރިވެ އައިޖީއެމްއެޗްގެ އެޗްއާރު އޮފީސް ކުރިމަތީގައި އިހުތިޖާޖުކޮށް، އެލަވެންސް ނުލިބޭ ސަބަބު އޮޅުން ފިލުވައި ދިނުމަށް އެދިފައެވެ.
އައިޖީއެމްއެޗުގެ އެޗްއާރް އޮފީސް ދޮށަށް 21 ޑޮކްޓަރުންނާއި 64 ނަރުހުން މިއަދު ވަނީ އެއްވެފައެވެ. މިމަހުގެ މުސާރަ ޖަމާވިއިރު، ބައެއް ނަރުހުންނަށާއި، ޑޮކްޓަރުންނަށް 70،000 އަށްވިރެ މަތިން އެލަވެންސް ޖަމާވިއިރު، އެއްވެސް އެއްޗެއް ނުލިބޭ މީހުންވެސް އެބަތިއްވެ. މިމައްސަލާގައި އައިޖީއެމްއެޗުން ބުނެފައިވަނީ އެލަވެންސް ނުލިބުނު ފަރާތްތަކަށް އެލަވެންސް ނުލިބުނީ ބަނޑޭރި ޕޯޓަލްއަށް ފޮނުވަން ޖެހޭ ލިޔެކިޔުންތައް ނުފޮނުވާ ހުރުމުން ދިމާވި ކަމެއް ކަމަށް އޭރު ޖަވާބު ދިންކަމަށެވެ.
ފިނޭންސް މިނިސްޓްރީ އަށް ފޮނުވަންޖެހޭ ޑޮކިއުމަންޓްތައް ފޮނުވުމުގައި ނަރުހުން ގޮސް އަމަލީ ގޮތުން މިހާރު އެހީތެރިވާ ކަމަށް އެނގިފައިވެއެވެ. ކޯވިޑްގެ ހާލާތުގައި މިހާރުވެސް އެންމެ ބުރަ މަސައްކަތްތަކެއް ކުރަމުންދަނީ ޑޮކްޓަރުންނާއި، ނަރުހުންނެވެ.
ކޯވިޑް-19އާ ދެކޮޅަށް ރާއްޖެއިން ކުރާ މަސައްކަތުގައި އެންމެ ކުރީ ސަފުގައި ހަރަކާތްތެރިވާ މީހުންނަށް ޚާއްސަ ރިސްކް އެލަވަންސެއް ދޭން ނިންމާފައިވާކަން ސަރުކާރުން އިޢުލާންކުރައްވާފައި ވަނީ މިދިޔަ އަހަރުގެ މެއިމަހުގެ ތެރޭގައެވެ. އެގޮތުން ފްރަންޓްލައިންގައި މަސައްކަތްކުރާ މީހުންނަށް އެލަވަންސް ދިނުމަށް ނިންމާފައިވަނީ ހައި ރިސްކް މީހުންނަށް ދުވާލަކަށް 500 ރުފިޔާ އަދި މީޑިއަމް ރިސްކު މީހުންނަށް ދުވާލަކަށް 250 ރުފިޔާ އަދި އެންމެ ލޯ ރިސްކް މީހުންނަށް ދުވާލަކަށް 200 ރުފިޔާގެ މަގުންނެވެ.
ކުރީ ސަފުގައި މަސައްކަތްކުރާ ހައި ރިސްކު މީހުންނަކީ ކޯވިޑް-19އަށް ޕޮޒިޓިވްވާ މީހަކާއި ނުވަތަ ބަލި ހުރެދާނެކަމަށް ބެލެވޭ ހައި ރިސްކު މީހުންނާއި ތަކެއްޗާ ގާތުން ދިމާވެދާނެ މީހުންނެވެ. އޭގެތެރޭގައި ހިމެނެނީ މެޑިކަލް ޑޮކްޓަރުންނާއި، ނަރުހުންނާއި، ޓެސްޓު ސާމްޕަލް ނަގާ މީހުންނާއި، ލެބް ޓެކްނީޝަނުންނާއި، ކޯވިޑަށް ޕޮޒިޓިވްވާ މީހުން އެއްތަނުން އަނެއް ތަނަށް ގެންދާ އުޅަނދުތަކުގައި މަސައްކަތްކުރާ މީހުންނާއި ޕޮޒިޓިވްވާ މީހުން ތިބޭ ކޮޓަރި ނުވަތަ ވޯޑަށް ވަންނަންޖެހޭ މީހުންނެވެ.
މީޑިއަމް ރިސްކު މީހުންނަކީ ކޯވިޑް-19އަށް ޕޮޒިޓިވްވާ މީހުންނަށް ސީދާގޮތުން ޚިދުމަތް ދޭން ނުޖެހުނުނަމަވެސް ހައި ރިސްކު މީހުންނާއެކު ސީދާ މަސައްކަތް ކުރަންޖެހޭ މީހުންނެވެ. ލޯ ރިސްކު މީހުންނަކީ އެއްވަނަ އަދި ދެވަނަ ގިންތިއަށް ނުފެތޭ ނަމަވެސް ކޯވިޑް-19ގެ އޮޕަރޭޝަންތަކުގައި މަސައްކަތްކުރާ މީހުންގެ ތެރެއިން ދުވާލެއްގެ މައްޗަށް 6 ގަޑިއިރަށްވުރެ ގިނައިރު ހޭދަކުރާ މީހުންނެވެ.
