ކ.ގުޅިފަޅު ކައިރިއަށް ބޯވަ ހިފަންދިޔަ "ޖަންނު" ނަމަކަށްކިޔާ ކުޑަ ލޯންޗަކުން މޫދަށް ފޭބި އުމުރުން 21 އަހަރުގެ ދިވެހި ފިރިހެނަކު ގެއްލިގެން، އެމީހާ ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ހުއްޓުމެއްނެތި ކުރަމުންދާކަމަށް ކޯސްޓް ގާޑުން ބުނެފިއެވެ.
މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ)އަށް ލިބިފައިވަނީ މިއަދު 08:58 ހާއިރުއެވެ. މި މީހާ ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑްގެ ޑައިވަރުން މިހާރު ވެސްދަނީ ހަރަކާތްތެރިވަމުންނެވެ.
އެމްއެންޑީއެފުން ބުނެފައިވަނީ ގެއްލިގެން ހޯދަމުންދަނީ ހދ.ކުމުންދޫ، އަރާއިރު، ޝަރީހު ހަސަން (21)އ ކަމަށެވެ. އެމްއެންޑީއެފް ކޯސްޓްގާޑަށް މަޢުލޫމާތު ލިބިފައިވާ ގޮތުގައި، ގުޅީފަޅުގެ ހުޅަނގުދެކުނު ކަންމަތީގައި ބޯވަ ހިފަން އުޅެނިކޮށް މީނާ އޮޔާ ދަމައިގަތީ ވާދޫ ކަނޑުތެރެއަށް ހުޅަނގަށް ވާގޮތަށެވެ. އެންމެފަހުން މީނާ ލައިގެންހުރީ އަޅިކުލައިގެ ޓީޝާޓަކާއި ކަޅުކުލައިގެ ސޯޓެއްކަމަށާއި އަދި ނޫކުލައިގެ މާސްކެއް އަޅާފައި ހުރިކަމަށް ކޯސްޓްގާޑަށް ވަނީ މަޢުލޫމާތު ލިބިފައިކަމަށެވެ.
މީނާއާއި ބެހޭ އެއްވެސް ޚަބަރެއް ވޭތޯ މިސަރަހައްދުން ދަތުރުކުރާ އުޅަނދުފަހަރުންނާއި މި ހިސާބުގެ ރަށް ތަކުން ބަލައިދެއްވުން އެދެމެވެ. އަދި މީނާއާއި ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކުރައްވާ ކޯސްޓްގާޑްގެ ހިލޭ ގުޅޭ ނަމްބަރ 191 އަށް ފޯނަށް ގުޅުއްވައި ދެއްވުމަށް ވަނީ ދަންނަވާފައެވެ.
