އިރާނުގެ ޤުދުސް ފޯސްގެ ކޮމާންޑަރު ގައްސާމް ސުލާމާނީ އަވަހާރަ ކޮށްލެވުނުތާ 2 އަހަރު ފުރުން ފާހަގަ ކުރުމަށް އިރާނުން ތައްޔާރުވާން ފަށާފައިވާއިރު، އޭނާގެ މަރުގެ ޒިންމާ އެމެރިކާގެ މިހާރުގެ ސަރުކާރުންވެސް އުފުލަން ޖެހޭނެ ކަމުގައި އިރާނުން ބުނެފިއެވެ.
އިރާނުގެ އެލީޓް ރިވޮލިއުޝަނަރީ ގާރޑުގެ، ގައުމުން ބޭރުގެ އޮޕަރޭޝަންތަކާބެހޭ ޤުދުސް ފޯސްގެ އެންމެ އިސް ކޮމާންޑަރު ގައްސާމް ސުލައިމާނީ އަވަހާރަ ކޮށްލާފައިވަނީ، 2020ވަނަ އަހަރުގެ ޖެނުއަރީމަހުގެ 3 ވަނަ ދުވަހު، އެމެރިކާގެ އޭރުގެ ރައީސް ޑޮނަލްޑް ޓްރަމްޕް އޯޑަރަށް ސުލައިމާނީއަށް އަމާޒުކޮށް ދިން ޑްރޯން ހަމަލާއެއްގައެވެ.
މިހަމަލާގައި ސުލައިމާނީ އަވަރާވުމާއިއެކު، މެދުރިއުމަތީގައި ހަނގުރާމައި ބިރުވެރިކަން އިންތިހާއަށް އުފެދިގެން ގޮސްފައި ވެއެވެ.
ސުލައިމާނީ އަވަހާރަ ކޮށްލާފައިވަނީ، ބަޢުދާދު އެއަރޕާޓުން ވަޑައިގަންނަވަނިކޮށް، އިރާގުގެ ފެލްޓިނެންޓެއް ކަމުގައިވާ އަބޫ މަހުދީ އަލް މުހަންދިސްއާވެސް އެކީއެވެ.
"މި ބައިނަލް އަގިވާމީ ފެންވަރުގެ ޖަރީމާގެ ޒިންމާ އެމެރިކާގެ ސަރުކާރުން އުފުލަން ޖެހޭނެ،" ސުލައިމާނީ އަވަހާރަ ކޮށްލެވުނުތާ ދެއަހަރު ފުރުން ފާހަގަ ކުރުމުގެ ގޮތުން އިރާނުގެ ފޮރިންގ މިނިސްޓްރީގެ ޓުވިޓަރ ހޭންޑްލްއިން އާންމުކުރި ބަޔާނެއްގައި ބުނެފައި ވެއެވެ.
ސުލައިމާނީ އަވަހާރަ ކޮށްލެވުނުތާ 5 ދުވަސްފަހުން އިރާނުންވަނީ، އިރާގުގެ އައިން އަލް އަސަދު އާއި އިރާގުގެ އުތުރުގެ އަރުބިލްގައި އެމެރިކާ ސިފައިން ތިބޭ ބޭސްތަކަށް މިސައިލް ހަމަލާތައް ދީފައެވެ.
މި ހަމަލާތަކުގައި އެމެރިކާ ސިފައިންގެ އެއްވެސް މީހަކު މަރުވެފައި ނުވިނަމަވެސް، ވައިޓްހައުސްއިން ބުނެފައިވަނީ، މިހަމަލާތަކުގެ ސަބަބުން މި ބޭސްތަކުގައިތި އެމެރިކާ ސިފައިންނަށް ނަފްސާނީ މައްސަލަތަށް ކުރިމަތި ވެގެންދިޔަ ކަމަށެވެ.
ސުލައިމާނީ އަވަހާރަ ކޮށްލުމަށްފަހު އެމެރިކާގެ އޭރުގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ، މިހަމަލާ ދީފައިވަނީ، އިރާގުގައި ހުރި އެމެރިކާގެ މަސްލަހަތުތަކަށް ދީފައިވާ ހަމަލާތަކުގެ ބަދަލު ހިފުމުގެ ގޮތުން ކަމުގައެވެ.
މިހަފްތާގެ ހުކުރުދުވަހު އިރާނުންވަނީ، އެއް ހަފްތާގެ މުއަދަތަށް ދިގުދެމުގެންދާނެ، ސުލައިމާނީގެ ހަދާންތައް އާކުރުމުގެ ހަރަކާތްތައް ފަށާފައެވެ. އިރާނުގެ އިދާރާތަކުން ބުނެފައިވަނީ، ސުލައިމާނީގެ ހަނދާނުގައި ބޭއްވޭ އެންމެ ޚާއްސަ އިވެންޓް ބޭއްވިގެން ދާނީ، އަންނަ ހޯމަ ދުވަހު ކަމަށެވެ. އަދި ޖެނުއަރީ މަހުގެ 7ވަނަ ދުވަހުމ އިރާނުގެ އަސްކަރިއްޔާއަށް ލިބިފައިވާ މިސައިލްގެ ގާބިލްކަން ދައްކާލުމެއް އޮންނާނެކަމަށްވެސް އެގައުމުގެ އިދާރާތަކުން ވަނީ ހާމަ ކޮށްފައެވެ.
އިރާނުގެ ރިވޮލިއުޝަނަރީ ގާޑް ކޯޕްސްގެ، ގައުމުން ބޭރުގައި ހިގާ ހަރަކާތްތަކާ ބެހޭ ގޮފި، ޤުދުސް ފޯސްގެ ލީޑަރ ގައްސާމް ސުލައިމާނީ އަވަހާރަ ކޮށްލުމާއެކު، އީރާނުގެ ރޫހާނީ ލީޑަރު ޚާމަނާއީ ވަނީ، ސުލައިމާނީގެ މަރުގެ ބަދަލު އެމެރިކާގެ ކިބައިން ހިފާނެކަމުގެ އިންޒާރު ދީފައެވެ. އަދި އީރާނުގެ އޭރުގެ ރައީސް ހަސަން ރޫހާނީ ވިދާޅުވެފައިވަނީ، ސުލައިމާނީގެ މަރުގެ ޒިންމާ އުފުލަން ޖެހޭނީ ހަމައެކަނި އެމެރިކާގެ ރައީސް ޑޮނަލްޑް ޓްރަމްޕް ނޫން ކަމަށާއި، އެމަރުގެ ޒިންމާ މުޅި އެމެރިކާއިން އުފުލަން ޖެހޭނެ ކަމަށެވެ.
