މިހާރު ކުރިޔަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ޢަލީ ފާސިރު (ސެންޓޭ) ޖެހި ލަނޑުން މޮޅުވެ، ކްލަބް ވެލެންސިއާ އިން އެއްވަނަ މަގާމުދަމަހައްޓައިފިއެވެ.
މިއަދު ހަވީރު ރަސްމީ ފުޓްބޯޅަ ދަނޑުގައި ކްލަބް ވެލެންސިއާއިން ދަ ގްރާންޑޭ ބަލިކުރީ 0-1 ގެ ނަތިޖާއަކުންނެވެ. ޕްރެޒިޑެންޓްސް ކަޕުގައި މިހާތަނަށްވެލެންސިއާ 3 މެޗު ކުޅެފައިވާއިރު، މި 3 މެޗުވެސް ވެލެންސިއާއިން ވަނީ ކާމިޔާބުކޮށްފައެވެ
ވެލެންސިއާ އާއި ދަ ގްރާންޑޭ ބައްދަލުކުރި މެޗުގެ ފުރަތަމަ ހާފުގައި ވެލެންސިއާއިން ލަނޑު ޖަހާނެ ފުރުޞަތުތައް ތަނަވަސްކުރި ނަމަވެސް ގޯލެއްކާމިޔާބުކުރެވޭގޮތްވަނީ ނުވެފައެވެ.
މެޗުގެ ދެވަނަ ހާފުގައި ވެލެންސިއާއިން ވަނީ ކުޅުން އިތުރަށް ރަނގަޅުކޮށް އެޓޭކްތައް ވަރުގަދަކޮށްފައެވެ. ލަނޑު ޖަހާނެ ގިނަ ފުރުޞަތުތަކެއް ވެލެންސިއާއަށް ލިބުނުއިރު، އެޓީމަށް ލަނޑެއް ޖެހުނީ މެޗުގެ 77 ވަނަ މިނެޓުގައެވެ. މި ލަނޑު ސެންޓޭ ޖެހީ ބޯހަސް އޭރިޔާ ތެރެއަށް ހުރަސްކޮށްދިން ބޯޅައެއްފަހަރުން ޖަހާ ގޯލުގެ ތެރެއަށް ފޮނުވާލައިގެންނެވެ.
މި ނަތީޖާއާއެކު ޕްރެޒިޑެންޓްސް ކަޕުގައި މިހާތަނަށް ކުޅުނު 3 މެޗުން ހޯދި 9 ޕޮުއިންޓާއެކު ވެލެންސިއާ 1 ވަނައިގައި އޮތްއިރު، ދެވަނައިގައި މާޒިޔާ އޮތީ 2 މެޗުން ލިބުނު 6 ޕޮއިންޓާއެކުއެވެ. 3 ވަނައިގައި އޮތް ގްރީން އާއި 4 ވަނައިގައި އޮތް ސުޕަ ޔުނައިޓެޑް ސްޕޯޓްސް އަދި 5 ވަނައިގައި އޮތް ޓީސީ އަށް ވަނީ 3 ޕޮއިންޓް ލިބިފައެވެ.
ކޮމެންޓު ފޮނުވާ