ބޭނުން ޖެހިއްޖެ ހާލަތެއްގައި އެހެން އެއްވެސް ގައުމެއްގެ އެހީތެރިކަމާ ނުލާވެސް އިރާނުގެ ނިއުކުލިއަރ މަރުކަޒުތަކަށް ހަމަލާދޭން ތައްޔާރަށް އޮތްކަމުގެ އިންޒާރު އިސްރާއީލުގެ ފޮރިންގ މިނިސްޓަރު ޔައިރު ލަޕިޑް ދީފިއެވެ.
އޭނާ އިރާނުގެ ނިއުކުލިއަރ މަރުކަޒުތަކަށް ހަމަލާ ދޭނެކަމުގެ އިންޒާރު ދީފައިމިވަނީ، އޮސްޓްރިއާގެ ވިއެނާގައި ކުރިޔަށްދާ އިރާންގެ ނިއުކުލިއަރ ޕްރޮގްރާމާއި ގުޅުންހުރި މަޝްވަރާތައް އެއްވެސް ކޮޅެއްގައި ނުޖެހި ކުރިޔަށް ދާ ދަނޑިވަޅެއްގައެވެ.
"އަހަރެމެން މިތިބީ ބައިނަލްއަގުވާމީ ފަރާތްތަކާއެކީ ކުރިޔަށް ދާން ތައްޔާރަށް. އެހެންނަމަވެސް ބޭނުން ޖެހިއްޖެ ހާލަތެއްގައި އަހަމެން ގިނިކަންޏާވެސް ހަމަލާ ދޭން މިތިބީ ތައްޔާރަށް. އަހަރެމެން އަހަރެމެންގެ ސަލާމަތްތެރިކަން ހޯދާނަން،" އިސްރާއީލުގެ ފޮރިންގ އެފެއާރޒް އެންޑް ޑިފެންސް ކޮމިޓީގައި ލަޕިޑް ވިދާޅުވިކަމަށް ޖެރޫސެލަމް ޕޯސްޓުން ރިޕޯޓު ކޮށްފައި ވެއެވެ.
"އަހަރެމެން ވާނީ، އެކުވެރި ގައުމުތަކަށް، އިރާންގެ ނިއުކުލިއަރ ޕްރޮގްރާމާ ގުޅުން ހުރި ފުރިހަމަ މައުލޫމާތު އަރުވާފަ. އެހީ ހީގެ މައްޗަށް ހުށަހަޅާފައިވާ މައުލޫމާތެއް ނޫން، އެހެންނަމަވެސް، އިރާނުން ދުނިޔެއަށް އޮޅުވާލަމުންދާ ކަމުގެ ފުރިހަމަ މައުލޫމާތު،" އޭނާ ވިދާޅުވެފައި ވެއެވެ.
ލަޕިޑް ވިދާޅުވިގޮތުގައި، އިރާނުގެ ޝައުގުވެރިކަން ހުރި ހަމައެކަނި ކަމަކީ، އެމެރިކާއިން އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށްފަހު، އެތައް ބިލިއަން ޑޮލަރެއް އެގައުމުގެ ނިއުކުލިއަރ ޕްރޮގްރާމަށް ޚަރަދު ކުރުމުގެ އިތުރުން އިރާނުން އެހީތެރިވެދޭ ޝިއާ ހަގުރާމަވެރިންނަށް ހޭދަކުރުމަށް ކަމުގައެވެ.
ވިއެނާގައި މިހާރު ކުރިޔަށްދާ، އިރާނުގެ ނިއުކުކިއަރ ޕްރޮގްރާމް އަލުން އިއާދަކުރުމުގެ ވާހަކަތައް ކޮޅެއްގައި ނުޖެހި ކުރިޔަށްދާތީ ގިނަ ބައެއްގެ ކަންބޮޑުވުން ވަނީ އުފެދިފައެވެ.
އެމެރިކާއިން ބުނެފައިވަނީ، މިވާހަކަތައް ފޭއިލް ވެއްޖެނަމަ، "ޕްލޭން B" އަށް އެގައުމު އޮތީ ތައްޔާތަށް ކަމުގައެވެ. އެހެންނަމަވެސް، "ޕްލޭން B"ގެ ތަފްސީލް އެމެރިކާއިން ހާމަކޮށްފައެއް ނުވެއެވެ.
