ރައްޔިތުންގެ މަޖިލިހުގެ ރައީސް މުޙައްމަދު ނަޝީދު އިނގިރޭސިވިލާތަށް ފުރައިވަޑައިގެންފިއެވެ.
ރައީސް ނަޝީދު އިނގިރޭސިވިލާތަށް ފުރައިވަޑައިގެންފައިވަނީ ނުރަސްމީ ދަތުރުފުޅެއްގައެވެ. އެމަނިކުފާނު އަވަހާރަކޮށްލުމަށް މިއަހަރުގެ މެއި މަހުގެ 6ގައި ދިން ޓެރަރިސްޓް ހަމަލާގައި ލިބިވަޑައިގެންނެވި ޒަޚަމްތަކަށް ފަރުވާ ހޯއްދެވުމަށްފަހު ރާއްޖެ ވަޑައިގަތީ 6 މަސް ދުވަސް ފަހުން މިދިޔަ އޮކްޓޫބަރު މަހުގެ 11 ގައެވެ. ރައީސް ނަޝީދު ވަނީ އެމަނިކުފާނުގެ ފަރުވާ އަދި އެއްކޮށް ނިމިފައި ނުވާކަމަށް ވިދާޅުވެފައެވެ.
ރައީސް ނަޝީދު ރާއްޖެ ވަޑައިގެން ވަނީ މަޖިލީހުގެ ޖަލްސާތަކާއި ސަރުކާރުގެ މުހިންމު ރަސްމިއްޔާތުތަކުގައިވެސް ބައިވެރިވެވަޑައިގެންފައެވެ. އަދި މަޖިލިސް މިހާރު އޮތީ މިއަހަރުގެ ތިންވަނަ ދައުރު ނިންމުމަށްފަހު ޗުއްޓީގައެވެ.
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ނުރަސްމީ ދަތުރުފުޅެއްގައި މިއަދު އިނގިރޭސިވިލާތަށް ފުރާވަޑައިގެންފި pic.twitter.com/zu22Ti2Ixs
— People's Majlis (@mvpeoplesmajlis) December 25, 2021
މޭއިމަހުގެ 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންނެވެ. އޭގެ ފަހުން ޖަރުމަންވިލާތާއި އިނގިރޭސިވިލާތުން ފަރުވާ ހޯއްދަވާފައިވެއެވެ.
