ޓީސީ ބަލިކޮށް ސަސް އިން ޕްރެޒިޑެންޓްސް ކަޕުގެ ފުރަތަމަ މޮޅު ހޯދައިފި

ޓީސީ ސްޕޯޓްސް ކްލަބް ބަލިކޮށް ސުޕަރ ޔުނައިޓެޑް ސްޕޯޓްސް ކްލަބުން ޕްރެޒިޑެންޓްސް ކަޕް ފުޓްބޯޅަ މުބާރާތުގެ ފުރަތަމަ މޮޅު ހޯދައިފިއެވެ.

ރަސްމީ ފުޓްބޯޅަ ދަނޑުގައި މިއަދު ހަވީރު ކުޅުނު މި މެޗު ސަސް އިން ކާމިޔާބުކުރީ 1-3 ގެ ނަތީޖާއަކުންނެވެ.

މި މުބާރާތުގައި ސަސް ކުޅުނު ފުރަތަމަ މެޗުުގައި ނުކުތީ މާޒިޔާ އާއި ދެކޮޅަށެވެ. އެ މެޗުގައި މާޒިޔާ އަތުން ސަސް ބަލިވީ 0-2 ގެ ނަތީޖާއަކުންނެވެ. އަދި ޓީސީ މި މުބާރާތުގައި ކުޅުނު ފުރަތަމަ މެޗުގައި މިދިޔަ ހަފްތާ ވަނީ ކްލަބް އީގަލްސްގެ މައްޗަށް 0-1 އިން ކުރި ހޯދާފައެވެ.

ސަސް އާއި ޓީސީ މިއަދު ހަވީރު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނުނީ ދާދި ހަމަހަމަ ކުޅުމެކެވެ. މެޗުގައި ފުރަތަމަ ލަނޑު ޖަހާފައިވަނީ ސުޕަރ ޔުނައިޓެޑް ސްޕޯޓްސް ކްލަބުންނެވެ. މި ލަނޑު މެޗުގެ 35 ވަނަ މިނެޓުގައި ސަސް އަށް ކާމިޔާބުކޮށްދިނީ އައިހަމް އަޙުމަދުއެވެ. އަދި ފުރަތަމަ ހާފްގެ އިތުރު ވަގުތުގެ ތެރޭގައި އިބްރާހިމް އަތީގް ޙަސަން ވަނީ ސަސް އަށް އިތުރު ލަނޑެއް ކާމިޔާބުކޮށްދީ، ލީޑު ފުޅާކޮށްފައެވެ.

މެޗުގެ ދެވަނަ ހާފް ފަށައިގެން ޓީސީން ވަނީ ކުޅުން ރަނގަޅުކޮށް ސަސްގެ ގޯލަށް ނުރައްކާކުރަން ފަށާފައެވެ. ޓީސީން މި މެޗުގައި ޖެހި ފުރަތަމަ ލަނޑަކީ ގޯލު ކުރިމަތިން ލިބުނު ހިލޭ ޖެހުމަކުން ކާމިޔާބުކުރި ލަނޑެކެވެ. މި ލަނޑު 67 ވަނަ މިނެޓުގައި ކާމިޔާބުކޮށްދިނީ ތޮލާލް ހަސަންއެވެ. އޭނާ މި ލަނޑު ކާމިޔާބުކޮށްދިނީ ގޯލުގެ މަތީ ކަނަށް ބޯޅަ އަމާޒުކޮށްލައިގެންނެވެ. ޓީސީން ލަނޑެއް ޖެހިތާ 7 މިނެޓު ފަހުން އަނެއްކާވެސް ސަސް އިން ވަނީ ލަނޑެއް ޖަހާ 2 ލަނޑުގެ ލީޑު ދަމަހައްޓާފައެވެ. މި ލަނޑު ކާމިޔާބުކޮށްދިނީ މި މެޗުގެ މޮޅު ކުޅުންތެރިޔާގެ މަގާމްވެސް ހޯދި އަތީގުއެވެ. 1-3 ގެ ނަތީޖާއަކުން މެޗު ނިމެން ދަނިކޮށް ޓީސީއަށް ވަނީ ޕެނަލްޓީއެއްވެސް ލިބިފައެވެ. ނަމަވެސް ހަސަން އީނާޒް ފޮނުވާލި ޕެނަލްޓީ ސަސްގެ ކީޕަރ މުހައްމަދު ޝަފީއު ވަނީ ދިފާޢުކޮށްފައެވެ.

މި މުބާރާތުގައި މިރޭ ކުޅޭ މެޗުގައި ބައްދަލުކުރާނީ މާޒިޔާ އާއި ކްލަބް އީގަލްސްއެވެ.