ރާއްޖޭގައި ތިބި އިންޑިއާގެ ސިފައިން ރާއްޖެއިން ބޭލުމަށް ކުރާ މަސައްކަތް ހުއްޓާލާފައި ނޫނީ މަސައްކަތް ނިންމާ ނުލާނެ ކަމުގައި ކުރީގެ ރައީސް އަދި އިދިކޮޅު ލީޑަރު ރައީސް އަބްދުﷲ ޔާމީން ވިދާޅުވެއްޖެއެވެ.
އިންޑިއާ އައުޓް ކެމްޕެއިންގެ ތެރެއިން އަތޮޅު ތެރޭގެ ރަށްތަކަށް ކުރައްވާ ދަތުރުގައި މިއަދު ފ.ނިލަންދޫއަށް ވަޑައިގެން ރައްޔިތުންނާއި މުޚާތަބު ކުރައްވަމުން ރައީސް ޔާމިން ވިދާޅުވީ ރާއްޖޭގައި އިންޑިއާގެ އަސްކަރީ ސިފައިން ތިބިކަމަށް ގަބޫލުނުކުރެވޭ އެއްވެސް ސިޔާސީ ވެރިއެއް ވެރިކަން ކުރާ ކޯލިޝަންގެ ތެރޭގައިވެސް ނެތްކަމަށެވެ.
މިއަދު އިންޑިއާގެ އަސްކަރީ ސިފައިން ރާއްޖޭގައި ތިބި މިންވަރާއި، އެކަމުގެ ނުރައްކާތެރިކަން އިހުސާސް ކުރެވި އެކަމާއި ދެކޮޅަށް ދިވެހި ރައްޔިތުންނާއިއެކު ތެދުވުމުން އެކަން ހުއްޓުވުމަށް ކުރާ މަސައްކަތަކީ ވަރަށް ނާތަހުޒީބު ކަމެއްކަމަށް ރައީސް ޔާމީން ވިދާޅުވިއެވެ. އެމަނިކުފާނު ވިދާޅުވީ މިކަން އެހާބޮޑު ކަމަކަށްނުވެ ކަމާއިބެހޭ އިދާރާތަކުން ބީރު ކަންފަތެއް ދީގެން ތިބިކަމީ މިކަމާއި ދެކޮޅަށް ދިވެހި ރައްޔިތުން ނިކުންނަން ޖެހުނު ސަބަބު ކަމަށެވެ.
އަޅުގަނޑުމެން އިންޑިއާ ސިފައިން މިތަނުން ބޭރުކުރާނަން. ދިވެހި ރައްޔިތުން ބޭނުންވަނީ މިތަނުން އިންޑިއާ ސިފައިން ބޭރުކުރަން. މިހާރު ވެރިކަމުގެ ތެރޭގައި ތިއްބެވި ލީޑަރުންގެ ތެރޭގައިވެސް ރާއްޖޭގައި އިންޑިއާ އަސްކަރިއްޔާ ނެތްކަމަށް ގަބޫލުކުރައްވާ އެކަކުވެސް ނުހުންނަނާނެ. އަދި އެކަމާއި އުދަގޫވެގެން، އަދި އެކަމާއި ކަންބޮޑުވުންގެން އެކަމުގެ ނުރައްކާ އިހުސާސްވެގެން އަޅުގަނޑުމެން ނިކުމެގެން މިމަސައްކަތް ކުރަނީ، މިއީ ރައްޔިތުންގެ ޚިޔާލާއި ވިސްނުމާއި، ފިކުރު ހުރިގޮތް. ވެރިކަމަކީ ވެރިކަމަށް އަންނަ ބަޔަކު ރައްޔިތުން ބޭނުންވާ ގޮތަށް ވެރިކަން ކޮށްދިނުން.
– ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އިންޑިއާއިން ރާއްޖޭގައި މިހާތަނަށް ކުރި ކޮންމެ ކަމެއްވެސް ކޮށްފައިވަނީ އަމިއްލަ ފައިދާއަށް ކަމަށެވެ. އެގޮތުން ކުރީގެ ރައީސް މުހައްމަދު ނަޝީދުގެ ވެރިކަމުގައި އިންޑިއާގެ ޓާޓާ ކުންފުންޏަށް ފްލެޓު އަޅަން ކުރީގެ ނާދީ ހުރި ބިން އަތުލަން އުޅުމުން އިންޑިއާ އިން 34 މިލިއަން ޑޮލަރު ދިނުމަށް ޝަރުތު ކުރި ކަމަށެވެ. ރައީސް ޔާމީން ވިދާޅުވީ ދިވެހިންގެ ބިމުން އެންމެ ތަންކޮޅެއް ދޫކޮށްލިޔަސް، އެ ތަންކޮޅު ނުހޯދޭނެ ކަމުގެ ހެއްކަކަށް ނާދީ ހުރި ބިން ވާނެ ކަމަށެވެ. މަޖީދިއްޔާ ސްކޫލްގެ އިރުން އޮތް ބްލޮކް، ޓާޓާ އަށް ދޫކޮށްލިތާ ނުވަ ވަރަކަށް އަހަރުވެގެން ދިޔަ އިރު އެތަނުގައި މިހާތަނަށް އައިއިރު އެއްވެސް ކަމެއް ކުރެވިފައި ނުވާ ކަމަށެވެ.
ޔާމީން ވިދާޅުވި ގޮތުގައި ޓާޓާ ކުންފުނީގެ އަތުން އެ ބިން އަތުލުމަށް އެމަނިކުފާނުގެ ވެރިކަމުގައި މަސައްކަތްޕުޅު ކުރެއްވި ނަމަވެސް އެކަން ކާމިޔާބުވެފައި ނުވާ ކަމަށެވެ.
