ރާއްޖޭގައި ތިބި އިންޑިއާގެ އަސްކަރީ ސިފައިން ރާއްޖެއިން ބޭލުމަށް ގޮވާލައި ހިންގާ "އިންޑިއާ އައުޓް" ކެމްޕެއިންގައި އިދިކޮޅު ލީޑަރު ރައީސް ޔާމީން ހަފްތާ ބަންދުގައި ފ.ނިލަންދޫއަށް ވަޑައިގަތުމަށް ހަމަޖެހިއްޖެއެވެ.
އިދިކޮޅު ޕްރޮގްރެސްވިސް ކޯލިޝަންގެ ތަރުޖަމާން ހީނާ ވަލީދު ވިދާޅުވީ ނިލަންދޫއަށް ރައީސް ޔާމީނާއިއެކު އިދިކޮޅު ލީޑަރޝިޕްގެ ބޭފުޅުން ވަޑައިގަތުމަށް ހަމަޖެހިފައިވަނީ މިހަފްތާގެ ބުރާސްފަތި ދުވަހު ކަމަށެވެ. އަދި އެ ދުވަހު ނިލަންދޫގައި ބާއްވާ ހަރަކާތްތަކާއި އަދި ރޭގަނޑު އެރަށުގައި ބާއްވާ ޖަލްސާގައި ރައީސް ޔާމީން ބައިވެރިވެވަޑައިގަންނަވާނެ ކަމަށެވެ.
އިންޑިއާ އައުޓް ކެމްޕޭން އަތޮޅު ތެރެއަށް ފުޅާކޮށް ރައީސް ޔާމީން އެންމެ ފުރަތަމަ ވަޑައިގަންނަވަން ނިންމެވީވެސް ނިލަންދޫ އަށެވެ. ނަމަވެސް މޫސުން ހުރިގޮތުން ރައީސް ޔާމީން ދަތުރުފުޅު ފެއްޓެވީ މިދިޔަ ބުރާސްފަތި ދުވަހު ކ. ގުރައިދޫންނެވެ. އަދި ހުކުރު ދުވަހު ވަނީ ކ. ތުލުސްދޫ އަށް ވަޑައިގެންފައެވެ.
މި ދަތުރުތަކުގައި ރައީސް ޔާމީން ވަނީ އަތޮޅުތަކުގައި އިންޑިއާ ސިފައިން ބޭލުމަށް ހިންގޭ ހަރަކާތް ފުޅާކޮށް، ރާއްޖޭގެ މިނިވަންކަން ދިފާއު ކުރުމަށް ދިވެހި ރައްޔިތުން ނިކުރުމަށް ގޮވާލައްވާލައްވާފައެވެ. އަދި ތަކުރާރުކޮށް ރައީސް ޔާމީންވަނީ އެކި ބައްދަލުވުން ތަކުގައި އިންޑިއާ އަސްކަރިއްޔާ ރާއްޖެއިން ފައިބަން ޖެހޭނެކަމަށް ވިދާޅުވެފައެވެ.
ރައީސް ޔާމީންގެ މިދަތުރުތައް ހުއްޓުވުމަށް އެމްޑީޕީގެ ރައީސް މުހައްމަދު ނަޝީދު ވަނީ މިއަދު ފުލުހުންނަށް ގޮވާލާފައެވެ. އަދި މިހަރަކާތަކީ ހިންގޭނެ ހަރަކާތެއް ނޫންކަމަށް ވިދާޅުވެ މިހަރަކާތް ހުއްޓުވުމަށް ވަނީ އެދިފައެވެ.
