ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިއަދު ހަވީރު ކުޅުނު މެޗުގައި ސުޕަރ ޔުނައިޓެޑް ސްޕޯޓްސް ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން ފެށުން ރަނގަޅުކޮށްފިއެވެ.
ރަސްމީ ފުޓްބޯޅަ ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ 0-2 ގެ ނަތީޖާއަކުންނެވެ.
މި މެޗު ފެށުމުގެ ކުރިން މާޒިޔާއަށް ވަނީ މިދިޔަ ސީޒަންގެ ދިރާގު ދިވެހި ޕްރިމިއާ ލީގުގެ ޗެމްޕިއަން ޓީމަށް ދޭ އައްޑަނަ ހަވާލުކޮށްފައެވެ. އަދި މީގެ އިތުރުން ކުރީގެ ސްޕޯޓްސް މިނިސްޓަރ ނިޝާން ޢިއްޒުދީންގެ ޢިއްޒަތުގެ ވެރިޔާ އުމަރު ޒާހިރު އަވަހާރަ ވުމާއި ގުޅިގެން މެޗު ފެށުމުގެ ކުރިން 1 މިނެޓުގެ ސުކޫތެއް ވަނީ ގެނެސްފައެވެ. އެމަނިކުފާނު އަވަހާރަވީ ކޯވިޑް-19 ބަލީގައި ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން އަންނަނިކޮށް މިއަދުގެ ވަގުތެއްގައެވެ.
މާޒިޔާ އާއި ސަސް ބައްދަލުކުރި މެޗު ފަށައިގެން ދެ ޓީމުގެ ފަރާތުންވެސް ފެނިގެންދިޔައީ ދާދި ހަމަހަމަ ކުޅުމެކެއެވެ. މާޒިޔާއިން މި މެޗުގައި ޖެހި ފުރަތަމަ ލަނޑަކީ އެޓީމަށް ލިބުނު ކޯނަރަކުން ކާމިޔާބުކުރި ލަނޑެކެއެވެ. މެޗުގެ 28 ވަނަ މިނެޓުގައި އުމައިރު ނަގައިދިން ކޯނަރަކުން މި ލަނޑު އެޓީމަށް ކާމިޔާބުކޮށްދިނީ، ސަމޫހް ޢަލީއެވެ. މެޗުގެ ފުރަތަމަ ހާމް ނިމުނީ ސަމޫހް ކާމިޔާބުކޮށްދިން ލަނޑާއެކު 0-1 ގެ ނަތީޖާއާކުންނެވެ.
ދެވަނަ ހާފް ފަށައިގެން މާޒިޔާއިން ލީޑު އިތުރަށް ފުޅާކުރަން ލަނޑެއް ޖެހޭތޯ ވަރަށް މަސައްކަތްކުރިއެވެ. ހަމައެގޮތަށް ސަސް އިންވެސް ވަނީ އެޓީމަށް ލިބުނު މަދު ފުރުޞަތުތަކުގައި މާޒިޔާގެ ގޯލަށް ނުރައްކާކޮށްފައެވެ. މާޒިޔާއިން މި މެޗުގައި ޖެހި ދެވަނަ ލަނޑުވެސް ޖަހާފައިވަނީ މެޗު ނިމެން ކައިރިވެފައިވަނިކޮށް ލިބުނު ކޯނަރަކުންނެވެ. މެޗުގެ 88 ވަނަ މިނެޓުގައި މި ލަނޑު މާޒިޔާއަށް ކާމިޔާބުކޮށްދިނީ، މި ސީޒަނަށް ވެލެންސިއާއިން މާޒިޔާއަށް ބަދަލުވި އަކްރަމް ޢަބްދުލް ގަނީއެވެ. މިއީ އޭނާ މާޒިޔާއަށް ބަދަލުވެ ކުޅުނު ފުރަތަމަ މެޗުކަން ފާހަގަކޮށްލެވެއެވެ.
މުބާރާތުގައި މިރޭ ކުޅޭ މެޗުގައި ކްލަބް އީގަލްސް ކުޅޭނީ ޓީސީ ސްޕޯޓްސް ކްލަބާ ދެކޮޅަށެވެ.
ކޮމެންޓު ފޮނުވާ