މޯލްޑިވްސް ޕޯޓް ލިމިޓެޑް (އެމްޕީއެލް)ގެ ބެލުމުގެ ދަށުގައި އޮތް ޓީޖެޓީއައި ހަވާލުވުމަށް މިއަދު މާލެ ސިޓީ ކައުންސިލުން ގޮސް ކުރި މަސައްކަތުން އެތައް ސިޓީ ކައުންސިލާއި ހަވާލު ނުކުރި މައްސަލައިގައި ކޯޓަށް ދިއުމަށް މާލެ ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު ނަރީޝް އިސްކޮށް ހުނަވައިގެން މިއަދު ވަނީ ޓީ ޖެޓީއާއި ހަވާލުވުމަށް ގޮސްފައެވެ. ނަމަވެސް އެސަރަހައްދުގައި ސިޓީ ކައުންސިލް މެމްބަރުންނާއި، މުވައްޒިފުން އެތައް އިރެއް ވަންދެން ތިބި ނަމަވެސް އެމްޕީއެލުން ސިޓީ ކައުންސިލްގެ ބޭފުޅުންނާއި ބައްދަލުވެސް ކޮށްފައި ނުވެއެވެ. އަދި އެދުނުގޮތަށް އެސަރަހައްދު ސިޓީ ކައުންސިލަށް ދިނުމަށްވެސް އެއްބަސްވެފައި ނުވެއެވެ.
ނޫސްވެރިންނާއި ވާހަކަ ދައްކަވަމުން ނަރީޝް ވިދާޅުވީ އެމްޕީއެލް އިން ޓީޖެޓީ ހިންގުމާއި މެދު ސިޓީ ކައުންސިލްގެ އެއްވެސް މައްސަލައެއް ނެތް ކަމަށާއި ނަމަވެސް އެމްޕީއެލް އަށް ވެސް އެކަން ކުރެވެން ވާނީ ބިމު ކުލި މާލޭ ސިޓީ ކައުންސިލަށް ދެއްކުމަށް ފަހު ކަމަށެވެ. ޓީޖެޓީގެ މައްސަލައިގައި އަންނަ ހަފްތާގައި ކޯޓަށް ދާނެ ކަމަށް ވެސް ނަރީޝް ވިދާޅުވިއެވެ.
ޓީޖެޓީ މާލޭ ސިޓީ ކައުންސިލާއި ހަވާލު ކޮށްދިނުމަށް ކައުންސިލުން ފުރަތަމަ އެދުނީ ރައީސުލްޖުމްހޫރިއްޔާގެ އޮފީހުގައެވެ. ނަމަވެސް ރައީސް އޮފީހުން ވަނީ ސިޓީ ކައުންސިލާއި ޓީޖެޓީ ހަވާލު ނުކުރެވޭނެކަން އަންގާފައެވެ.
އެމްޕީއެލުން އެ ބަނދަރު ހިންގުމަށް، ކައުންސިލުން ދެކޮޅު ނަހަދާ ކަމަށާއި ބިމު ކުއްޔަށް ވާ ފައިސާ އެ ކުންފުނިން ކައުންސިލަށް ދައްކައިގެން ވިޔަސް އެ ބަނދަރު ހިންގުމަށް އެދިފައިވާ ކަމަށާއި އެކަމަކު އެކަމާ ވެސް ދެކޮޅު ހެދި ކަމަށް ވިދާޅުވިއެވެ.
ލާމަރުކަޒީ ޤާނޫނުގެ ދަށުން މާލޭގެ ބިންތައް ސިޓީ ކައުންސިލަށް ލިބޭނެކަމަށް ޤާނުނުގައި ކަނޑައަޅާފައިވީނަވެސް ބައެއް ބިންތައް މާލެ ސިޓީ ކައުންސިލަށް ދޫކޮށްލުމަށް ސަރުކާރުން ދަނީ ދެކޮޅު ހަދަމުންނެވެ. އަދި މިއަދު މާލެ ސިޓީ ކައުންސިލުން ހަވާލުވުމަށް މަސައްކަތްކުރި ޓީޖެޓީ ސަރަހައްދު މާލެ ސިޓީ ކައުންސިލާއި ހަވާލު ނުކުރުމަށް ރައީސުލްޖުމްހޫރިއްޔާގެ އޮފީހުން ވަނީ ނިންމާފައެވެ.
