ފެނިގެންދަނީ އަރަބިއްޔާ މައްސަލަ އިތުރަށް ގޯސްކުރުމަށް، ސަރުކާރުން މަސައްކަތްކުރާތަން ކަމުގައި ޖަމިއްްޔަތުއް ސަލަފުން ބުނެފިއެވެ.
އަރަބިއްޔާ ސްކޫލާއިމެދު ސަރުކާރުން ޢަމަލުކުރަމުންދާ ނިކަމެތި ގޮތްތައް ކުށްވެރިކޮށް ޖަމްޢިއްޔަތުއްސަލަފުން ނެރުނު ބަޔާނުގައި ބުނެފައިވަނީ ދިވެހިރާއްޖެއަކީ ސައްތައިން ސައްތަ އިސްލާމީ ޤައުމަކަށްވެފައި، ދިވެހިންނަކީ ޒަމާނުއްސުރެ ޢަރަބި އިސްލާމީ ތަޢުލީމަށް ލޯބިކުރާ ބައެއްގެ ގޮތުގައި ލެއްވުމަކީ ﷲ އަޅުގަނޑުމެން ދިވެހިންނަށް ދެއްވާފައިވާ އެންމެ އަގުބޮޑު އެއް ނިޢުމަތް ކަމުގައެވެ.
ސަލަފުން ބުނެފައިވަނީ މިދުވަސްވަރަކީ ޢަރަބި އިސްލާމީ ތަޢުލީމު ދިވެހިރާއްޖޭގެ ފަސްގަނޑުން ފޮހެލުމަށްޓަކައި، ރޭވިގެން މަސައްކަތްތަކެއް ކުރެވެމުންދާ ދުވަސްވަރެއްކަމަށެވެ. އެގޮތުން މިވަގުތު ދިވެހިރާއްޖޭގައި ހުރި ހަމައެކަނި ޢަރަބި އިސްލާމީ ތަޢުލީމުދޭ މަދަރުސާކަމުގައިވާ، އަރަބިއްޔާ ނައްތާލުމަށްޓަކައި ރޭވިގެން މަސައްކަތްތަކެއް ކުރެވެމުންދާކަމީ މިޖަމްޢިއްޔާއިން ނުހަނު ކަންބޮޑުވާ ކަމަށް ވަނީ ބުނެފައެވެ.
މިމުހިންމު ޢިލްމީ މުއައްސަސާއާމެދު ކަމާބެހޭ ފަރާތްތަކުން އިހުމާލުވުމުގެ ނަތީޖާއަކީ މިއަދު އެމަދަރުސާގެ ޢިމާރާތަކީ، ކުދިން ކިޔަވަންދާން އެކަށީގެންވާ ރައްކާތެރި ތަނަކަށް ނުވުން. މިހިސާބަށް ކަންތައް ދިޔައިރުވެސް މައްސަލަ ޙައްލުކޮށް ރަނގަޅުކުރުމުގެ ބަދަލުގައި މިއަދުވެސް ފެނިގެންދަނީ މައްސަލަ އިތުރަށް ގޯސްކުރުމަށް ސަރުކާރުގެ ފަރާތްތަކުން މަސައްކަތްކުރަމުންދާތަން.
– ސަލަފް ޖަމްއިއްޔާއިން ބުނެފައިވެއެވެ.
ސަލަފުން ބުނީ މި ހިސާބަށް ކަންތައް ދިޔައިރުވެސް މައްސަލަ ހައްލުކޮށް ރަނގަޅު ކުރުމުގެ ބަދަލުގައި މިއަދުވެސް ފެނިގެންދަނީ މައްސަލަ އިތުރަށް ގޯސްކުރުމަށް ސަރުކާރުގެ އިދާރާތަކުން މަސައްކަތް ކުރަމުންދާ ތަން ކަމަށެވެ. އަދި ވަގުތީގޮތުން ކަމުގައި ބުނެ އެހެން މީޑިޔަމަކަށް އަދި އެހެން މޮޑެލްއަކަށް ކިޔަވައިދެމުންދާ ސްކޫލެއްގެ ދަރިވަރުންނާ އަރަބިއްޔާ ގެ ދަރިވަރުން އެއްކޮށްލުމަށް މަސައްކަތް ކުރެވެމުންދާއިރު ދެ މީޑިއަމަކަށް ކިޔަވައިދޭ ދެ މަދަރުސާއެއްގެ ދަރިވަރުން އެއް އިމާރާތެއްގެ ތެރޭގައި ކިޔަވަން ޖެހިއްޖެނަމަ ދިމާވެދާނެ ސީރިއަސް މައްސަލަތަކާއި އިދާރީ ގޮންޖެހުންތަކަށް އެޑިއުކޭޝަނުން އެއްވެސް ބަލާލުމެއް ނެތް ކަމަށެވެ.
