ރާއްޖޭގައި ތިބި އިންޑިއާގެ ސިފައިން ބޭލުމަށް ދެކޮޅު ހަދާ ހުރިހާ އެންމެން ފެއިލް ވާނެކަމުގައި ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލާ އިދިކޮޅުން ހިންގާ އިންޑިއާ އައުޓް ކެމްޕެއިނަކީ ބޮޑު ޖަރީމާއެއްގެ ގޮތުގައު މޯލްޑިވްސް ނެޝަނަލް ޕާޓީ (އެމްއެންޕީ)ގެ ރައީސް އަދި ދަނގެތި ދާއިރާގެ މެންބަރު މުޙައްމަދު ނާޒިމް ވިދާޅުވެ ދެއްކެވި ވާހަތަކާއި ގުޅިގެން އުމަރު ވިދާޅުވީ ރާއްޖެ އަޅުވެތިކޮށް، ދިވެހިން އަޅުވެތި ކުރުމަށް އެއްވެސް ދިވެހި ރައްޔިތަކު ތާއީދު ނުކުރާނެކަމަށެވެ.
އެކަމަށް ތާއީދުކުރާ ލީޑަރުންނާއި، މީހުންނަކީ ރައްޔިތުންގެ ކުރިމަތީގައި ފެއިލްވާނެ މީހުންކަމަށް އުމަރުވަނީ ވިދާޅުވެފައެވެ. އުމަރަކީ ރާއްޖޭގައި ތިބި އިންޑިއާސިފައިން ބޭލުމަށާއި، ރާއްޖެއާއި އިންޑިއާއާއިއެކު ވެފައިވާ ޔޫޓީއެފް އެއްބަސްވުން ފުރަތަމަ ފަހަރަށްް އާންމު ކުރީ ބޭފުޅާއެވެ. އުމަރުވަނީ ރާއްޖޭގައި ތިބި އިންޑިއާ ސިފައިންގެ އަދަދުތައްވެސް ހާމަކުރައްވާފައެވެ.
އިރާދަ ކުރެއްވިއްޔާ، ދިވެހިރާއްޖޭން އިންޑިޔާ ސިފައިން ބާލާނަން. އެކަމަށް ހުރަސް އަޅާ އެންމެން ފެއިލްވާނެ. ދިވެހިން އަޅުވެތި ކަމާ ދެކޮޅު.
– އުމަރު ވިދާޅުވިއެވެ.
އެމްއެންޕީން ބޭއްވި ނޫސްވެރިންގެ ބައްދަލުވުމުގައި ކާނަލް ނާޒިމް ވިދާޅުވީ، އިންޑިއާ އައުޓް ކެމްޕެއިނަކީ ވަކި ބަޔަކު ފައިދާ ނެގުމަށް ހިންގާ ބޮޑު ޖަރީމާއެއްކަމަށާއި އެ ކެމްޕެއިން ބަލައި ނުގަންނަކަމަށެވެ. ނަމަވެސް ރާއްޖޭގައި ބޭރު ގައުމެއްގެ އަސްކަރީ ސިފައިން ތިބުމަކީ ދިވެހި ރައްޔިތުން އެދޭ ކަމަކަށް ނުވާތީ ބޭރުގެ ސިފައިން ރާއްޖޭގައި ތިބުމަށް އެ ޕާޓީން ވެސް ތާއީދު ނުކުރައްވާކަމަށް ނާޒިމް ވިދާޅުވިއެވެ.
ކުރީގެ ރައީސް ޢަބްދުﷲ ޔާމީންގެ ވެރިކަމުގައި ހިންގާފައިވާ ކޮރަޕްޝަނާއި ޤާނޫނާއި ޚިލާފް އެތައް ކަމެއް ފޮރުވުމަށް ހިންގާ ހަރަކާތެއްގެ ގޮތުގައި ސިފަކުރައްވަމުން ނާޒިމް ވަނީ ރައީސްކަން ކުރައްވާފައިވާ ބޭފުޅަކު ވަކި ޤައުމަކާ ދެކޮޅަށް ފާޅުގައި ނުކުމެ ހުންނެވުމަކީ ޤަބޫލު ކުރެވޭކަމެއް ނޫންކަމަށް ވިދާޅުވެފައެވެ.
ނާޒިމްގެ ވާހަކަފުޅުގައި ވަނީ އިންޑިއާ އައުޓް ކެމްޕޭންގެ ސަބަބުން ރާއްޖެއަށް ލިބޭނެ ގެއްލުންތަކެއް ހުންނާނެތީ ރައްޔިތުން އެކަމަށް ސަމާލުވުމަށް އެދިވަޑައިގެންފައެވެ.
ނާޒިމް ވިދާޅުވީ، ރާއްޖޭގެ ހާރިޖީ ސިޔާސަތު އޮންނަންވާނީ ހުރިހާ ގައުމުތަކާ ގުޅުން އޮންނަ ގޮތަށް ކަމަށެވެ. އެގޮތަށް ބަލާއިރު މިހާތަނަށް ރާއްޖޭގައި އެންމެ ރަނގަޅު ހާރިޖީ ސިޔާސަތެއް އޮތީ ކުރީގެ ރައީސް މައުމޫން އަބްދުލްޤައްޔޫމްގެ ވެރިކަމުގައި ކަމަށްވެސް ނާޒިމް ވިދާޅުވިއެވެ.
