ރާއްޖޭގެ މިނިވަންކަމަށް ދައްކަންޖެހޭ އަގަކީ ފިޔާ ކިލޯއަކަށް ނުހެދުމަށް މާވަށު ދާއިރާގެ މެންބަރު އަދި ޕީއެންސީގެ ނާއިބު ރައީސް މުޙައްމަދު ސަޢީދު ގޮވާލައްވައިފިއެވެ.
ރާއްޖޭގައި ތިބި އިންޑިއާ ސިފައިންބޭރުކުރުމަށް ގޮވާލާ އިދިކޮޅުން ހިންގާ އިންޑިއާ ހަރަކާތާއި ގުޅިގެން ސަރުކާރަށް ތާޢީދުކުރާ ފަރާތްތަކުން ވަނީ އިންޑިއާއަކީ ރާއްޖެއަށް އެކި ގޮތްގޮތުން އެހީތެރިވާ ޤައުމުކަން ފާހަގަކޮށް އިންޑިއާ އައުޓް ހަރަކާތަށް ފާޑުކިޔާފައެވެ. ސަރުކާރަށް ތާޢީދުކުރާ ފަރާތްތަކުން ބުނަނީ ރާއްޖެއަށް ބޭނުންވާ ފިޔާ ހަނޑޫ ހަކުރު ފުށް ފަދަ އަސާސީ ކާބޯތަކެއްޗާއި ޚިދުމަތްތައް އެތެރެކުރާ ޤައުމަކީ އިންޑިއާކަަމށް ވީހިނދި އިންޑިއާ އެކު އޮތް ގުޅުމަށް ހުރަސް އެޅޭފަދަ ކަންކަން ކުރުމަކީ އެކަމުގެ ސަބަބުން ރާއްޖެއަށް ވަރަށް ބޮޑު ގެއްލުމެއް ލިބޭނެ ކަމެއްކަމަށެވެ.
އެވާހަކަތަކަށް ރައްދު ދެއްވާ މާވަށު ދާއިރާގެ މެންބަރު މުޙައްމަދު ސަޢީދު ވަނީ ރާއްޖޭގެ މިނިވަންކަމަށް ދައްކަން ޖެހޭ އަގަކީ ފިޔާ ކިލޯއަކަށް ނުހެދުމަށް ގޮވާލައްވާފައެވެ.
Raajjeyge minivankamah dhakkan jehey agakee fiyaa kilo akah nuhadhavaa! #DefendMaldives #IndiaMilitaryOut pic.twitter.com/jxaJkcqxNW
— Mohamed Saeed (@em_saeed) December 19, 2021
ސައީދު ވަނީ ދުނިޔޭގެ ޤައުމުތަކުގެ ތެރެއިން އެންމެ ގިނައިން ފިޔާ އެކްސްޕޯޓް ކުރާ ޤައުމުތައް ހިމެނޭ ލިސްޓެއްވެސް ޓްވީޓްކުރައްވާފައެވެ. އެގޮތުން ދުނިޔޭގައި އެންމެ ގިނައިން ފިޔާ އެކްސްޕޯޓް ކުރާ 15 ޤައުމުގެ ތެރެއިން އެ ލިސްޓްފެ 4 ވަނާގައި ވަނީ އިންޑިއާއެވެ.
އިންޑިއާ އައުޓު ހަރަކާތަކީ ފާއިތުވެދި ދެ އަހަރެއްހާ ދުވަހުގެ ތެރޭގައި އިދިކޮޅު ސިޔާސީ ހަރަކާތްތަކުގެ އެންމެ ވަރަގަދަ އަސާސެވެ. މި ސަރުކާރުން އިންޑިއާ ސިފައިންނާ އެކީ ކޮށްފައިވާ އެގްރީމަންޓްގެ އަސްލުތައް ހޯދުމަށާއި، އަދި އިންޑިއާ ސިފައިން ދާއިމީ ގޮތެއްގައި ރާއްޖޭގައި ތިބުމުގެ މަގު ފަހިވެފައިވާކަމަށް ބުނެ، އިދިކޮޅު ޕާޓީން ކުރިޔަށްގެންދިޔަ ހުރިހާ ސިޔާސީ ހަރާކާތެއްގައިވެސް ވަނީ މި ގައުމު އަޅުވެތި ކޮށްފައިވާ ކަމަށް ވަކާލާތުކޮށް، ގައުމުގެ މިނިވަންކަން މިސަރުކާރުން ގެއްލުވާލާފައިވާ ކަމަށް ގިނަބަޔަކަށް ވިސްނޭ މިންވަރަށް މި ހަރަކާތްތައް ކުރިޔަށް ގެންގޮސްފައެވެ.
ނަތީޖާއެއްގެ ގޮތުން، ރައީސް ޔާމިން ޖަލުގައި ހުންނެވި ދެ އަހަރެއްހާ ދުވަހުގެ މުއްދަތުގައި އިދިކޮޅު ޕީޕީއެމްއިން ކުރިޔަށް ގެންދިޔަ އިންޑިއާ އައުޓުގެ ހަރަކާތަށް ތާއީދުކޮށް، ޕީޕީއެމްއަށް ތާއީދު ނުކުރާ އެތައް ބަޔަކުވެސް ވަނީ، މިހަރަކާތާއި ގުޅި، އަދި މިހަރަކާތައްވަނީ ރާއްޖޭގެ އެކި ކަންކޮޅުތަކަށް ފުޅާ ކޮށްފައެވެ.
