ކޯވިޑް19ގެ އޮމިކްރޮން ވޭރިއެންޓް ދަނީ، ދުނިޔޭގެ އެކި ކަންކޮޅުތަކުގައި، ކޯވިޑް19ގެ ޑެލްޓާ ވޭރިއެންޓަށްވުރެ ބާރު މިނުގައި ފެތުރެމުން ކަމުގައި ދުނިޔޭގެ ސިއްޙަތު ޖަމިއްޔާއިން ބުނެފިއެވެ.

ދުނިޔޭގެ ސިއްޙަރު ޖަމިއްޔާއިން ހާމަ ކޮށްފައިވާ ގޮތުގައި، މި ވޭރިއެންޓްގެ ކޮމިއުނިޓީ ސްޕްރެޑް އޮތް ގައުމުތަކުގައި، ކޮންމެ 1.5 ދުވަހާއި 3 ދުވަހާއި ދެމެދު ވޭރިއެންޓް ފެތުރެމުންދާ މިންވަރު ދެގުނަ ވަމުންދާ ކަމުގައިވެސް ޑބްލިއުއެޗްއޯއިން ބުނެފައި ވެއެވެ.

ޔޫއެންގެ ހެލްތު އޭޖެންސީން ހޮނިހިރު ދުވަހު އާންމު ކޮށްފައިވާ ހިސާބުތަކުގައި ބުނެފައިވާ ގޮތުން، އޮމިކްރޮން ވޭރިއެންޓް މިހާރުވަނީ ދުނިޔޭގެ 89 ގައުމެއްގައި ފެތުރެން ފަށާފައެވެ.

ޑަބްލިއުއެޗްއޯއިން ބުނެފައިވާ ގޮތުގައި، ވަރަށް ބޮޑަށް މިއުޓޭޓްވެފައިވާ އޮމިކްރޮން ވޭރިއެންޓް ބާރަށް ފެތުރެމުންދަނީ، އާބާދީތައް ކޯވިޑަށް އިމިއުއޫން ވެފައިވާ (ކޯވިޑަށް ރައްކާތެރިކަން ލިބިފައިވާ) ގައުމުތަކުގައި ކަމަށެވެ. އެހެންނަމަވެސް، މި ގައުމުތަކުގައި ބާރުމިނުގައި ވޭރިއެންޓް ފެތުރެމުންދަނީ، ކޯވިޑް19އިން މިހާރު ލިބިފައިވާ ރައްކާތެރިކަން ފޫއަޅުވާލުމުގައި ވޭރިއެންޓަށް ލިބިފައިވާ ގާބިލްކަމުން ކަމެއް، ނުވަތަ އެކަކު ގައިން އަނެއްކަކު ގަޔަށް ވާސިލް ވުމުގައި ލިބިގެން ގޮސްފައިވާ ގާބިލް ކަމުންކަމެއް ނުވަތަ ދެގޮތުންވެސް ވޭރިއެންޓަށް ލިބިގެން ގޮސްފައިވާ ގާބިލްކަމުން ކަމެއްވެސް އަދި ޔަގީން ކުރެވިފައެއް ނުވެއެވެ.

އެންމެ ފުރަތަމަ ސައުތު އެފްރިކާއިން ފެނުނު، ކޯވިޑް19ގެ އޮމިކްރޯން ވޭރިއެންޓަކީ ކަންބޮޑު ވާންޖެހޭ ވޭރިއެންޓެއްގެ ގޮތުއި ދުނިޔޭގެ ސިއްޙަތު ޖަމިއްޔާއިން ކަނޑައެޅީ ފާއިތުވެދިޔަ ނޮވެމްބަރު މަހުގެ 26ވަނަ ދުވަހުއެވެ. އަދި މިއީ، ސިއްޙަތު ޖަމިއްޔާއިން ކަންބޮޑު ވާންޖެހޭ ދަރަޖައިގަ ކަޑައެޅި، ކޯވިޑ19ގެ 5 ވަނަ ވޭރިއެންޓެވެ.