އެއްވެސް ޤައުމެއްގެ ދާޚިލީ ކަމެއްގެ ތެރެއަށް ނުވަންނާނެ ކަމުގައި ދިވެހި ރާއްޖޭގައި ހުންނަ ޗައިނާ އެމްބަސީން ވިދާޅުވެއްޖެއެވެ.

އިދިކޮޅު ޕްރޮގްރެސިވް ކޯލިޝަނުން އިސްނަގައިގެން މުޅި ރާއްޖޭގައި ހިންގަމުންދާ "އިންޑިއާ އައުޓް" ކެމްޕެއިންގެ ތެރެއިން އިއްޔެ އިދިކޮޅު ޒުވާނުން ވަނީ ބޮޑު ސައިލަކު ބުރެއް މާލޭގައި ބޭއްވުމަށް މަސައްކަތްކޮށްފައެވެ. ނަމަވެސް މިސައިކަލު ކުރިއަށް ގެންދިއުމަށް ފުރުސަތު ނުދީ ފުލުހުންވަނީ ހުރަސް އަޅާފައެވެ.

ސައިކަލު ބުރަށް ހުރަސް އެޅުމުން، އެސަރަހައްދުގައި ހުންނަ ޗައިނާ އެމްބަސީކައިރީގައިވެސް ސައިކަލުބުރަށް ދިޔަ ބައެއް ޒުވާނުން ވަނީ މަޑުކޮށްފައެވެ. އެގޮތުން ވިލިމާލެ ދާއިރާގެ ކައުންސިލަރު ނަހުލާ، ޗައިނާ އެމްބަސީ ދޮރުމަތީގައި ހުއްޓިގެން ހުރި ފޮޓޯ ޓުވީޓު ކުރައްވައި، ރައްޔިތުންގެ މަޖިލީހުގެ ތޮއްޑޫ ދާއިރާގެ އެމްޑީޕީ މެމްބަރު ހަސަން ޝިޔާން ވަނި މިހަރަކާތަކީ ޗައިނާއިން ފަނޑުކޮށްގެން ހިންގާ ހަރަކާތެއްކަމަށް ބުނެފައެވެ.

ޝިއާންގެ މި ޓުވީޓު ދޮގުކުރައްވައި ޗައިނާ އެމްބަސީން ކުރި ޓުވީޓުގައި ބުނެފައިވަނީ ޗައިނާއަކީ އެއްވެސް ޤައުމެއްގެ ދާޚިލީ ކަންކަމުގެ ތެރެއަށްވަދެ، އެކަންކަމާއި ބެހޭނެ ޤައުމެއް ނޫންކަމަށެވެ. އަދި އެއީ އެމްބަސީން އަބަދުވެސް އަމަލު ކުރަމުންދާ އުސޫލުކަމާށާއި، ރާއްޖެއާއި އޮތް ގުޅުން އިތުރަށް ހަރުދަނާކޮށް ބަދަހި ކުރުމަކީ ޗައިނާއިން އަބަދުވެސް ކުރާނެ ކަމެއްކަމަށް ޗައިނާ އެމްބަސީން ވަނީ ބުނެފައެވެ.

The Chinese Embassy would like to emphasize that we always follow the principle of non-interference into the internal affairs of other countries and we are here to promote friendship and cooperation with Maldives.

— Embassy of China in Maldives (@ChinaEmbassy_MV) December 17, 2021

މިސައިލު ބުރާއި ގުޅިގެން ފުލުހުން ބުނެފައިވަނީ މިއީ ހަމަނުޖެހުން ހިންގުމަށް ރާވާފައިވާ ސައިކަލު ބުރަކަށް ވުމުން ސައިކަލު ބުރަށް ޖާގަ ނުދެވޭނެކަމަށެވެ. ފުލުހުން ނެރުނު ނޫސްބަޔާނެއްގައި ވަނީ ޕީޕީއެމްއިން އިންތިޒާމްކޮށްގެން މިއަދު މާލޭގެ މަގުތަކުގައި ބެއްވުމަށް ރާވާފައިވާ އުޅަނދުބުރުގައި ހަމަނުޖެހުން ހިންގަން ރާވަމުންދާކަމުގެ މައުލޫމާތު ދިވެހި ފުލުހުންގެ ޚިދުމަތަށް ލިބިފައިވާކަމަށެވެ. މިފަދަ ހަމަނުޖެހުންތަކަކީ ގިނަ ބަޔަކަށް އޭގެ ނުރައްކާ އޮތް ކަމެއްކަމުގައި މި ޚިދުމަތުން ދެކޭކަމަށާއި، އެހެންކަމުން، އާންމު މަސްލަހަލު ހިމާޔަތްކޮށް، އެއްވުންތަކުގެ ބައިވެރިންނާއި އެހެނިހެން ފަރާތްތައް ހިމެނޭ ގޮތުން، ސަލާމަތާއި ރައްކާތެރިކަން ފޯރުކޮށްދިނުމަކީ ދިވެހި ފުލުހުންގެ ޚިދުމަތުގެ ގާނޫނީ ޒިންމާއެއްކަމަށް ފުލުހުން ވަނީ ބުނެފައެވެ.

އިދިކޮޅު ކޯލިޝަނުން ރައީސް ޔާމީނާއިއެކު ވަނީ މުޅި ރާއްޖޭގައި އިންޑިއާ އައުޓްގެ ބޮޑު ކެމްޕެއިނެއް ފަށާފައެވެ. މިހަރަކާތުގައި ގިނަ އަދަދެއްގެ ބަޔަކުދަނީ ބައިވެރިވަމުންނެ. ޚާއްސަކޮށް ޒުވާނުންނާއި، އަންހެނުން ބައިވެރިވާ އަދަދުވަނީ ވަރަށް ބޮޑަށް އިތުރުވެފައެވެ.