ކޯވިޑް19 ބަލީގައި، އެމެރިކާގައި މަރުވި މީހުންގެ އަދަދު 8 އައްލަކައަށް އަރާފައިވާ ކަމަށް، އެގައުމުގެ ޖޯން ހޮޕްކިންސް ޔުނިވަރސިޓީގެ ހިސާބުތަކުން ދައްކައިފިއެވެ.

އަންގާރަ ދުވަހު އާންމު ކޮށްފައިވާ ހިސާބުތަކުގައި ބުނެފައިވާ ގޮތުން، މިއީ ކޯވިޑް19 ކާރިސާ ދުނިޔޭގައި އާންމުވާން ފެށިފަހުން އެއްގައުމަކުން މި ބަލީގައި މީހުން މަރުވެފައިވާ އެންމެ މަތީ އަދަދެވެ.

މުޅި ދުނިޔޭގެ އާބާދީގެ 4 އިންސައްތަ އެމެރިކާއިން ހިއްސާ ކުރާއިރު، 2019ވަނަ އަހަރު ޗައިނާގެ ވޫހާން ސިޓީން ކޯވިޑް19 އެންމެ ފުރަތަމަ ފެނުނު ފަހުން، މިހާތަނަށް މި ބަލީގައި ދުނިޔެ ދޫކޮށްފައިވާ 5.3 މިލިއަން މީހުންގެ 15 އިންސައްތައަކީ މިބަލީގައި އެމެރިކާގައި މަރުވެފައިވާ މީހުންނެވެ.

"ކޯވިޑް19ގައި އެމެރިކާގެ 800،000 މީހުން ދުނިޔެއާއި ވަކިވެ ދިއުމުގެ ހިތާމަ މިއަދު ފާޅުކުރަމުން ދާއިރު، މިއިން ކޮންމެ މީހެއްގެ ދިރިއުޅުމުގެ މަތިން ހަދާންކޮށް، އެމީހުންގެ ގާތްތިމާގެ މީހުންގެ މައްޗަށް އަހަރެމެން ހެޔޮ ދުޢާކުރަން،" ކޯވިޑް ބަލީގައި އެމެރިކާގައި މަރުވި މީހުންގެ އަދަދު 800،000 އެރުމާއި ގުޅިގެން އެމެރިކާގެ ރައީސް ޖޯ ބައިޑްން އާންމު ކުރެއްވި ބަޔާނެއްގައި ވިދާޅު ވެފައި ވެއެވެ.

"މިހާރު އަހަރެން އެންމެން ވެސް ފިނި މޫސޫމާއި (ވިންޓަރ) އާއި ކުރިމަތި ލާފައިވާއިރު، އަދި އަލަށް ތައާރަފް ވެގެން އުޅޭ އާ ވޭރިއެންޓްގެ ކުރިމަތީގައި، ދޫނީ ނުދީ މި ބައްޔާއި ދެކޮޅަށް ހަގުރާމަ ކުރަމުން ދިއުމުގެ އަޒުން އަހަރެންމެ އެންމެންވެސް އާކުރަން ވާނެ،" ބައިޑްން ވިދާޅުވެފައި ވެއެވެ.

ކޯވިޑް19ގައި އެމެރިކާގައި މަރުވެފައިވާ ގިނަ މީހުންނަކީ، ކޯވިޑް19 ވެކްސިން ޖަހާފައި ނުވާ މީހުންނެވެ. މީގެ ތެރެއިން ވަރަށް ގިނަ މީހުންނަކީ، މިބައްޔަށް ވެކްސިނެއް ހޯދުމުގެ ކުރިން ދުނިޔެ ދޫކުރި މީހުންނެވެ.

އެމެރިކާގައި މިބައްޔާއި ދެކޮޅަށް އެކަށީގެންވާ ގޮތެއްގައި ވެކްސިން ދޭން ފެށިފައިވަނީ، ޑެލްޓާ ވޭރިއެންޓުން އައި މިބަލީ 4ވަނަ ރާޅުގެ ތެރޭގައިއެވެ. އެމެރިކާގެ 332 މިލިއަންގެ އާބާދީގެ 60 އިންސައްތައަށް މިހާރުވަނީ ވެކްސިންގެ ދެ ޑޯޒް ޖަހާ ނިންމާފައެވެ. އެހެންނަމެވސް، އަދިވެސް އެމެރިކާ އުޅެނީ، ވެކްސިން ޖެހުމުގައި ދުނިޔޭގެ ތަރައްގީވެފައިވާ އެހެން ގިނަ ގައުމުތަކަށްވުރެ ފަހަތުގައެވެ.

ކޯވިޑް ބަލީގައި އެމެރިކާގައި މަރުވި މީހުންގެ އަދަދު 8 ލައްކައަށް އަރާފައިވާއި، މިހާރު ދުނިޔެ ދަނީ، ކޯވިޑް19 އާ ވޭރިއެންޓް އާއި ހަގުރާމަ ކުރަމުންނެވެ.