ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގެ ފަސް އަހަރު ދުވަހުގެ ތެރޭގައި އުފެއްދިފައިވަނީ 22 ހާސް ވަޒީފާކަމަށް ވިދާޅުވެ ސަރުކާރުގެ ތަރުޖަމާން މުޙައްމަދު މަބްރޫކް ޢަޒީޒް، އިދިކޮޅަށް ރައްދު ދެއްވައިފިއެވެ.
ކުރީގެ ރައީސް ޢަބްދުﷲ ޔާމީންގެ މައްޗަށް އިއްވި 5 އަހަރުގެ ޖަލު ހުކުމް ސުޕްރީމް ކޯޓުން ބާޠިލްކުރުމުން، އިދިކޮޅުން ރައީސް ޔާމީން ބައިވެރިވެވަޑައިގެން ބޭއްވި ފުރަތަމަ ސިޔާސީ ހަރަކާތުގައިި ރައީސް ޔާމީން ވަނީ އެމަނިކުފާނުގެ ވެރިކަމުގައި އެއް ލައްކަ ހަތަރު ހާސް ވަޒީފާ އުފެއްދިކަމަށް ވިދާޅުވެފައެވެ. ނަމަވެސް މިސަރުކާރުގެ ތިން އަހަރުން ހަ ހާހެއްހާ ވަޒީފާ އުފައްދައިގެން އެކަން ސަރުކާރުން ފާހަގަކުރިކަމަށް ވިދާޅުވެ ރައީސް ޔާމީން ވަނީ ސަރުކާރަށް ފާޑުވިދާޅުވެފައެވެ.
ރައީސް ޔާމީންގެ އެ ވާހަކަތަކަށް ރައްދު ދެއްވައި މަބްރޫކް ވިދާޅުވީ، ސަރުކާރުގައިވެސް އަދި އަމިއްލަ ފަރާތްތަކުންވެސް އުފެދޭ ވަޒީފާގެ ޢަދަދު އެންމެ ރަނގަޅަށް ބެލެން ހުންނަނީ ޕެންޝަން އޮފީހުންކަމަށެވެ. މަބްރޫކް ވިދާޅުވީ ކޯވިޑް-19ގެ އިޤްތިޞާދީ ހީނަރުކަމާއެކު، ރިސޯޓްތައް ބަންދުކޮށް، ބައެއް ވިޔަފާރިތައް ހުއްޓިފައި އޮތް އަހަރަކާއެކު، މިހާތަނަށް މިސަރުކާރަށް 11160 ވަޒީފާ އުފެދިފައިވާކަމަށް ޕެންޝަން އޮފީހުގެ ތަފާސް ހިސާބުތަކުން ދައްކާކަމަށެވެ.
މަބްރޫކް ވިދާޅުވީ ރައީސް ޔާމީންގެ މުޅި ފަސް އަހަރު ދުވަހުގެ ތެރޭގައި ރާއްޖޭގައި އިޤްތިޞާދީ އެއްވެސް ހީނަރުކަމެއް ނެތި އުފެދިފައި ވަނީ 22 ހާހެއްހާ ވަޒީފާކަމަށް ޕެންޝަން އޮފީހުގެ ތަފާސް ހިސާބުތަކުން ދައްކާކަމަށެވެ.
ދުނިޔޭގެ އެންމެ ރަނގަަޅަށް އޮތް ފަސް އަހަރޭ. ޕްރައިވެޓް ވަޒީފާތަކާ ސަރުކާރު ވަޒީފާތަކާއެކު ހުރިހާ ވަޒީފާއެއް އެއްކޮށްލީމަ އަޅުގަނޑުމެންނަށް ލިބެންހުރި ޑޭޓައިން ދައްކަނީ އުފެއްދިފަ ހުރީ 22،000 ވަޒީފާކަމަށް. ސަރުކާރަކަށް ކްލެއިމްވެސްކުރެވޭނީ ޕެންޝަން ލިބި ރަޖިސްޓްރީވެފައި ތިބި ވަޒީފާތައް.
– މުޙައްމަދު މަބްރޫކް ޢަޒީޒް
މަބްރޫކް ވިދާޅުވީ 11 ހާހަށްވުރެ ގިނަ މީހުންނަށް މިސަރުކާރުން މިހާތަނަށް ވަޒީފާގެ ފުރުޞަތު ފަހިކޮށްދިނުމުގެ އިތުރުން އެތައް ބަޔަކަށް ވިޔަފާރީގެ ފުރުޞަތު ހުޅުވާލެވުނުކަމަށެވެ. އެގޮތުން 900އެއްހާ ވިޔަފާރިއަށް އެސްޑީއެފްސީ މެދުވެރިކޮށް ލޯން ދޫކުރެވިފައިވާކަމަށާއި، ރާއްޖޭގައި އެސްއެމްއީ ބޭންކު މެދުވެރިކޮށް އިންވެސްޓްކޮށްގެން ވިޔަފާރިއެއް ނުހިންގާ އެންމެ އަތޮޅެއްވެސް ނެތްކަމަށް މަބްރޫކް ވިދާޅުވިއެވެ.
