2015 ވަނަ އަހަރު އިރަނާއި ދުނިޔޭގެ ބާރުތަކާ ދެމެދު ވެވުނު ނިއުކުލިއަރ އެއްބަސް އަލުން ވުޖޫދަށް ގެނެސް، އެއްބަސްވެވޭ ހައްލެއް ފެނޭތޯ ކުރިޔަށްދާ މަޝްވަރާތައް އޮސްޓްރިއާގެ ވިއެނާގައި ފެށިގެން ކުރިޔަށް ދާކަމަށާއި، އަދި މަސްވަރާ ބައްދަލުވުންތައް ކުރިޔަށްދަނީ، މި އެއްބަސްވުމުގައި ހިމެނޭ ގައުމުގެ ތަކުގެ މެދުގައި އަދި އެމެރިކާ ނުހިމެނޭ ގޮތަށްކަމަށް، މި މަޝްވަރާތަކުގައި ބައިވެރިވާ ރަޝިއާއިން ބުނެފިއެވެ.
" #JCPOA ޖޭސީޕީއޭއޯގެ ބައިވެރިންދަނީ، ޖޮއިންޓް ކޮމިޝަންގެ އޮފިޝަލް ބައްދަލުވުންތައް ބާއްވަމުން،" 2015ވަނަ އަހަރުގެ އެއްބަސްވުމުގެ އަސްލު ނަން ކަމުގައިވާ ޖޮއިންޓް ކޮމްޕރޮހެންސިވް ޕްލޭން އޮފް އެކްޝަންގެ ނަން ބޭނުން ކުރައްވާ ރަޝިއާގެ އެންވޯއި މިޚައިލް އުލިޔަނޯވް ކުރެއްވި ޓުވީގައި ވިދާޅުވެފައި ވެއެވެ.
މިހާރު ކުރިޔަށްދާ މަޝްވަރާތަކަކީ، ވޮޝިންގޓަންއާއި ތެހެރާންއާއި ދެމެދު ނުސީދާ މަޝްވަރާތައް ކުރިޔަށް ގެންދިއުމުގެ ގޮތުން ބާއްވާ ބައްދަލުވުން ތަކެކެވެ. މި މަޝްވަރާތަކުގައި ބައިވެރިވާ އެމެރިކާގެ މަންދޫބު ރޮބް މެލީ، މަޝްވަރާތަކަށް މި ހަފްތާ ބަންދުގެ ކުރިން ވިއެނާއަށް ވަޑައި ނުގަންނަވާނެއެވެ.
އިރާނުގެ ނިއުލިއަރ އެއްބަސްވުމަކީ، އެގައުމަށް ނިއުކުލިއަރ ހަތިޔާރު އުފެއްދުމުގެ މަގު ބަންދުކުރުމުގެ ގޮތުން، ޔޫރޭނިއަމް ފައްކާކުރުން އިރާނުން ހުއްޓާލުމުގެ ބަދަލުގައި، އެގައުމާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް ނައްތާލުމަށް އެއްބަސްވެ، ދުނިޔޭގެ އެންމެ ބާރުގަދަ ގައުމުތަކާއެކު އެގައުމުން ވެފައިވާ އެއްބަސް ވުމެކެވެ.
އެހެންނަމަވެސް އެމެރިކާގެ ކުރީގެ ރައީސް ޑޮނަލްޑް ޓްރަމްޕްވަނީ، 2018ވަނަ އަހަރު އެމެރިކާ މިއެއްބަސްވުމުން ބޭރު ކޮށްފައެވެ. އަދި ޓްރަމްޕްވަނީ، އިރާނާ ދެކޮޅަށް އަޅާފައިވާ އިގްތިސާދީ ދަތި ކުރުމުގެ ފިޔަވަޅުތައް އިހުނަށްވުރެ ވަރުގަދަ ކޮށްފައެވެ.
ޓުރަމްޕްގެ ފަހުން ވެރިކަމަށް ވަޑައިގެންނެވި ޖޯ ބައިޑްން ވިދާޅުވެފައިވަނީ، މި އެއްބަސްވުމަށް އެބުރި ރުޖޫޢަވުމަށް އެނާ ބޭނުންފުޅު ވެވަޑައި ގަންނަވާ ކަމަށެވެ.
އެހެންނަމަވެސް، އިރާނުން ބުނެފައިވަނީ، އެގައުމުން އެބުރި މިއެއްބަސްވުމަށް ދިއުމަށް އެއްބަސްވާނީ، ކުރީގެ އެއްބަސްވުމާއި އެއްގޮތްވާ ގޮތުގެމަތިން، އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެންމެ ފުރަތަމަ އުވާލުމުންނެވެ.
އަދި މިއެއްބަސްވުމުގެ ބައިވެރިންގެ ގޮތުގައި އަދިވެސް ތިބި، ޗައިނާ، ފްރާންސް، ޖާމަނީ، ރަޝިއާ އަދި އިގިރޭސިވިލާތް ވަނީ، އެމެރިކާއާއި އިރާނުވެސް، މިއެއްބަސްވުމަށް އެބުރި ރުޖޫޢުވުމަށް ބޭނުންވާ މަޝްވަރާތައް ފެށުމަށް ބާރުއަޅާފައެވެ.
