ބަޔާން އަތުން ބަލިވެ ބާސެލޯނާ ޔޫރޮޕާ ލީގަށް

ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ރޭ ޖަރުމަނުގެ ބަޔާން މިއުނިކް އަތުން ބަލިވެ ސްޕެއިންގެ ބާސެލޯނާ ޔޫރޮޕާ ލީގުގައި ވާދަކުރަން ޖެހިއްޖެއެވެ.

ބަޔާން މިއުނިކްގެ އަމިއްލަ ދަނޑުގައި ރޭ ބާސެލޯނާގެ މައްޗަށް އެޓީމު ކުރިހޯދީ 0-3 ގެ ނަތީޖާއަކުންނެވެ.

ބާސެލޯނާ އެންމެ ފަހުން ޔޫރޮޕާ ލީގުގައި ކުޅެފައިވަނީ 2003-2004 ވަނަ އަހަރުގެ ސީޒަނުގައެވެ. އެންމެ ފަހުން ބާސެލޯނާ ޗެމްޕިއަންސް ލީގު ގުރޫޕް ސްޓޭޖުން ކަޓައި، ޔޫރޮޕާ ލީގުގައި ވާދަކުރަން ޖެހުނީ 2000-2001 ވަނަ އަހަރުގެ ސީޒަނުގައެވެ. އެހެންކަމުން މިއީ ވޭތުވެދިޔަ 20 އަހަރުގެ ތެރޭގައި ޗެމްޕިއަންސް ލީގުގެ ގްރޫޕް ސްޓޭޖުން ބާސެލޯނާ ކެޓި ފުރަތަމަ ފަހަރެވެ.

ޖަރުމަނުގައި ކޯވިޑް-19 ފެތުރެމުންދާތީ ސަޕޯޓަރުން ނުވައްދާ ކުޅުނު މެޗުގައި ބަޔާނުން ފުރަތަމަ ލަނޑު ޖަހާ ލީޑު ނެގީ މެޗުގެ 34 ވަނަ މިނެޓުގައެވެ. މި ލަނޑު ބަޔާންއަށް ކާމިޔާބުކޮށްދިނީ، ތޯމަސް މުލާއެވެ. އަދި ފުރަތަމަ ހާފް ނިމުމުގެ ކުރިން ބަޔާނުން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު ކާމިޔާބުކޮށްދިނީ، ލެރޯއީ ސާނޭއެވެ.

ބަޔާން މިއުނިކް މި މެޗުގައި ޖެހި ތިންވަނަ ލަނޑު ދެވަނަ ހާފް ފަށައިގެން 62 ވަނަ މިނެޓުގައި ޖެހީ ޖަމާލް މުސިއާލާ އެވެ.

ބާސެލޯނާ ބަލިކޮށް ބަޔާން މި ހޯދި މޮޅާއެކު އެޓީމު ވަނީ ގްރޫޕް އީ ގެ އެއްވަނަ ޓީމުގެ ގޮތުގައި ގަދަ 16 އިން ޖާގަ ހޯދާފައެވެ. ބަޔާން ވަނީ ގްރޫޕް ސްޓޭޖުގައި ކުޅުނު 6 މެޗުން 18 ޕޮއިންޓް ހޯދާފައެވެ. އެއީ ކުޅުނު ހުރިހާ މެޗެއް ކާމިޔާބުކޮށްގެންނެވެ. ގްރޫޕްގެ ދެވަނަ ޓީމުގެ ގޮތުގައި 6 މެޗުން ހޯދި 8 ޕޮއިންޓާއެކު ގަދަ 16 އިން ޖާގައެއް ކަށަވަރުކުރީ ޑީނަމޯ ކިއޭވްގެ މައްޗަށް ރޭ 0-3 ގެ ނަތީޖާއަކުން ކުރި ހޯދި ބެންފިކާއެވެ.