މާލޭގެ މަގުމަތިން ސިފައިންގެ މީހަކު ހިފަހައްޓައި، ފައިސާ ހޯދުމަށް ރަހީނުކުރި މައްސާލާގައި 3 މީހަކު ފުލުހުން ހައްޔަރުކޮށްފިއެވެ.
ސިފައިންގެ މީހަކު ރަހީނުކުރީ އެގޮތަށް މީހުން ރަހީނުކޮށް ފައިސާ ހޯދާ ބޮޑު "ނެޓްވޯކަކުން" ކަމަށާއި އޭނާ ރަހީނުކޮށްފައި ވަނީ އޮޅުވާލައިގެން ވިލިމާލޭ ގެސްޓްހައުސްއަކަށް ގެންދިއުމަށް ފަހުކަން ވަނީ ހާމަވެފައެވެ.
ފުލުހުން ބުނީ މި މައްސާލގައި ދިވެހި ތިން ފިރިހެނަކު ކޯޓް ޢަމުރެއްގެ ދަށުން ހައްޔަރުކޮށްފައިވާކަމަށެވެ. އެއީ 18 އަހަރުގެ މީހަކާއި 21 އަހަރުގެ މީހަކާއި، 29 އަހަރުގެ މީހެއްކަމަށް ފުލުހުން ބުންޏެވެ. އަދި މި މައްސަލައާއި ގުޅިގެން ވިލިމާލޭ ގެސްޓްހައުސްއެއް ބަލައި ފާސްކޮށްފައިވާކަމަށްވެސް ފުލުހުން ބުންޏެވެ.
އެމްއެންޑީއެފްގެ ކޯސްޓުގާޑުގައި މަސައްކަތް ކުރާ އުމުރުން 37 އަހަރުގެ ހަސަން ފަހީމް މާލޭ މަގުމަތިން ރަހީނުކޮށް އަނިޔާ ކޮށްފައިވާ މައްސަލައެއް ފުލުހުން ބަލަން ފަށާފައިވަނީ މިދިޔަ މަހުގެ 18ގައެވެ. ރަހީނުކޮށްފައިވަނީ މިދިޔަ ބުދަ ދުވަހުގެ ރޭ މާފަންނު އޭސް ހާޑްވެއާ ކައިރީގައި އޮންނަ ގޯޅިގަނޑަކުން ހިނގާފައި ދަނިކޮށް، ފައިސާގެ ބޭނުމުގައި ކަމަށް ފަހީމްގެ އާއިލާއިން ތުހުމަތުކުރެއެވެ. ނަމަވެސް ފުލުހުން ފަހުން ބުނެފައިވަނީ ރަހީނު ކުރީ ނޫންކަމަށެވެ.
37 އަހަރުގެ ސާޖަންޓް ޙަސަން ފަހީމް ތަނަކަށް ގެންގޮސް ފައިސާ ހޯދަން ބަޔަކު ކުރި މަސައްކަތް ކާމިޔާބު ނުވުމުން އައިޖީއެމްއެޗް ކައިރިއަށް ގެންގޮސް މަގުމައްޗަށް އޭނާ ވައްޓާލާފައިކަމަށް ޢާއިލާއިން ބުނެފައިވެއެވެ. ފަހީމް ވިލިމާލޭ ގެސްޓްހައުސްއަކަށް ގެންދިޔައީ އޭނާއާ ސީދާ ގުޅުމެއް ނެތް ނަމަވެސް އެ މީހަކާއި ފަހީމާ ދެމެދު ކޮންމެވެސް ކަހަލަ މުއާމަލާތްތަކެއް ކުރެވިގެން، ބަޔަކު ރާވައިގެންކަމަށް ބައެއް މީޑިއާތަކުން ރިޕޯޓްކޮށްފައިވެއެވެ.
ގެސްޓްހައުސްއަށް ގެންގޮސް އެ ގްރޫޕުން ވަނީ އޭނާ ބަރަހަނާކޮށް، ފޮޓޯ ނަގައި ބެލެކްމެއިލްކޮށްފަ އެވެ. އަދި ފައިސާ ހޯދުމަށް އަނިޔާ ކުރީއެވެ.
މި މަހު ކުރީކޮޅު ވެސް މީހަކު ވިލިމާލޭ ގެސްޓްހައުސްއަކަށް ގެންގޮސް ފައިސާ ހޯދަން އުޅުނު މައްސަލައެއް ފެންމަތިވެފައިވެއެވެ. ސްޓާފް ސާޖަންޓް ޙަސަން ފަހީމް، ރަހީނުކޮށް އަނިޔާތަކެއް ދީފައިވާތީ، ދިވެހިރާއްޖޭގެ ޤައުމީ ދިފާއީ ބާރުންވަނީ އެކަން ހަރުކަށި އިބާރާތުން ކުށްވެރިކޮށް ނެރުނު ނޫސްބަޔާނުގައި ވަނީ ޤައުމީ ދިފަޢި ބާރުންވަނީ މި އަނިޔާވެރި ހަމަލާ ދިނުމުގައި ބައިވެރިވި ފަރާތްތައް ހޯދައި، އިންސާފުގެ ކުރިމައްޗަށް ގެނައުމަށް ކުރަންޖެހޭ މަސައްކަތްތައް ފުލުހުންގެ ޚިދުމަތުންކުރަމުންދާކަމަށެވެ. ޤައުމީ ދިފާޢީ ބާރުން ވިދާޅުވީ، ރައްޔިތުންގެ ހިތްތަކުގައި ބިރުވެރިކަން އުފައްދައި، ނުރައްކަލުގެ ތެރެއަށް ގެންދަން މަސައްކަތްކުރާ ފަރާތްތަކުން ކުރަމުންދާ ޢަމަލުތަކަކީ އެއްވެސް ފަރާތަކުން ޖާގަ ދެވިގެންވާނެ ޢަމަލުތަކެއް ނޫންކަމަށާ، ސިފައިންނަށް ދޭ މިފަދަ ފިނޑި ހަމަލާތަކުގެ ސަބަބުން ޤައުމީ ޚިދުމަތުގައި ސިފައިން ކުރަމުންދާ މަސައްކަތަށް އެއްވެސް ލޮޅުމެއް އަރުވައި ނުލެވޭނެކަމަށްވެސް ބަޔާނުގައިވެއެވެ.
