ކުރީގެ ރައީސް ޔާމީނަށް ރައްޔިތުންގެ ފަރާތުން އޮތް ތާއީދެއް މިސަރުކާރަށާއި، ރައީސް އިބްރާހިމް މުހައްމަދު ޞާލިހަށް ނުލިބޭނެކަމަށް ވިދާޅުވެ، ޕީޕީއެމްގެ ނައިބް ރައީސް އަހުމަދު ޝިޔާމްގެ ރައްދު ޓުވަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
ކުރީގެ ރައީސް އަބްދުﷲ ޔާމީނަށް މަރުހަބާ ކިޔުމަށް ގިނަ އަދަދެއްގެ ބަޔަކު ދިއުމުން އެކަމާއި ހިތްހަމަ ނުޖެހި މައުސޫމް ކުރެއްވި ޓުވީޓަށް ރައްދު ދެއްވައި ޝިޔާމް ވިދާޅުވީ ރައްޔިތުންގެ ތާއީދު އޮތް ވެރިޔަކަށް މަރުހަބާ ދަންނަވައި، ތާއީދު އޮތްކަން ދެއްކުމަށް ރައްޔިތުން ގުލްދަސްތާކާއި، ވެދުންތައް އަރުވާނެކަމަށެވެ. އެކަމަކީ ނުރުހޭ ބަޔަކު ކިތަންމެ ނުރުހުނު ކަމުގައި ވީނަމަވެސް ހުއްޓުވޭނެ ކަމެއްނޫންކަމަށެވެ.
މިސަރުކާރުން ރައްޔިތުންނަށް ވެފައިވާ ވައުދުތައް ނުފުއްދޭ ތަނުގައި، ދެއްކެވި ވާހަކަތައްވެސް މިއަދު ފަރިއްސައް ވެފައިވާކަމަށް ޝިޔާމް ވިދާޅުވިއެވެ. ޑރ.މައުސޫމަކީވެސް އައްޑޫ ސިޓީގެ ރައްޔިތުންގެ ޖީބަށް ޕައުންޑު ވައްދާނެކަމަށް ވައުދުވި ބޭފުޅަކަށްވާއިރު މިއަދާއި ހަމައަށްވެސް އެޕައުންޑު ވަތް ޖީބެއް ނެތްކަމަށް ވިދާޅުވެ ޝިޔާމްވަނީ މައުސޫމާއި އެސުވާލު ކުރައްވާފައެވެ.
މުއްސަނދިކަމަކީ ބަންޑާރަ ތިޖޫރީގައި ހުންނަންޖެހޭ އެއްޗެއްކަމެއް ނުދެނަހުރިން. ކޮބައިތޯ ކީހާ ޅެން. ރައްޔިތުންގެ ޖީބަށް ޕައުންޑު ވައްދާ ނިމުނީތޯ. ސްލޯލިހު އަކީ ގަބީލާ ތަކުން ގުލްދަސްތާ އަރުވާވަރުގެ ވެރިއަކަށް ނުވާތީ އެފަދަ މަންޒަރެއް ނުފެންނަނީ. ހިތްޕުޅަށް ތަދުވާނެކަން އެނގޭ.
– ޝިޔާމް ވިދާޅުވިއެވެ.
ޔާމީނަށް މަރުހަބާ ކިޔަން އެހާގިނަ ބަޔަކު ނިކުތުމުން މައުސޫމަށް ކަމަކު ނުދިޔަ
މަނީލޯންޑްރިންގެ ދައުވާ ސާބިތު ނުވާ ކަމަށް ކަނޑައަޅައި, ކުރީގެ ރައީސް އަބްދުالله ޔާމީން އަބްދުލްގައްޔޫމްގެ މައްޗަށް ކްރިމިނަލް ކޯޓުން އިއްވާފައިވާ ޚުކުމް ސުޕްރީމް ކޯޓުން ބާތިލުކޮށްފައިވަނީ މިދިޔަ ހަފްތާގެ އަންގާރަ ދުވަހުއެވެ.
ރައީސް ޔާމީން މިނިވަން ވުމުގެ އުފަލުގައި "މަރުހަބާ ރައީސް ޔާމީން" މިނަމުގައި ރޭ ކާނިވާ ސަރަހައްދުގައި ބޭއްވި ޖަލްސާއަށް ގިނަ އަދަދެއްގެ ބަޔަކު ވަނީ ހާޒިރުވެ ޔާމީނަށް މަރުހަބާ ކިޔާފައެވެ. ޓުވަރިޒަމް މިނިސްޓަރ އަބްދުﷲ މައުސޫމް ވިދާޅުވީ ކޮރަޕްޓް ބޭފުޅަކަށް ގަބީލާ ގަބީލާ ހަދައިގެން މަރުހަބާކިޔައި ގުލްދަސްތާތައް ވެދުން ކުރުމަކީ އެހާ ރަނގަޅު ކަމެއް ނޫންކަމަށެވެ.
އެ ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ މިއަދުވެސް ރާއްޖޭގެ އިންފްލޭޝަން ހުރީ ނިސްބަތުން އަދިވެސް ދަށުގައި ކަމަށެވެ. އެހެންނަމަވެސް، މިހާރު ފޯކާސްޓު ކުރެވޭ ގޮތުގައި 2022 ވަނަ އަހަރާ ހަމައަށް ދާއިރު، އިންފްލޭޝަން ހުންނާނީ 1.1 އިންސައްތައިގެ ކަމަށެވެ. މާނައަކީ، މަތިވެގެން މިދިޔައީ ކުރީ ސަރުކާރުގަ އިންފްލޭޝަން ހުރި މިންވަރުގެ 10 ގުނަ ކަމަށާއި، އެހެންނަމަވެސް، ތަރުކާރީ ކިލޯއެއް ބާޒަރުން ގަންނަން ދާއިރު ވީލް ބަރޯއެއްގެ ފައިސާ ހިފައިގެން ދާޖެހޭ ހާލަތަށް ގޮސްގެން ނުވާނެ ކަމުގައެވެ.
