ކުރީގެ ރައީސް އަބްދުﷲ ޔާމީނަށް މަރުހަބާ ކިޔުމަށް ގިނަ އަދަދެއްގެ ބަޔަކު ދިއުމުން އެކަން މިސަރުކާރުގެ ޓުވަރިޒަމް މިނިސްޓަރ ޑރ.އަބްދުﷲ މައުސޫމަށް ކަމަކު ނުދިޔައެވެ.

މަނީލޯންޑްރިންގެ ދައުވާ ސާބިތު ނުވާ ކަމަށް ކަނޑައަޅައި, ކުރީގެ ރައީސް އަބްދުالله ޔާމީން އަބްދުލްގައްޔޫމްގެ މައްޗަށް ކްރިމިނަލް ކޯޓުން އިއްވާފައިވާ ޚުކުމް ސުޕްރީމް ކޯޓުން ބާތިލުކޮށްފައިވަނީ މިދިޔަ ހަފްތާގެ އަންގާރަ ދުވަހުއެވެ.

ރައީސް ޔާމީން މިނިވަން ވުމުގެ އުފަލުގައި "މަރުހަބާ ރައީސް ޔާމީން" މިނަމުގައި ރޭ ކާނިވާ ސަރަހައްދުގައި ބޭއްވި ޖަލްސާއަށް ގިނަ އަދަދެއްގެ ބަޔަކު ވަނީ ހާޒިރުވެ ޔާމީނަށް މަރުހަބާ ކިޔާފައެވެ. ޓުވަރިޒަމް މިނިސްޓަރ އަބްދުﷲ މައުސޫމް ވިދާޅުވީ ކޮރަޕްޓް ބޭފުޅަކަށް ގަބީލާ ގަބީލާ ހަދައިގެން މަރުހަބާކިޔައި ގުލްދަސްތާތައް ވެދުން ކުރުމަކީ އެހާ ރަނގަޅު ކަމެއް ނޫންކަމަށެވެ.

މިފަދަ ކަންކަމުން ދޭހަވާ ކަމަކީ ކޮރަޕްޝަނަކީ އާދައަކަށްވެ، ރައްޔިތުންނަށް ލިބެންޖެހޭ އާމްދަނީ ނުލިބި ދަރަނިވެރި ވުންވެސް ރައްޔިތުންނަށް އޯކޭ ކަމަށެވެ. މިފަދަ ސިޔާސީ ފަރާތްތަކުން ޖަހާހާ ބެރަކަށް ނެށުމަކީ އެއްގޮތަކަށްވެސް ކޮސްގެންވާނެ ކަމެއް ނޫންކަމަށް މައުސޫމް ވިދާޅުވިއެވެ.

ކޮރަޕްޓުފުޅު ފަރާތްތަކަށް ގަބީލާގަބީލާގެ ބޮޑުން ގުލްދަސްތާ ވެދުންކުރާނަމަ އެގައުމެއްގާ ކޮރަޕްޝަނަކީ އާދަކާދައަކަށްވެ، ގައުމުގެ މުއްސަނދިކަން ބަންޑާރަތިޖޫރިންބީވެ، ގައުމު ދަރަނިވެރިވެ، ރައްޔިތުން ބޮޑުތަނުން ފަގީރުވެ އަޅުވެތިވާނެ. ސިޔާސީބެރަށް ނެށުމުގެ ކުރިން ފިކުރުކޮށްލަމާ!

– މައުސޫމް ވިދާޅުވިއެވެ.

ރޭގެ ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ މިއަދުވެސް ރާއްޖޭގެ އިންފްލޭޝަން ހުރީ ނިސްބަތުން އަދިވެސް ދަށުގައި ކަމަށެވެ. އެހެންނަމަވެސް، މިހާރު ފޯކާސްޓު ކުރެވޭ ގޮތުގައި 2022 ވަނަ އަހަރާ ހަމައަށް ދާއިރު، އިންފްލޭޝަން ހުންނާނީ 1.1 އިންސައްތައިގެ ކަމަށެވެ. މާނައަކީ، މަތިވެގެން މިދިޔައީ ކުރީ ސަރުކާރުގަ އިންފްލޭޝަން ހުރި މިންވަރުގެ 10 ގުނަ ކަމަށާއި، އެހެންނަމަވެސް، ތަރުކާރީ ކިލޯއެއް ބާޒަރުން ގަންނަން ދާއިރު ވީލް ބަރޯއެއްގެ ފައިސާ ހިފައިގެން ދާޖެހޭ ހާލަތަށް ގޮސްގެން ނުވާނެ ކަމުގައެވެ.

ރައީސް ޔާމިން ވިދާޅުވީ، ނިސްބަތުން އިމްފްލޭޝަނަށް އައިސްފައިވާ ބަދަލުގެ ނަތީޖާއެއްގެ ގޮތުން، މުދަލުގެ އަގު މައްޗަށް ދާނެ ކަމަށާއި، ގެދޮރުގެ ރެންޓުވެސް މައްޗަށް ދާނެ ކަމަށެވެ. ރައީސް ޔާމިން ވިދާޅުވީ މިއަންނަ އަހަރުން ފެށިގެން މަސްވެރިންގެ ޖީބުތައް ޑޮލަރުން ފުރަނާނެ ކަމަށް މިއަދު ބުނި ނަމަވެސް، ދިވެހި މަސްވެރިން ގުބޯ ހެއްދޭނީ ކިހާ ދުވަހެއްތޯ މިއަދު ސުވާލު ކޮށްލަން ޖެހޭކަމަށެވެ.