ކުރީގެ ރައީސް ވަހީދުގެ ކިބައިން ބަޢާވާތް ކުރުމުގެ ސިފަ ނޫނީ ނުފެނަ ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ކުރީގެ ރައީސް މުހައްމަދު ނަޝީދުގެ ވެރިކަން 2012 ވަނަ އަހަރު ވެއްޓުމާއި ގުޅިގެން އެމްޑީޕީގެ އެންމެ ގިނަ މެމްބަރުންގެ ނުރުހުން އަމާޒުވެފައިވާ ބޭފުޅަކީ ރައީސް ވަހީދެވެ. ނަޝީދުގެ ވެރިކަން ބަދަލު ކުރުމުގައި އޭރު ހިނގައިދިޔަ ކަންތައްތަކުގެ މޭސްތިރިޔަކީ ރައީސް ވަހީދުކަމަށް އެމްޑީޕީ މެމްބަރުން ތުހުމަތު ކުރެއެވެ.
ރޭ ޕީޕީއެމުން ބޭއްވި ޖަލްސާގައި ވަހަކަ ދައްކަވަމުން ރައީސް ވަހީދު ވަނީ މިއަދު ފެންނަނީ ދައުލަތުގެ މާލިއްޔަތު ބަނގުރޫޓުވެފައިވާ މަންޒަރު ކަމަށާއި ރާއްޖޭގައި މިހާރު އޮތް އިގްތިސާދީ އަނދަވަޅުން ގައުމު ސަލާމަތް ނުވާތަން ކަމަށެވެ. މިހާރު އެންމެ ރަނގަޅު ގޮތަކީ ރައީސް ޔާމީނާއި ވެރިކަން ހަވާލު ކުރުންކަމަށް ވަހީދު ވަނީ ވިދާޅުވެފައެވެ.
ވަހީދުގެ ވާހަކަތަކާއި ގުޅިގެން ވައްޑެ ވިދާޅުވީ ރައީސް ވަހީދުގެ ކިބައިން ފެނިގެންދަނީ، މުޅިންވެސް ބަޣާވާތް ކުރުމުގެ ސިފަ ކަމަށެވެ.
އެއްފުޅަށް މަތިން ފުންމާލި ބަކަރި އަނެއް ފުޅަށް މަތިން ފުންމާލާނެއޭ ބުނާހެން، ބ. ވަހީދުގެ ކިބައިން ބަޢާވާތް ކުރުމުގެ ސިފަ ނޫނީ ނުފެނޭ.
– ވައްޑެ ވިދާޅުވިއެވެ.
ރޭގެ ޖަލްސާގައި ވަހީދު ވަނީ ޔާމީންގެ ވެރިކަމުގައި ފެނުނީ ރާއްޖޭގައި ބޮޑެތި ކަންތައްތަކެއް ކުރެވުނުތަން ކަމަށާއި ނަމަވެސް މިއަދު ހުރިހާ ދިމާލަކުން ފެންނަނީ ކަންނެތްކަމާއި އިހުމާލާއި ފަރުވާކުޑަކަން ކަމަށްވެސް ވިދާޅުވެފައެވެ. އަދި ވެރިކަމަަށް މީހަކު އަންނަންވާނީ ގައުމުގެ ކުރިމަގާމެދު ތަސައްވުރެއް އޮވެގެން ކަމަށާއި ނަމަވެސް ކުރިއަށް އޮތް އަހަރުތަކުގައި ގައުމު އޮންނާނެ ގޮތުގެ ތަސައްވުރެއް ވެސް މި ސަރުކާރު ބުނެދެވިފައި ނުވާ ކަމަށް ވަހީދު ވިދާޅުވިއެވެ.
ކޮމެންޓު ފޮނުވާ