ގައުމީ ނެޓްބޯޅަ މުބާރާތުގެ ފައިނަލަށް ދަތުރުކުރި ޓީމުތައް ކަށަވަރުވެއްޖެ

މިހާރު ކުރިޔަށްދާ ގައުމީ ނެޓްބޯޅަ މުބާރާތުގެ އަންހެން އަދި ފިރިހެން ޑިވިޝަންގެ ފައިނަލަށް ދަތުރުކުރި ޓީމުތައް ކަށަވަރުވެއްޖެއެވެ.

މި މުބާރާތް ކުރިޔަށްދަނީ 22 ނޮވެމްބަރ އިން 5 ޑިސެމްބަރ ގެ ނިޔަލަށް މާފަންނު ޒުވާނުންގެ މަރުކަރުގެ އިންޑޯރ ކޯޓުގައެވެ.

އަންހެން އަދި ފިރިހެން ޑިވިޝަނަށް ހުޅުވާލައިގެން ކުރިއަށް ގެންދާ މިއަހަރުގެ މުބާރާތުގައި އަންހެން 9 ޓީމު ވަނީ ބައިވެރިވެފައެވެ. އަންހެން ޑިވިޝަން ކުރިޔަށް ގެންދަނީ މި 9 ޓީމު ދެ ގްރޫޕަކަށް ބަހާލައިގެންނެވެ. މި މުބާރާތުގެ ފިރިހެން ޑިވިޝަންގައި ބައިވެރިވެފައިވަނީ 3 ޓީމެކެއެވެ. އެއީ ސްކައިލާރކް، ކޭވައިއާރްސީ އަދި މެޓްރިކްސްއެވެ.

މި މުބާރާތުގެ އަންހެން ޑިވިޝަންގެ ފައިނަލަށް ދަތުރުކުރީ، ކުޅުދުއްފުށި ޔޫތް އެންޑް ރެކްރިއޭޝަން (ކޭވައިއާރްސީ) އާއި ކްލަބް ގްރީންސް ސްޓްރީޓްސްއެވެ. ކްލަބް ގްރީން ސްޓްރީޓްސް ފައިނަލުން ޖާގަ ހޯދީ ސެމީ ފައިނަލުގައި މަހިބަދޫ ސްޕޯޓްސް ކްލަބާއި ވާދަކޮށް، 64 ޕޮއިންޓު 37 ޕޮއިންޓުން މެޗު ކާމިޔާބުކޮށްގެންނެވެ. ކުޅުދުއްފުށި ޔޫތް އެންޑް ރެކްރިއޭޝަން ފައިނަލަށް ދަތުރުކުރީ ސެމީ ފައިނަލުގައި ކްލަބް ޝައިނިންގ ސްޓާރގެ މައްޗަށް 46 ޕޮއިންޓު 37 ޕޮއިންޓުން ކުރި ހޯދައިގެންނެވެ.

މި މުބާރާތުގެ އަންހެން ޑިވިޝަންގެ ފައިނަލް މެޗު ކުޅުމަށް ހަމަޖެހިފައިވަނީ މާދަމާ ރެއެވެ.

މުބާރާތުގެ ފިރިހެން ޑިވިޝަންގެ ފައިނަލަށް ދަތުރުކުރީ ކުޅުދުއްފުށި ޔޫތް އެންޑް ރެކްރިއޭޝަން (ކޭވައިއާރްސީ) އާއި ކްލަބް މެޓްރިކްސް އެވެ. ފިރިހެން ޑިވިޝަންގެ ފައިނަލް މެޗު އޮންނާނީ މިރޭ ޒުވާނުންގެެ މަރުކަޒުގެ އެތެރޭ ކޯޓުގައެވެ.