އިދިކޮޅު ޕްރޮގްރެސިވް ކޮންގްރެސް ކޯލިޝަނުން ރައީސް ޔާމީނަށް މަރުޙަބާ ދެންނެވުމަށް ރޭ ބޭއްވި ޖަލްސާއިން ފެނުނީ ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވާ ދެތިން ބޮޓުންތޯ ވިދާޅުވެ ނައިފަރު ދާއިރާގެ މެންބަރު އަދި ޕީޕިއެމްގެ ނާއިބު ރައީސް އަޙްމަދު ޝިޔާމް ސުވާލުކުރައްވައިފިއެވެ.
ރޭ އިދިކޮޅުން ކާނިވާ ސަރަހައްދުގައި ބޭއްވި ޖަލްސާގައި ވަނީ އެތައް ސަތޭކަ ބަޔަކު ބައިވެރިވެފައެވެ. ފަހުގެ ތާރީޚެއްގައި ބޭއްވި ސިޔާސީ އެންމެ ބޮޑު އެއް ޖަލްސާގެ ފޮޓޯތަކާއެކު ޝިޔާމް މި ސުވާލު ކުރައްވާފައިމިވަނީ ޑިފެންސް މިނިސްޓަރ މާރިޔާ އަޙްމަދު ދީދީ ދާދަި ފަހުން އިންޑިއާއަށް ކުރެއްވިދަތުރުފުޅުގައި، "އިންޑިއާ އައުޓް" ކެމްޕެއިނަކީ ސޯޝަލް މީޑިއާގެ ބޮޓުން ބޭނުންކޮށްގެން ހިންގާ ކެމްޕެއިނެއް ކަމަށް ވިދާޅުވުމާއި ގުޅިގެންނެވެ.
އެކަމަށް ރައްދު ދެއްވައި ރޭގެ ޖަލްސާގައި ބައިރިވި އެތައް ސަތޭކަ ބަޔަކަށް އިޝާރާތްކުރައްވާ ޝިޔާމް ވަނީ އެއީ މާރިޔާ ވިދާޅުވާ ބޮޓުންތޯ ސުވާލުކުރައްވާފައެވެ. އަދި އެއީ އެކަމަނާ ވިދާޅުވާ ހައެއްކަ ކެނާތޯވެސް ޝިޔާމް ސުވާލުކުރެއްވިއެވެ.
މީތޯ މާރިޔާ ވިދާޅުވާ ބޮޓުންނަކީ؟ މީތޯ މާރިޔާ އެ ވިދާޅުވާ ހައެއްކަ ކެނާ އަކީ؟ ދަންނަވާލަން އޮތީ މީ ޕީޕީއެމް ޕީއެންސީ އަދި ރައީސް ޔާމީންގެ ސިޔާސަތުތަކަށް ތާޢީދުކުރައްވާ ދިވެހި ލޮބުވެތި ރައްޔިތުން. މިއީ "އިންޑިއާ މިލިޓަރީ އައުޓް" އޭ ގޮވާ ރައްޔިތުންގެ ބޮޑު ލަޝްކަރު އިންޝާ ﷲ.
Meetho @MariyaDidi vidhaalhuvaa botunnakee? Meetho @MariyaDidi e vidhaalhuva haekka kena akee? Mariya ah dhannavaalan othee mee PPM-PNC adhi RY ge siyaasathuthakah thaaeed kuravva dhivehi lobuvethi rayyithun. Mee #IndiaMilitaryOut ey govaa rayyithunge bodu lashkaru In Sha Allah. pic.twitter.com/VpBGRvvWt0
— Ahmed Shiyam (@Shiyamaldives) December 3, 2021
ޝިޔާމް މިހެން ވިދާޅުވެފައިވާއިރު، މިނިސްޓަރ މާރިޔާ އިންޑިއާއަށް ކުރެއްވި ދަތުރުފުޅުގައި ވޯލްޑް އިން ވަން ނިއުސް (ވިއޯންއަށް) ދެއްވި އިންޓަރވިއުއެއްގައި ވިދާޅުވީ އިންޑިއާ އައުޓް ކެމްޕެއިންގެ ހުރިހާވެސް އަމާޒަކީ ރާއްޖެއާއި އިންޑިއާއި ދެމެދު އޮތް ގާތް އެކުވެރި ގުޅުން ހީނަރުކުރުންކަމަށެވެ. އަދި އެއްވެސް އަސްލެއްނެތް ހަގީގަތާއި ޚިލާފް ވާހަކަ ދައްކައިގެން ދޭތެރެ ޖެއްސުމަކީ އެމީހުންގެ މަގްސަދުކަމަށެވެ. މިކަން ކުރަމުންދަނީ ރާއްޖޭގެ ސޯޝަލް މީޑިއާގައި ހަރަކާތްތެރިވާ މަދު ބޮޓުންތަކެއް ކަމުގައި މާރިޔާ ވަނީ ސިފަ ކުރައްވާފައެވެ.
މިމަސައްކަތުގައި އިސްކޮށް ހަރަކާތްތެރިވާ މީހުންނަކީ ސަރުކާރުން ޑްރަގާިއ ދެކޮޅަށް ކުރަމުންދާ މަސައްކަތާއި ނުހަނު ބޮޑަށް ކަންބޮޑުވާ، އެކަން ހުއްޓުވުމަށް ކުރާ މަސައްކަތާއި ދެކޮޅު ހަދާ މީހުންކަމަށްވެސް މާރިޔާ ވިދާޅުވިއެވެ. އަދި މިމީހުންނަކީ ޤާނޫނުތަކާއި ގަވާދުތަކަސް ބޯނުލަބާ، ކޮރަޕްޝަނާއި ފަސާދައިގެ އަމަލުތަކަށް ހިތްވަރު ދޭބައެއްކަމަށްވެސް މާރިޔާ ވިދާޅުވިއެވެ.
ރާއްޖެއާއި އިންޑިއާއާއި އޮތް ގުޅުމުގެ ތެރެއިން އަދި ވެފައިވާ އެއްބަސްވުންތަކުގެ ތެރެއިން ގިނަ އަދަދެއްގެ މަސްތުވާތެކެތި މިހާރު ގެންދަނީ އަތުލައި ގަންނަމުން ކަމަށާއި، މިކަމަކީ "އިންޑިއާ އައުޓް" ހަރަކާތް ހިންގާ މީހުންނަށް ބަލަން އެހާ ފަސޭހަ މަންޒަރެއް ނޫންކަމަށް މިނިސްޓަރ މާރިޔާ ވިދާޅުވިއެވެ.
މާރިޔާ ވަނީ އިންޑިއާއާއި ރާއްޖެއާއި ދެމެދު އޮތް އެކުވެރި ގުޅުމަށް ތައުރީފް ކުރައްވާފައެވެ. އަދި މިހެން މަދު ބަޔަކު ކުރާ ކަމަކުން ދެޤައުމުގައި އޮތް ގުޅުމަށް އެއްވެސް ހީނަރުކަމެއް ނާންނާނެކަމަށާއި، ދެޤައުމުގެ ގުޅުން ކުރިއަށް އޮތް ތަނުގައިވެސް ދާނީ އިތުރަށް ބަދަހި ވަމުންކަމަށް މާރިޔާ ވިދާޅުވިއެވެ.
މާރިޔާ މިފަދައިން ވިދާޅުވިއިރު، ރާއްޖޭގައި ތިބި އިންޑިއާ ސިފައިން ބޭލުމަށާއި، އިންޑިއާއާއިއެކު ހަދާފައިވާ އެއްބަސްވުނަތައް ހާމަކުރުމަށް ގޮވާލައި އެތައް ސަތޭކަ ބަޔަކު ދަނީ މާލެއާއި އަތޮޅު ތެރޭގައިވެސް ބޮޑެތި އެއްވުންތައް ބާއްވަމުންނެވެ. މިއެއްވުނަތަކުގެ މައުލޫމާތު ބައިނަލް އަގުވާމީ މީޑިއާތަކުގެ ސަމާލުކަމަށް އައިސްފައިވާއިރު، ސަރުކާރުން ބުނަމުންދަނީ އިންޑިއާއާއި ރާއްޖެއާއި ދެމެދު ގޮތްނޭގޭ އަދި މިނިވަންކަމަށް ބުރޫއަރާފަދަ އެއްބަސްވުމެއް ހެދިފައި ނުވާނެކަމަށެވެ.
