މުސްތަފާބޭގެ ސިޔާސަތުތަކަށް ފާޑުކިޔާކިޔާ ވަރުބަލި ވެއްޖެއެވެ. މިހާރު ދެން ކިޔަންވީ ކީއްކަން ނޭގޭވަރަށްވުރެވެސް، މުސްތަފާބޭގެ ކަންކަން ހުރީ މާމަތީގައެވެ. މުސްތަފާބޭމެންނަކީ ބުނާބަހެއްގައި ހިފަހައްޓާ ބައެއް ނޫންކަމާއި، ވައުދެއްވެއްޖެނަމަ، ވައުދާ ޚިލާފުވާނެ ބައެއްކަން މާކުރިންވެސް ރައްޔިތުން ގަބޫލުކުރެއެވެ. ކަންތައްތައް ދަނީވެސް އެ ބީދައިން އެ މަގުންނެވެ.

ރިޔާސީ އިންތިޚާބާއި މަޖިލީހުގެ އިންތިޚާބުގެ ދުވަސްވަރު މުސްތަފާބޭ ހުރިހާ ޕޯޑިއަމެއްގައި އަޑަށް ބާރުލާފައި ދެއްކި ވާހަކައަކީ ފަނޑިޔާރުގެ އިސްލާހުކުރަން ޖެހިފައިވާ ވާހަކައެވެ. ފަނޑިޔާރުންނަށް ނުފޫޒު ފޯރުވުން ހުއްޓުވަންޖެހިފައިވާ ވާހަކައެވެ.

ދެން އެންމެ ފޯރިގަދަކޮށް ދެއްކިވާހަކައަކީ، ރިސޯޓްތަކުގައި މަސައްކަތްކުރާ ކުދިންނަށް "ނައިޓަށް ރަށަށް ދެވެންޖެހޭނެ" ވާހަކައެވެ. މުސްތަފާބޭ ހިތުން ތިޔަހުންނެވީ މި ވައުދު "ނައިޓު" ނުކުރެވި ރިސޯޓު ބަންދުގައި ތިބި ޒުވާން ކުދިންނަށް ނިކަންވެސް ރަގަޅަށް ފުއްދާދީ، އެކުދިންގެ ބޮލުގައި ތެތް ތާކިހާ އަޅުވައިގެންނެވެ. އެހެންނަމަވެސް މުސްތަފާބޭ، ހިތުން މި ވައުދު ފުއްދައިގެން އޭގެއިން ހިތަށް ތަސައްލީ ހޯއްދަވައިގެން ހުއްޓެއްކަމަކު، މުސްތަފާބޭ ވައުދު ފުއްދެވީ ކިހިނަކުންކަމާއި، ކިހާ މިންވަރަކަށްކަން، ރިސޯޓްތަކުގައި މަސައްކަތް ކުރާ ކުދިންނަށް މިއަދު އެނގެއެވެ. ނައިޓަށް ރަށަށް ދެވުނު އެއްވެސް ކުއްޖަކު އުނޑުބަޅު ކުރި ހިސާބުގައި ނެތެވެ.

އެހެނެއްކަމަކު، މުސްތަފާބޭ ބޭނުންވީމާ، ކޮންމެ މީހެއްގެ ގާތުގައިވެސް ނައިޓް ކޮށްލަނީތާއެވެ. އެގޮތަށް އުޅެން ހަދައިގެން، "މަޖިލިސް މުސްތަފާބޭ"ގެ ދިރިއުޅުން ހަލާކުވިވާހަކަ، ސޯޝަލް މީޑިއާގައި ހާދަ ގޮތްގޮތަށް މީހުން ދައްކާ އުޅެއެވެ. ނުފުއްދުނު ވައުދުގެ ތެރެއިންވެސް މުސްތަފާބޭ ކަޅެއް ޖަހާލީތާއެވެ.

ނިމިގެންދިޔަ ސަރުކާރުން ކޯޓުތަކަށް ނުފޫޒު ފޯރުވާކަމަށް ވާހަކަ ދައްކާ، ގާނޫނު އަސާސީގެ ބޮޑު ޗާޕެއް ތައްޔާރުކޮށް، މުސްތަފާބޭއާއި އެކުވެރިން، އެ ކުޅުނު ކުޅިގަނޑުވެސް ރައްޔިތުންވަނީ ނިކަން ގާތުން ދެކެފައެވެ. ގާނޫނު އަސާސީގެ ބޮޑު ޗާޕެއް ތައްޔާރުކުރީ ފޮންޓުތައް ކުދިވެގެން އެ ކިޔަން ނޭގޭތީކަމަށް ވާނަމަ، މުސްތަފާބޭއަށްވެސް އެއަށްވުރެ ފޮންޓު ސައިޒް ބޮޑު ޗާޕެއް މިއަދު ބޭނުން ވާކަމަށް ދެކެމެވެ. އެހެނީ އެ ގާނޫނު އަސާސީއާ ޚިލާފަށް ސަރުކާރުން ކަންތައްތައް ކުރާއިރުވެސް، މުސްތަފާބޭ ތިޔަ ހުންނަނީ ހަމަ އެއްވެސް އެއްޗެކޭ ނުބުނެ "ހައްޕު" ކިޔައިގެންނެވެ. ހިރުވާތަން ކަހާވެސް ނުލައެވެ.

މުސްތަފާބޭ ވައުދުވި ޖޭއެސްސީ ހަރުދަނާކުރުމުގެ ވައުދު ކޮބައިތޯއެވެ. ޖޭއެސްސީ ތެރެއިން، ކޯޓުތަކަށް ނުފޫޒު ފޯރުވާ، މައްސަލަތަކަށް އުލާ ސަމްސާ ބާނައިގެން ތިޔަ ތަޅުވަނީ، ރައްޔިތުންނަކީ ހަމަ މޮޔައިންކަމަށް ދެކިގެންތޯއެވެ. ޖޭއެސްސީ މިނިވަންކޮށް، މަޖިލީހުގެ މެމްބަރުންނާ، ރައީސުލްޖުމްހޫރިއްޔާ އައްޔަންކުރާ މެމްބަރުން ނުތިބޭގޮތަށް ގާނޫނު އަސާސީ އިސްލާހު ކުރަން ވައުދުވެ، މަޖިލީހުގައި މުސްތަފާބޭގެ 65 އެކުވެރިން ތިބި އިރުވެސް އެއްކަލަ ގާނޫނު އިސްލާހު ނުކުރެވުމަކީ ލަދުވެތިކަމެއް ނޫންތޯއެވެ. ހެޔޮވާނީ ކިހިނަކުންތޯ އެވެ.

މުސްތާފާބޭ މިއަދު ތިޔަ އިންނެވީ ޖޭއެސްސީގެ ރައީސާކަމުގައި ނޫންތޯއެވެ. ޖޭއެސްސީގެ ތަޅުދަނޑިއާ ޙަވާލުވިދުވަހުން ފެށިގެން، ފަނޑިޔާރުންނަށް ނުފޫޒުފޯރުވާ، ފަނޑިޔާރުންނަށް ތަފާތު ތުހުމަތުކޮށް، ފަނޑިޔާރުން ވަޒީފާއިން ވަކިކުރަނީ، ވީ ވައުދުތަކުގެމަތިން ހަނދާން ނައްތާލާ، މުސްތަފާބޭގެ ތިޔަ މަގާމަކީ ދާއިމީ މަގާމެއްކަމަށް ދެކިގެންކަމަށް މިހާރު ހީވާން ފަށައިފިއެވެ. އެކަމަކު ރައްޔިތުންތިބީ، މުސްތަފާބޭގެ ތިޔަ ނޭއްގާނީ ކަމަށް އާއެކޭ ބުނާގޮތަކަށް ނޫނެވެ. ތިޔަ މަގާމުވެސް ދުވަސްކޮޅަކުން ގެއްލިދާނެއެވެ. މުސްތަފާބޭ ހޭއަރާކަށް ނުވޭތޯއެވެ.

މުސްތަފާބޭއެވެ. ގާނޫނުގެ ކަންކަންވެސް ކޮންމެވެސް މިންވަރަކަށް އެނގޭމީހެއްގެ ގޮތުގައި މުސްތަފާބޭ އުޅޭއިރު، ގާނޫނާ ޚިލާފު ކަންތައްތައް މުސްތަފާބޭ ކުރާތީ އަހަރެން އަބަދުވެސް އަޖައިބުވެއެވެ.

ދާދިފަހުން ނިމިގެންދިޔަ ގަރުނުގެ ބޮޑު ޝަރީއަތް ޓީވީތަކުން ލައިވްކުރިއިރު، ރައްޔިތުންތިބީ ބަލާށެވެ. ޙުކުމް ކުރަން 15ވަރަކަށް މިނިޓަށްވީމާ، ދަށު ކޯޓަށް މުސްޔަފާބޭ އުލާ ސަމްސާ ބޭނީއެވެ. ފަނޑިޔާރު ސަސްޕެންޑްކޮށް، އެހެން ފަނޑިޔާރެއްލައްވާ ޙުކުމްކޮށް، މީހަކު ހުރަގެއަށް ލުމަކީ، އަނިޔާއެއް ނޫންތޯއެވެ. މުސްތަފާބޭމެން ވަކާލާތު ކުރާ "އަނިޔާއާ  ދެކޮޅު"ކަން މިއީ ކޮން އެއްޗެއް ހެއްޔެވެ. އަނެއްކާ މިއީ އިޒްރޭލް މީހުން ފަލަސްތީނު މީހުން މަރާފައި، އަމިއްލަ ދިފާއުގައި ކުރިކަމެކޭ ބުނާ ބީދައިން ހިނގާ ކަމެއް ތޯއެވެ.

ފާޅުކަންބޮޑު ގޮތެއްގައި ފެނިގެން ދިޔަ ޝަރީޢަތެއްގައި، ރައްޔިތުންގެ ދަރުބާރުން ކުށްވެރިނުވާމީހަކު، ނަފްރަތުގެ އަވާގައި މުސްތަފާބޭޖެހި، މައުސޫމް މީހަކު، ޖަލުގައި ގެންގުޅުމަކީ، މުސްތަފާބޭމެންގެ ސިޔާސަތުކަމަށްވާނަމަ، ދެން ބުނާނެ އެއްޗެއްނެތެވެ.

މުސްތަފާބޭއެވެ. ޖޭއެސްސީގެ ކަންކަމާ މުސްތަފާބޭ ޙަވާލުވެފައި ހުއްޓަސް، މުސްތަފާބޭއަކީ އަދުލްއިންސާފުގެ އެންމެ އިސްވެރިޔާއެއް ނޫނެވެ. ތަދުބީރުގެ މައްޗަށް ތަގުދީރު ހީލަހީލާ އޮންނަތަން މިއަދު މުސްތަފާބެއަށް ނުފެނިދާނެއެވެ. އެންނަމަވެސް މުސްތަފާބޭވެސް، މުސްތަފާބޭގެ އެކުވެރިންވެސް، ދުނިޔެ ހިގާނީ ތަދުބީރުގެ މައްޗަށް ނޫންކަމާއި، ދުނިޔެ ހިނގާނީ ތަގުދީރުގެ މައްޗަށްކަން ގަބޫލު ކުރާކަށް ނުވޭތޯއެވެ. އިސްލާހުވާކަށް ނުވޭތޯއެވެ.

ފަނޑިޔާރުގޭގައި ކަންކަން ހިނގަންޖެހޭނީ މުސްތަފާބޭ ބޭނުންވާ ގޮތަކަށްނޫނެވެ. ފަނޑިޔާރުންގެ ޙުކުމްތައް ބިނާވާންޖެހެނީ މުސްތަފާބޭގެ ޚިޔާލުގެ މައްޗަކަށް ނޫނެވެ. ފަނޑިޔާރުގެއަށް މުސްތަފާބޭ ނުފޫޒުފޯރުވާތީ، އެފަދަ ވާހަކަތައް ދައްކާ ފަނޑިޔާރުން ސަސްޕެންޑުކުރުމުގެ ބަދަލުގައި، މުސްތަފާބޭގެ އުޅުން އިސްލާހުކޮށްލާށެވެ. "މަޖިލިސް މުސްތަފާބޭ"އަށް ދިމާވި މައްސަލައިގައި، މުސްތަފާބޭގެ އެކުވެރިންކޮޅު އެއްކަލަ ދުވަސްވަރު އުޅުނުގޮތަށް، އެހެން މީހުންގެ ދިފާޢުގައިވެސް ނޫޅެނީ ކީއްވެތޯއެވެ. މުސްތަފާބޭގެ ފޮތުގައި އިންސާފަކީ ވަކި މީހެއްގެ ހައްގަކަށް ވަނީތޯއެވެ.

މުސްތަފާބޭއެވެ. އަދިވެސް ވަގުތު ފާއިތުނުވެއެވެ. މަގާމުގެ ޝާނާ ޝައުކަތުގައި ޖެހި، ހަގީގަތް ނުފެންނަވަރަށް ލޯ ފުސްނުކުރަމާތޯއެވެ. މީހަކުދެކެ ކިތައްމެ ރުޅިއައިނަމަވެސް، އަދި ގަޔާ ނުވިނަމަވެސް، މަގާމުގެ ނުފޫޒުން އެމީހަކަށް އަދަބު ނުދެމާތޯއެވެ. މީހަކުކުރި ކަމެއް، އެމީހަކާ އަރާ ހަމަކުރާނެކަމަށް މުސްކުޅިން ބުނެއެވެ. އެހެންކަމަށް ވާނަމަ، މުސްތަފާބޭ މިހާރު ތިޔަ ކުރާ ކަންތައްތަކުގެ ހިތި ނަތީޖާ، މުސްތަފާބޭއާ އަރާހަމަކުރާއިރު، މުސްތަފާބޭ ހުންނާނީ ނިކަން ބޮޑަށް ނިކަމެތިވެފެއެވެ. އާރެއްބާރެއް އަދި މަގާމެއް ނެތިފައެވެ. މުސްތަފާބޭގެ ދިފާއުގައި ނުކުންނާނެ މީހަކުނެތި، އެކަނިވެރި ވެފައެވެ.

މުސްތަފާބޭއެވެ. ދުނިޔެ ދުވާނީ ތޮށަލިދުޅައަށެވެ. އަޑިގަނޑަކަށްފަހު އުސްގަނޑެކެވެ. މުސްތަފާބޭގެ ނުފޫޒަށް ނުގުޑާ ބައެއް މީހުން މިރާއްޖޭގައި ތިބިކަން، ނިމިގެން މިދިޔަ ބޮޑު ޝަރީއަތުންވެސް މުސްތަފާބޭއަށް މިހާރު އެގޭނެއެވެ. "ބޮޑު މުސްތަފާބޭ”އަށް މި ޝަރީއަތުން އިންސާފު ލިބުނެއްކަމަކު، މި ޝަރީއަތުންވެސް މުސްތަފާބޭ ފިލާވަޅެއް ދަސް ނުކުރާނަ، އެއީ މުސްތަފާބޭގެ ވިސްނުމުގެ ކޮށިކަމެވެ.

އެހެންނަމަވެސް ދޭން އޮތް ނަސޭހަތަކީ، މިކަމުން އިބްރަތެއް ހާސިލްކޮށް އަމަލުތައް ސީދާކޮށް ތައުބާވާން މިއީ ރަނގަޅު ފުރުސަތެއްކަމެވެ. މިއީ އަޅެފަހެ ދޮގެއްތޯއެވެ.