ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް މަނީ ލޯންޑްރިން މައްސަލައިގައި އިއްވި ފަސް އަހަރުގެ ޖަލު ހުކުމް ސުޕްރީމް ކޯޓުން ބާތިލް ކުރާނެ ކަމަށް، އެންމެ ކައިރީގައި ތިބި މީހުންވެސް އުންމީދު ނުކުރި އެމަނިކުފާނުގެ އިސް ވަކީލް، ޑރ. މުހައްމަދު ޖަމީލް ވިދާޅުވެ ދެއްކެވި ވާހަކަތަކަށް ޑރ.ޝަހީމް ރައްދު ދެއްވައިފިއެވެ.
އިއްޔެ ބޭއްވި ޕްރެސް ކޮންފަރެންސުގައި ޖަމީލް ވިދާޅުވީ ސުޕްރީމް ކޯޓުން އިއްޔެ އެ ހުކުމް ބާތިލުކުރުމާ ހަމައަށް، އެމަނިކުފާނަށް އިންސާފު ލިބިގެން ދާނެ ކަމަށް އެންމެ ކައިރީގައި ތިބި މީހުން ވެސް ސުވާލު އުފެއްދި ކަމަށެވެ. އަދި ސަރުކާރުގެ ބާރު، ޖޭއެސްސީގައި އޮތް ހިނދަކު، ޝަރުއީ ނިޒާމުގެ ތެރެއިން އެމަނިކުފާނު މިނިވަން ވާނެ ކަމަށް ގިނަ ސަޕޯޓަރުން ގަބޫލު ނުކުރާކަންވެސް ފާހަގަކުރެއްވިކަމަށް ޖަމީލް ވިދާޅުވިއެވެ.
ޖަމީލްގެ ވާހަކަތާއި ގުޅިގެން ޑރ.ޝަހީމް ވިދާޅުވީ ރައީސް ޔާމީނާއި އެންމެ ކައިރީގައި ތިއްބެވި ބޭފުޅުން އެންމެ ފުރަތަމަ ދުވަހުން ފެށިގެންވެސް މަސައްކަތް ކުރަމުންދިޔައީ ރައީސް ޔާމީން މިނިވަން ކުރުމަށް ކަމަށެވެ. އެމަނިކުފާނާއި އެންމެ ވާދަވެރި ބޭފުޅުންނާއި، ދުޝްމަނުން، އެމަނިކުފާނުގެ ވަގަށް ގޮވަމުން ދިޔަ އިރުވެސް ކައިރީގައި ތިބި ބޭފުޅުން ގޮވަމުން ދިޔައީ އަދި ދުޢާ ކުރަމުން ދިޔައީ އެމަނިކުފާނު މިނިވަން ވުމަށް ކަމަށް ޝަހީމް ވިދާޅުވިއެވެ.
އެންމެ ކައިރީގައި ތިއްބެވި ބޭފުޅުން ފެށުނީއްސުރެވެސް ގަބޫލު ކުރަމުން ދިޔައީ މިނިވަން ވާނެކަމަށް. އެންމެ ފުރަތަމަ ދުވަހުން ފެށިގެންވެސް އެބޭފުޅުން ތިއްބެވީ އެގޮތުގައި. ދުޝްމަނުން ވަގަށް ގޮވި އިރުވެސް ބޭފުޅުން ވިދާޅުވުމުން، ގެންދެވީ ވަގެއް ނޫނީ ރައީސް ޔާމީން އަކީ.
– ޑރ.ޝަހީމް ވިދާޅުވިއެވެ.
ރައީސް ޔާމީން މިނިވަން ކުރުމުގައި ޤާނޫނީ ވަކީލުގެ ޓީމުން ގިނަ މަސައްކަތްތެއް ކުރެއްވިކަން ގިނަ ބަޔަކު ގަބޫލުކުރި ނަމަވެސް ރައީސް ޔާމީން މިނިވަން ކުރުމުގައި ޕީޕީއެމްގެ އިސްބޭފުޅުން ކުރެއްވި މަސައްކަތް ގިނަ ބަޔަކު ދަނީ ފާހަގަ ކުރަމުންވެ. ޚާއްސަކޮށް މަޖިލިސް މެމްބަރުންނާއި، ރައީސް ޔާމީނާއި އެންމެ ގާތް ބޭފުޅުން މަގު މަތީގައާއި، އަތޮޅު ތަކުގައިވެސް ގިނަ މަސައްކަތް ތަކެއް ކުރިކަން ގިނަ ބަޔަކު ދަނީ ފާހަގަ ކުރަމުންނެވެ.
ރައީސް ޔާމީން މިނިވަން ވުމުގައި ލޯޔަރުން ކުރެއްވި މަސައްކަތައިއެކު، ކޯޓުތަކުގައި ހުދު ރައީސް ޔާމީން އަމިއްލަ ފުޅަށް ކުރެއްވި ވާކާލަތަކީވެސް އެމަނިކުފާނު މިނިވަން ވުމުގައި އިސްދައުރެއް އަދާކުރި ކަމެއްކަމަށް ގިނަ ބަޔަކު ދެކެއެވެ. ރައީސް ޔަމީންގެ މިހާރުގެ ޤާނޫނީ ވަކީލް އަދި އެމަނިކުފާނުގެ ފުރަތަމަ ނައިބް ރައީސް ޑރ.ޖަމީލް އަކީ ރައީސް ޔާމީން ވެރިކަން ނިންމުމަށާއި، ކޮރަޕްޝަންގެ ބޮޑެތި ތުހުމަތުތަކެއް ރައީސް ޔާމީނަށް ކުރެއްވި ބޭފުޅެކެވެ.
