މިއަހަރުގެ މެއި މަހުގެ 6 ވަނަ ދުވަހު ދިން ނުރައްކާތެރި ހަމަލާއާއި ގުޅިގެން މިހާރު ދެމުންދާ ސެކިއުރިޓީއަކީ އެއްގޮތަކަށްވެސް ބޭނުންވާ ސެކިއުރިޓީއެއް ނޫންކަމަށް މަޖިލިސް ރައީސް މުހައްމަދު ނަޝީދު ވިދާޅުވެއްޖެއެވެ.

އާސްކް ސްޕީކަރ ޕްރޮގުރާމުގައި ރައީސް ނަޝީދު ވިދާޅުވީ އެމަނިކުފާނު މަރާލަން ދިން ހަމަލާފަހު މިއަދު ކަންކަން ވަރަށް ބޮޑަށް ބަދަލު ވެފައިވަކަމަށެވެ. އަދި މިހާރު ވަރަށް ގިނަ ރައްޔިތުނަށް އެކަމުން ވަރަށް ބޮޑެތި ތަކުލީފްތަކެއްވެސް އުފުލަމުން ދާކަމަށެވެ. މިކަމުގައި ދަތިތަކެއް ކުރިމަތިވާ އެންމެންގެ ކިބައިން މަޢާފަށް އެދޭކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ނަޝީދު ވިދާޅުވީ އެމަނިކުފާނުގެ ސަލާމަތާއި ރައްކާތެރިކަން ބޭނުންވާ ކަމަށެވެ. މެއި ހަވަނަ ދުވަހު ދިން ޓެރަރިސްޓް ހަމަލާގެ ހަނދާންތައް އައު ކުރައްވާ ނަޝީދު ވިދާޅުވީ އެ ހަމަލާއިން ސަލާމަތްވެވަޑައިގެންނެވީ ކިރިޔާ ކަމަށެވެ. އަދި ދައުލަތުގެ ބާރުގެ ވެރިން ޓެރަރިޒަމް ޝިކާރައަކަށް ދޫކޮށްލަން ރައްޔިތުން އެދޭތޯ އެމަނިކުފާނު އެއްސެވިއެވެ.

އަޅުގަނޑުވެސް އެދެން އަޅުގަނޑުގެ ސަލާމަތާއި ރައްކާތެރިކަން. އަދި އަޅުގަނޑު ބޭނުމެއް ނުވޭ އެހެން ބަޔަކަށް އުނދަގޫތަކެއްވެސް ވާކަށް. އަހަން ޖެހޭ މި ސުވާލަކީ، އަޅުގަނޑު ދޫކޮށްލާ. ރާއްޖޭގެ ރައްޔިތުންގެ މަޖިލީހުގެ ރައީސް، ރައީސުލްޖުމްހޫރިއްޔާ ނުވަތަ އުއްތަމަފަނޑިޔާރު ނޫނީ އެހެން ބޭފުޅެއް އެއީ ޓެރަރިޒަމްގެ ޝިކާރަކަށް ދޫކޮށްލުން އެއީ ދިވެހިރައްޔިތުންގެ މަސްލަހަތު ހުރި ގޮތްތޯ ރާއްޖޭގެ ރައްޔިތުންނަށް އެންމެ ފައިދާ ހުރި ގޮތްތޯ.

– ނަޝީދު ވިދާޅުވިއެވެ.

މޭއި 6 ވަނަ ދުވަހުގެ ރޭ އެމަނިކުފާނު ދިރިއުޅުއްވާ ގ.ކެނެރީގެއިން ނިކުމެވަޑައިގެން ހިންގަވާފައި މަޖީދީމަގުގައި ޕާކުކޮށްފައިއޮތް ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައިގެން ދިން ޙަމަލާގައި އެމަނިކުފާނަށް ވަނީ ބޮޑެތި ޒަޚަމްތަކެއް ލިބިވަޑައިގެންފައެވެ. އެމަނިކުފާނަށް އެންމެ ފުރަތަމަ ފަރުވާދެއްވި އޭޑީކޭގެ ސްޕެޝަލިސްޓުންގެ ޓީމުންވެސް ވަނީ އެކަން ހާމަކުރައްވާފައެވެ.