ކުރީގެ ޓޫރިޒަމް މިނިސްޓަރ ޢަލީ ވަޙީދު ހައްޔަރުކޮށްގެން ކޯޓަށް ޙާޒިރުކުރުމަށް ކްރިމިނަލް ކޯޓުން ޢަމުރު ނެރެފިއެވެ.
ޖިންސީ ގޯނާގެ ދަޢުވާ އުފުލާފައިވާ ޢަލީ ވަޙީދު ބަންދުކޮށްގެން ކޯޓަށް ޙާޒިރުކުރުމަށް ކޯޓުން ޢަމުރު ނެރެފައިވަނީ އިއްޔެއެވެ. ކްރިމިނަލް ކޯޓުގެ ޤާޟީ ޙަސަން ސަޢީދު ވަނީ ޢަލީ ވަޙީދު 72 ގަޑިއިރުގެ ތެރޭގައި ކޯޓަށް ޙާޒިރު ނުކޮށްފިނަމަ، އޭނާ ޖާމިނުކޮށްފައިވާ ޔޫތު މިނިސްޓްރީގެ ސްޓޭޓް މިނިސްޓަރ އަސްހަދު ޢަލީއަށް ކޯޓުގެ ހުރުމަތް ކެނޑިކަމަށްބަލައި ފިޔަވަޅު އަޅާނެކަމަށް ވިދާޅުވެފައެވެ.
ޤާޒީ ވިދާޅުވީ މިމައްސަލައިގައި އަލީ ވަހީދު ރާއްޖޭގެ އެންމެ މަތީ ކޯޓުތަކުގެ ހުރުމަތްވެސް ކަނޑާލާފައިވާކަމަށާއި، މިމައްސަލާގައި ދެން އޮންލައިންކޮށްވެސް ޝަރީއަތް ނުގެންދެވޭނެކަމަށެވެ. ޤާޒީ މިހެން ވިދާޅުވީ ސްޕްރީމް ކޯޓުން އޮންލައިންކޮށް ޝަރީއަތް ނުކުރެވޭނެކަމަށް ނިންމައި ކޮށްފައިވާ ހުކުމަށް ރިއާޔަތްކޮށެވެެ.
އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންދަން ކްރިމިނަލް ކޯޓުން ނިންމި ނިންމުން ސުޕްރީމް ކޯޓުގައި އިސްތިއުނާފް ކުރުމުން އޭނާ ކޯޓަށް ހާޒިރުވުމަށް ޗިޓު ފޮނުވިއެވެ. ނަމަވެސް އޭނާ ކޯޓަށް ހާޒިރުވެވަޑައިގެންފައި ނުވާތީ ސުޕްރީމް ކޯޓުން ވަނީ ކޯޓުގެ ހުރުމަތް ކެނޑިކަމުގެ ކުށުގައި އޭނާ ދެ މަހާއި 12 ދުވަހަށް ޖަލަށް ލާން ހުކުމްކޮށްފައެވެ.
އަލީ ވަހީދު އިނގިރޭސިވިލާތަށް ވަޑައިގަތީ، އޭނާގެ މައްޗަށް ޖިންސީ ގޯނާގެ 7 ދަޢުވާއެއް ކްރިމިނަލް ކޯޓުގައި އުފުލާފައިވަނިކޮށެވެ. އަދި އޭނާގެ މައްޗަށް ކުރި ދައުވާތަކުގެ އަޑުއެހުންތައް ކޯޓުތަކުގައި ފަށާފައިވަނިކޮށް އިނގިރޭސިވިލާތުގައި ހުންނަވައިގެން އަލީ ވަހީދު ގެންދަވަނީ ޕްރޮސިކިއުޓަރ ޖެނަރަލާއި، ސަރުކާރުގެ އިސްވެރިންނަށް ފާޑުވިދާޅުވެ ވާހަކަފުޅުދައްކަވަމުންނެވެ.
އަލީ ވަހީދު ފުރަން ކްރިމިނަލް ކޯޓުން ހުއްދަ ދިނީ ހަތަރު މަހުގެ މުއްދަތަކަށެވެ. އެކަމަކު އެ މުއްދަތު ހަމަވި ފަހުން ވެސް އަލީ ވަހީދު ރާއްޖެ ވަޑައެއް ނުގަންނަވައެވެ. އަލީގެ ޕާސްޕޯޓް ހިފަހައްޓަން އެދުނު ނަމަވެސް އިޖުރާއީ މައްސަލަތަކާ ހުރެ އެ އަމުރު ވެސް ނެރެނުދެވެއެވެ. ފުލުހުން ބޭއްވި ޕްރެސް ކޮންފަރެންސެއްގައި ސީޕީ ހަމީދު ވިދާޅުވީ އިންޓަޕޯލް ވެސް ހިނގާނީ އެކި ގައުމުތަކުގެ ޖުރިސްޑިކްޝަންތަކުގައި އެކި ގޮތަށް ކަމަށެވެ. އެހެންކަމުން އިންޓަޕޯލް ރެޑް ނޯޓިސް ނެރުނަސް، ޖިންސީ ފުރައްސާރައާއި ގޯނާގެ ދައުވާތައް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ގެނެވޭނެ ކަމުގެ ޔަގީން ކަން ނެތް ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ.
