ޅ.އަތޮޅު މަޑިވަރުގައި ތަރައްޤީކުރަމުން އަންނަ އެއަރޕޯޓް މިއަހަރު ނިމުގެކުރިން ހުޅުވުމަށް މުއްދަތު ދީފައިވާކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ކުރެއްދޫ ހޯލްޑިންސް އިން ޅ. މަޑިވަރުގައި ތަރައްގީކުރި އެއާޕޯޓް ހުޅުވޭނެ ތާރީޚައި ގުޅޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ނަހުލާ ވިދާޅުވީ، މަޑިވަރު އެއަޕޯޓް ހުޅުވުމަށް ވަގުތު ދީފައި ވާނީ މި އަހަރު ޑިސެމްބަރު 31ގެ ނިޔަލަށްކަމަށެވެ.
ޅ.އަތޮޅު މަޑިވަރު އެއަރޕޯޓުގައި ތަރައްޤީކުރަނީ 1200މީޓަރުގެ ރަންވޭއެވެ. މަސައްކަތުގެ ސްކޯޕްގައި ޓަރމިނަލާއި، އެއަރ ކްރާފްޓްތައް ޕާކުކުރުމަށް ޚާއްސަ ސަރަޙައްދާއި، ފަޔަރ ބިލްޑިންގ ހިމެނެއެވެ. މި މަސައްކަތުގައި މަޑިވަރުގައި ސިޓީ ހޮޓަލެއް ތަރައްޤީކުރުންވެސް ހިމެނެއެވެ.
ޅ. އަތޮޅަކީ ގިނަ ރިސޯޓްތައް ހިމެނޭ އަތޮޅެކެވެ. މި ސަރަޙައްދުގައި އެއަރޕޯޓެއް ތަރައްޤީކުރުމުގެ އެންމެ ބޮޑު އެއް ބޭނުމަކީވެސް، ފަތުރުވެރިކަމަށް ލުއިފަސޭހަ ގޮތްތަކެއް ފަހިކޮށްދިނުމެވެ.
ޅ. އަތޮޅު މަޑިވަރު، ކުރެއްދޫ ހޯލްޑިންގްސްއަށް ދޫކޮށްފައިވަނީ އެއަރޕޯޓްގެ އިތުރުން އެރަށުގައި ސިޓީ ހޮޓަލެއް ތަރައްޤީކުރެވޭގޮތަށެވެ. އެއަރޕޯޓްގެ މަސައްކަތް އެއް އަހަރުގެ ތެރޭގައި ނިންމައި ޚިދުމަތް ފަށާނެކަމަށް ކުރެއްދޫ ހޯލްޑިންގްސްއިން ބުނިނަމަވެސް 2018 ވަނަ އަހަރުގެ މެއި މަހު ހަވާލުކުރި އެ މަޝްރޫޢު އަދިވެސް ނިންމާ އެއަރޕޯޓް ހުޅުވިފައެއް ނުވެއެވެ.
