މާލެ ސިޓީ ކައުންސިލުން އަލަށް ތަޢާރަފްކުރި ލޯގޯއިން ތަރިކައާއި، ސަޤާފަތް ގެއްލޭތީ، އެލޯގޯ ކަމުނުދާކަމަށް، ސަފާތާއި ތަރިކައާ ބެހޭ މިނިސްޓަރު ޔުމްނާ މައުމޫނު މިއަދު ވިދާޅުވެއްޖެއެވެ.

ސިޓީ ކައުންސިލްގެ ހަތަރު ވަނަ ދައުރަށް ހަ މަސް ފުރުމާއި ގުޅިގެން ސިޓީ ކައުންސިލްގެ އާ ލޯގޯ، ދިދަ އަދި އާ ޔުނިފޯމުވެސް ވަނީ ރީ ބްރޭންޑްކޮށްފައެވެ. ސިޓީ ކައުންސިލުން ގެނައި ބަދަލު ތަކުގެ ތެރެއިން އެންމެ ގިނަ ބައެއްގެ ފާޑުކިޔުން އަމާޒުވީ ލޯގޯއަށެވެ.

ސޯޝަލް މީޑިއާގައި ލޯގޯއާއި ގުޅޭގޮތުން ކުރެވުނު ބަހުސްގައި މިނިސްޓަރ ޔުމްނާ ކުރެއްވި ޓުވީޓެއްގައި ވިދާޅުވީ ސިޓީ ކައުންސިލް އިދާރާގެ ކުރީގެ ލޯގޯ އިން ރަމްޒު ކޮށްދިނީ މާތްވެގެންވާ އިސްލާމް ދީނާއި މާލޭގެ ދިގު ތާރީހާއި ޒަމާންވީ ތަރިކަ އާއި ސަގާފަތް ކަމަށެވެ. ދިވެހިންގެ އަމިއްލަ ވަންތަކަމާއި ފަންނުވެރިކަން ކުރީގެ ލޯގޯ އިން ފެނުނު ކަމަށް ވިދާޅުވެ، މިނިސްޓަރު ވަނީ އާ ލޯގޯއާ މެދު ހިތްހަމަޖެހިވަޑައިނުގަންނަވާކަން ފާޅުކުރައްވައިފައެވެ.

އަޅުގަނޑަށް އެ ލޯގޯ މިދިޔަ ދައުރުގެ ލޯގޯ މާރީތި.

– މާލެ ސިޓީ ކައުންސިލް ޓެގް ކުރައްވާ މިނިސްޓަރު ޔުމްނާ ވިދާޅުވެފައިވެއެވެ.

ސިޓީ ކައުންސިލްގެ އާ ލޯގޯ އިން ރަމްޒު ކޮށްދެނީ މާލެ ސިޓީގައި ހިމެނޭ ހަ އަވަށެވެ. ސިޓީ ކައުންސިލުން ބުނީ ލޯގޯގެ މެދުން މާލޭގެ ހަތަރު އަވަށް ކަމަށްވާ ހެންވޭރު، މާފަންނު، ގަލޮޅު އަދި މައްޗަންގޮޅި ރަމްޒުކޮށްދޭނެ ކަމަށެވެ. އަދި ދެފަރާތުން ރަމްޒުކޮށްދެނީ ވިލިމާލެ އާއި ހުޅުމާލެ ކަމަށެވެ.

އެ ލޯގޯ ފަރުމާ ކުުރުމުގައި ބޭނުންކޮށްފައި ވަނީ، އިހުޒަމާނުގެ ވެރިކަމުގެ ސިއްކައިގެ ފަރުމާގައި ބޭނުންކޮށްފައިވާ ނިޝާނެއް ކަމަށް ކައުންސިލުން ބުނެއެވެ. މި ރޮނގުގެ އެމުނުންތަކުން މުޅި ސިޓީގެ އެއްބައިވަންތަކަން ރަމްޒުކޮށްދޭނެ ކަމަށް ވެސް ކައުންސިލުން ވަނީ ބުނެފައެވެ.

ކައުންސިލްގެ ތަސައްވުރަކީ ކައުންސިލްގެ ހުރިހާ ޕްލެޓްފޯމެއްގައި މާލެ ސިޓީގެ ހަ އަވަށް ރަމްޒުކޮށްދޭނެ ނިޝާނެއް ފަރުމާ ކުރުން ކަމަށް މާލެ ސިޓީ ކައުންސިލުން ބުނެއެވެ. ކައުންސިލްގެ ލޯގޯގެ ގޮތުގައި މީގެ ކުރިން ބޭނުންކޮށްފައި ވަނީ ހުކުރު މިސްކިތުގެ މުންނާރެވެ.