ބަލި ޖެހިފައިވާ މީހުންނަށްވެސް އައު ވޭރިއަންޓް ޖެހުމުގެ ފުރުޞަތު ބޮޑު: އެޗްޕީއޭ

ބަލިޖެހިފައިވާ މީހުންނަށްވެސް ބަލިޖެހުމުގެ ފުރުޞަތު ބޮޑު ވޭރިއަންޓެއްކަމަށް އެޗްއީއޯސީން ބުނެފިއެވެ.

އެޗްޕީއޭއިން ބުނީ ޑެލްޓާ ވޭރިއަންނަށްވުރެ ހަލުވިކަމާއެކު އައު ވޭރިއަންޓުގެ ބަލި ފެތުރުމުގެ ފުރުޞަތު ވަރަށް ބޮޑުކަމަށެވެ. އެޗްއީއޯސީގެ ތަރުޖަމާން ޑރ.ފާޠިމަތު ނަޒްލާ ރަފީޤް ވިދާޅުވީ ވެކްސިންގެ އަސަރު އައު ވޭރިއަންޓަށް ކުރަނީ ކިހާ މިންވަރަކަށްކަން އަދި ދެނެގަނެވިފައިނުވާކަމަށާއި، ބަލީގެ ހާލަތު އިތުރަށް ދިރާސާކުރަމުން އަންނަކަމަށެވެ.

ޑރ.ނަޒްލާ ވިދާޅުވީ 308 ސާމްޕަލް ބޭރަށް ސީކުއެންސަށް ފޮނުވާކަމަށާއި، ކޮންމެ ހަފްތާއަކު 50 ސާމްޕަލް ގަވާއިދުން އިންޑިއާއަށް ފޮނުވަމުން އަންނަކަމަށެވެ. އެގޮތުން 13 އޮގަސްޓްގެ ފަހުން 750 ސާމްޕަލެއް މިހާތަނަށް ފޮނުވާފައިވާކަމަށެވެ.

ޕޮޒިޓިވް ސާމްޕަލްތައް ސީކުއެންސް ރާއްޖެއިން ނުކުރެވުނަސް ޤަވާއިދުން މިކަން ކުރަމުން އަންނަކަމށާއި، މިހާތަނަށް ބެލިބެލުމުން ޑެލްޓާގެ ވޭރިއަޏްގެ ވައްތަރުތައް ރާއްޖޭގައި ހުރިކަން ފާހަގަކުރެވޭކަމަށެވެ. އަދި ރާއްޖޭގައިވެސް ޥޭރިއަންޓް ސީކުއެންސް ލެބް ޤާއިމްކުރުމުގެ މަސައްކަތްކުރަމުން އަންނަކަމަށްވެސް ޑރ.ނަޒްލާ ވިދާޅުވިއެވެ.

ޑރ.ނަޒްލާ ވިދާޅުވީ، އައު ވޭރިއަންޓް ރާއްޖެ ނާންނާނެކަމަށް ބަލައިގެން ނުވާނެކަމަށާއި، ނަމަވެސް ފިޔަވަޅުތަކާއެކު ބަލި ރާއްޖެ އައުން ލަސްކުރެވިދާނެކަަށެވެ. އެހެންކަމުން ބަލިން ރައްކާތެރިވުމުގެ ފިޔަވަޅުތައް ކަށަވަރުކުރުމަށް ޑރ.ނަޒްލާ އިލްތިމާސްކުރެވިއެެވެ. ޑރ.ނަޒްލާ ވަނީ ބައެއް ރަށްރަށުގައި އެއްގޮތަކަށްވެސް މާސްކު ނާޅާކަން ވެސް ފާހަގަކުރައްވާފައެވެ. ނަމަވެސް އެންމެ ރަނގަޅު އެއް ފިޔަވަޅަކީ މާސްކު އެޅުންކަމަށާއި، އެހެންކަމުން މާސްއެޅުމުން ބަލީގެ ފުރުޞަތު އެންމެ ބޮޑަށް ކުޑަކޮށްދޭކަމަށް ޑރ.ނަޒްލާ ވިދާޅުވިއެވެ.

އެޗްއައިވީ ޖެހި ނުވަތަ ވަރަށް ބަލި މީހެއްގެގައިގައި ގިނަދުވަހު ބަލި ހުރެގެން އުފެދުނު ވޭރިއަންޓެއްގެ ގޮތުގައި ސައިންސްވެރިންނަށް ބޮޑަށް ލަފާކުރެވިފައިވާކަމަށ ޑރ.ނަޒްލާ ވިދާޅުވިއެވެ. ކޯވިޑްގެ އައު ވޭރިއަންޓް "އޮމިކްރޯން" އަންނަނީ ދުނިޔޭގެ ބައެއް ޤައުމުތަކުގައި ވަރަށް ހަލުވިކަމާއެކު ފެތުރެމުންނެވެ. އަދި ބައެއް ޤައުމުތަކުން ބޯޑަރު ބަންދުކުރުންފަދަ ފިޔަވަޅުތައްވެސް އަންނަނީ އަޅަމުންނެވެ.

މިގޮތުން ރާއްޖެއިންވެސް ވަނީ ސައުތު އެފްރިކާގެ ގައުމުތަކުން ރާއްޖެ އައުން މަނާކޮށްފައެވެ. ކޯވިޑްގެ އައު ވައްތަރެއް ދެކުނު އެފްރިކާއިން ފެނި މިއީ ކޯވިޑްގެ ކަންބޮޑުވާންޖެހޭ ބާވަތެއްގެ ވޭރިއަންޓެއްކަން ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިންވެސް ވަނީ ކަނޑައަޅާފައެވެ.

ކޯވިޑްގެ އައު ވޭރިއަންޓުން ރައްކާތެރިވުމަށް އެޅި ފުރަތަމަ ފިޔަވަޅެއްގެ ގޮތުން ރޭ ދަންވަރު ބާރައިން ފެށިގެން ރާއްޖެއަށް މީހުން އެތެރެވުން މަނާކޮށްފައިވަނީ ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮސްޓްވާނާ، ޒިންމްބާބްވޭ އަދި އެސްވަޓީނީންނެވެ. އެޗްޕީއޭއިން ކުރި އިއުލާނެއްގައި ވިދާޅުވީ ރާއްޖެ އައުމުގެ 14 ދުވަސްކުރިން މި ޤައުމުތަކަށް ދަތުރުކޮށްފައިވާ މީހުންނާއި އެއިން ޤައުމެއްގައި 12 ގަޑިއިރަށްވުރެ ގިނައިރު ޓްރާންސިޓްވެފައިވާ މީހުންނަށް މިވަގުތު ރާއްޖެއަށް އެތެރެނުވެވޭނެ ކަމަށެވެ.

ރާއްޖެއަށް މީހުން އެތެރެވުން މަނާކުރި ޤައުމުތަކުން ރާއްޖެ އަންނަ ދިވެހިންނާއި ދިވެހިންނާއި ވޯކް ޕާމިޓް އޮންނަ މީހުން ރާއްޖެއަށް އެތެރެވެ 14 ދުވަހުގެ ކަރަންޓީނު ފުރިހަމަކުރަންޖެހޭނެ ކަމަށްވެސް އެޗްޕީއޭއިން ވިދާޅުވެއެވެ. އަދި މި މީހުން ކަރަންޓީނު ދޫކޮށްލާނީ 14 ދުވަސް ފުރިހަމަކޮށް އަލުން ކޯވިޑަށް ޓެސްޓްކޮށް ނަތީޖާ ނެގެޓިވްވުމުންކަމަށްވެސް އެޗްޕީއޭއިން ވިދާޅުވެއެވެ.

ދެކުނު އެފްރިކާ، ނެމީބިއާ، މޮޒަންބީކް، ލެސޯތޯ، ބޮސްޓްވާނާ، ޒިންމްބާބްވޭ އަދި އެސްވަޓީނީ އިން ރާއްޖެ އަންނަން ދަތުރު ފަށާފައިވާ މީހުންނާއި މިދިޔަ 14 ދުވަހުގެ ތެރޭ މި 7 ޤައުމަށް ދަތުރުކޮށްފައިވާ މީހުން ވަގުތުން ޕީސީއާރް ޓެސްޓު ހަދަންވެސް އެޗްޕީއޭއިން ވަނީ އަންގާފައެވެ. މީގެއިތުރުން މިސަރަޙައްދުތަކުން ރާއްޖެއަށް ދަތުރުކޮށްފައިވާ މީހުން ރާއްޖޭގައި ތިބޭ މުއްދަތު 14 ދުވަހަށްވުރެ އިތުރުވާނަމަ އެމުއްދަތު ފުރިހަމަ ކުރުމަށްފަހު އިތުރު ޓެސްޓެއް ހަދަން އެޗްޕީއޭއިންވަނީ އަންގަވާފައެވެ. އަދި ރާއްޖޭގައި 14 ދުވަހަށްވުރެ ކުރު މުއްދަތެއް ހޭދަކުރާ ފަރާތްތަކުން ރާއްޖެއިން ފުރުމުގެ ކުރިން ޕީސީއާރް ޓެސްޓް ހަދަންވެސް ވަނީ އަންގާވާފައެވެ.

ސައުތް އެފްރިކާއާއި އެސަރަޙައްދުގެ ބައެއް ޤައުމުތަކުން ކޯވިޑްގެ އާ ވޭރިއެންޓް 'އޮމިކްރޯން' ފެނުމާއި ގުޅިގެން ގިނަ ޤައުމުތަކަކުން އަންނަނީ ރައްކާތެރިވުމުގެ ގޮތުން ފިޔަވަޅުތައް ވަރުގަދަ ކުރަމުންނެވެ. އެގޮތުން ޓެސްޓު ހެދުން އިތުރުކޮށްފައިވާއިރު މިވޭރިއެންޓް ފެނިފައިވާ ޤައުމުތަކުން ދަތުރުތައް ވަނީ ހުއްޓާލާފައެވެ.