އިންގްލެންޑްގެ ގައުމީ ފުޓްބޯޅަ ޓީމާއެކު ގެރެތް ސައުތްގޭޓް ހަދާފައިވާ އެއްބަސްވުން އައުކޮށްފިއެވެ.
އައު އެއްބަސްވުމުގެ ދަށުން 2024 ގެ ނިޔަލަށް އިންގްލެންޑްގެ ގައުމީ ފުޓްބޯޅަ ޓީމުގެ ކޯޗުކަމުގެ މަގާމުގައި ސައުތްގޭޓް ދެމި ހުންނާނެއެވެ.
51 އަހަރުގެ ސައުތްގޭޓް އެންމެ ފުރަތަމަ އިންގްލެންޑްގެ ކޯޗު ކަމާއި ހަވާލުވީ، 2016 ވަނަ އަހަރުއެވެ. ސައުތްގޭޓް ކުރިން އިންގްލެންޑާއެކު ހަދާފައިވާ އެއްބަސްވުމުގެ މުއްދަތު ހަމަވާނީ 2022 ވަނަ އަހަރުގެ ޑިސެމްބަރު މަހުގެ ނިޔަލަށެވެ.
ސައުތުގޭޓްގެ އިތުރުން އެސިސްޓެންޓް ސްޓީވް ހޮލެންޑްގެ އެއްބަސްވުމުގެ މުއްދަތުވެސް އިތުރުކޮށްފައިވާކަމަށް އިނގިރޭސި އެފްއޭއިން ނެރުނު ބަޔާނުގައި ވަނީ ބުނެފައެވެެ.
ކޮންޓްރެކްޓް އައުކުރުމަށްފަހު މީޑިއާތަކާއި ވާހަކަދައްކަމުން ސައުތްގޭޓް ބުނީ އިނގިރޭސި ޓީމަށް އިރުޝާދުދޭން ފުރުސަތު ލިބުމަކީ ބޮޑު ފަހުރެއް ކަމަށާއި، ކުޅުންތެރިންނާއި ސަޕޯޓަރުން ދެމުންގެންދާ ހިތްވަރާއި އެހީތެރިކަމަށް ޝުކުރުވެރިވާކަމަށެވެ.
ކޯޗެއްގެ ގޮތުގައި ސައުތްގޭޓް ހޯދާފައިވާ ކާމިޔާބީތަކަށް ބަލާލާއިރު، އޭނާގެ އިރުޝާދުގެ ދަށުން ޔޫރޯ 2020 ގައި އިންގްލެންޑުން ވަނީ ރަނަރަޕްކަން ހޯދާފައެވެ. މިއީ އިނގިރޭސި ގައުމީ ޓީމުން ފާއިތުވީ 55 އަހަރުގެ ތެރޭގައި ފުޓުބޯޅައިން ހޯދި އެންމެ ބޮޑު ކާމިޔާބީއެވެ.
ކޮމެންޓު ފޮނުވާ