އަންނަ މަހު ފަށާ ރާއްޖޭގެ ފުޓްބޯޅަ ސީޒަން ޗެރިޓީ ޝީލްޑް މެޗުން ފަށާ ގޮތަށް ނިންމާ، ކުރިން އާއްމުކުރި ފުޓްބޯޅަ ސީޒަންގެ ކަލަންޑަރަށް ބަދަލު ގެނެސްފިއެވެ.
އެފްއޭއެމުން މިދިޔަ އޮކްޓޯބަރ މަހު މީޑިއާތަަކަށް ހިއްސާކުރި ފުޓްބޯޅަ ސީޒަންގެ ކަލަންޑަރުގައި ވާގޮތުން އޭރު ރާއްޖޭގެ ފުޓްބޯޅަ ސީޒަން ފަށަން ނިންމާފައި އޮތީ ޕްރެޒިޑެންޓްސް ކަޕް ފުޓްބޯޅަ މުބާރާތުންނެވެ. އަދި އެއަށްފަހު ލީގު ފެށުމުގެ ކުރިން ޗެރިޓީ ޝީލްޑް މެޗު ކުޅުމަށެވެ.
ނަމަވެސް މިއަދު އެފްއޭއެމުން އާންމުކުރި ފުޓްބޯޅަ ސީޒަން ކަލަންޑަރުގައި ވާގޮތުން އަންނަ ޑިސެމްބަރ މަހުގެ 15 ގައި މިހާރު ކުޅުމަށް ހަމަޖެހިފައިވަނީ ޗެރިޓީ ޝީލްޑް މެޗެއެވެ. އަދި ޕްރެޒިޑެންޓްސް ކަޕް ފަށަން ތާވަލްކޮށްފައިވަނީ، ޑިސެމްބަރ 19 ވަނަ ދުވަހުއެވެ. ޕްރެޒިޑެންޓް ކަޕުގައި ވާދަކުރާނީ އެންމެ ފަހުން ލީގުގައި ވާދަކުރި 8 ޓީމެއެވެ. މުބާރާތް ކުރިޔަށް ގެންދިޔުމަށް ހަމަޖެހިފައިވަނީ ލީގު އުސޫލުން 1 ބުރު ކުޅޭ ގޮތަށެވެ. އެގޮތުން ކޮންމެ ޓީމެއް ކޮންމެ ޓީމަކާއި ދެކޮޅަށް ކުޅެ ނިމޭއިރު، 1 ވަނައިގައި އޮންނަ ޓީމަށް ޕްރެޒިޑެންޓް ކަޕުގެ ޗެމްޕިއަންކަން ލިބޭނެއެވެ.
އަންނަ އަހަރުގެ ފުޓްބޯޅަ ސީޒަން ޕްރެޒިޑެންޓް ކަޕުން ފަށާގޮތަށް ނިންމާފައިވާއިރު، ވޭތިވިދިޔަ 3 އަހަރުވެސް އެކި ސަބަބުތަކާއިހުރެ ޕްރެޒިޑެންޓް ކަޕް ބޭއްވޭ ގޮތްވަނީ ނުވެފައެވެ. އެންމެ ފަހުން ޕްރެޒިޑެންޓްސް ކަޕް ބާއްވާފައިވަނީ 2017 ވަނަ އަހަރުއެވެ. އެންމެ ފަހުން މިދިޔަ އަހަރުވެސް ޕްރެޒިޑެންޓްސް ކަޕް ބާއްވަން އެފްއޭއެމުން ޝެޑިއުލްކޮށްފައި އޮތްނަމަވެސް މުބާރާތް ކެންސަލް ކުރަން ޖެހުނީ ކޮވިޑް-19 އާ ގުޅިގެންނެވެ.
ޕްރެޒިޑެންޓް ކަޕަށް ފަހު ދިވެހި ޕްރިމިއާ ލީގު ފެށުމަށް އެފްއޭއެމުން ޝެޑިއުލްކޮށްފައިވަނީ ފެބްރުއަރީ މަހުގެ 5 ވަނަ ދުވަހުއެވެ. މީގެ ކުރިން އޮތީ ފެބްރުއަރީ 12 ވަނަ ދުވަހު ލީގު ފަށާ ގޮތަށެވެ.
ކޮމެންޓު ފޮނުވާ